ជាតិ
សុខភាព
ចូលឆ្នាំខ្មែរ៖ CDC ឲ្យពលរដ្ឋប្រយ័ត្នចំពោះចំណីអាហារចៀសវាងការពុល និងជំងឺឆ្លង
× ភ្នំពេញ៖ ខណៈពិធីបុណ្យចូលឆ្នាំខ្មែរជិតខិតមកដល់ នាយកដ្ឋានប្រយុទ្ធនឹងជំងឺឆ្លង (CDC)បានណែនាំប្រជាពលរដ្ឋឲ្យប្រយ័ត្នប្រយែងចំពោះចំណីអាហារ ទាំងការរក្សាអនាម័យ ការចម្អិន និងការទុកដាក់ជាដើម។ ការណែនាំនេះ គឺដោយសារតែ ការទទួលទានចំណីអាហារដែលខ្វះអនាម័យ ការចម្អិនអាហារ និងទុកដាក់ចំណីអាហារមិនត្រឹមត្រូវបណ្តាលឲ្យពុល ដែលភាគច្រើនមានរោគសញ្ញាដូចជា ក្អួតចង្អោរ រាក រាកមួលជាដើម ហើយអាចបណ្តាលឲ្យឈឺ និងអាចមានគ្រោះថ្នាក់ដល់ជីវិត។
បើតាម CDC ដើម្បីចៀសចៀសវាងគ្រោះថ្នាក់បណ្តាលមកពីការពុលចំណី និងចៀសវាងការខាតបង់ពេលវេលា និងថវិកាប្រជាពលរដ្ឋត្រូវ ប្រើប្រាស់ទឹកស្អាត និងម្ហូបអាហារដែលស្អាតជានិច្ច។ ត្រូវលាងដៃនឹងសាប៊ូ មុនពេល និងអំឡុងពេលរៀបចំម្ហូបអាហារ មុន និងក្រោយពេលបន្ទោរបង់។
ចំពោះបន្លែ និងផ្លែឈើ ត្រូវលាងឲ្យបានស្អាតមុនបរិភោគ ហើយ សម្ភារប្រើសម្រាប់ចម្អិនអាហារ ក៏ត្រូវសម្អាតឲ្យបានត្រឹមត្រូវដែរ។ នេះបើតាម CDC ដោយបានបន្តទៀតថា រាល់ចំណីអាហារ ត្រូវចម្អិនឲ្យបានឆ្អិនល្អ ជាពិសេសសាចសត្វស្លាប និងអាហារសមុទ្រ។ រវាងអាហារឆៅ និងឆ្អិន ត្រូវទុកដាក់ដាច់ដោយឡែកពីគ្នា។ ចំណីអាហារ ក៏មិនត្រូវរក្សាទុកអាជាច្រើនថ្ងៃនោះដែរ ទោះជាស្ថិតក្នុងកម្រិតសីតុណ្ហភាពសុវត្ថិភាពក៏ដោយ។ ម្យ៉ាងទៀត ចៀសវាងប្រើប្រាស់ចំណីអាហារហួសកាលបរិច្ឆេទកំណត់។
សម្រាប់ព័ត៌មានបន្ថែមសូមទាក់ទងទៅលេខ ១១៥ ដោយឥតគិតថ្លៃពីគ្រប់ប្រព័ន្ធទាំងអស់៕
Tag:
ចំណីអាហារ
CDC
ពុលអាហារ
ជំងឺឆ្លង
© រក្សាសិទ្ធិដោយ thmeythmey.com