អន្តរជាតិ
នយោបាយជាតិ
ប្រធានាធិបតីហ្វីលីពីន ថ្លែងអាណិត«ជនជាតិរ៉ូហ៊ីងយ៉ា» និងសន្យាទទួលយកពួកគេមួយចំនួន ប្រធានាធិបតីហ្វីលីពីន រ៉ូឌ្រីហ្គោ ឌូទើតេ (រូបភាព AFP)
× មេដឹកនាំកំពូលហ្វីលីពីន លោក រ៉ូឌ្រីហ្គោ ឌូទើតេ បានពិពណ៌នាស្ថានភាពដែលបាន និងកំពុងតែកើតឡើង នៅក្នុងប្រទេសមីយ៉ាន់ម៉ា ទៅលើជនជាតិភាគតិច«រ៉ូហ៊ីងយ៉ា» គឺជាអំពើប្រល័យពូជសាសន៍។ មេដឹកនាំកំពូលរូបនេះ បានថ្លែងអាណិតអាសូរជនជាតិភាគតិចរ៉ូហ៊ីងយ៉ា ហើយថែមទាំងសន្យាជួយពួកគេ តាមអ្វីដែលហ្វីលីពីនអាចធ្វើទៅបាន។
លោកប្រធានាធិបតី រ៉ូឌ្រីហ្គោ ឌូទើតេ នៅថ្ងៃ០៥ មេសាកន្លងទៅ បានផ្តល់សុន្ទរកថាមួយ នៅវិមានប្រធានាធិបតីហ្វីលីពីន ក្នុងជំនួបជាមួយនឹងប្រជាកសិករ និងមន្ត្រីពាក់ព័ន្ធវិស័យកសិកម្ម ។ លោកប្រធានាធិបតី បានលើកឡើងពីបញ្ហា និងគោលនយោបាយការបរទេសហ្វីលីពីនចុងក្រោយជាច្រើន រួមទាំងការដកហ្វីលីពីន ចេញពីតុលាការព្រហ្មទណ្ឌអន្តរជាតិ (ICC) ផង។
នាជំនួបនោះដែរ ក្រៅពីបញ្ហាជាតិ លោកប្រធានាធិបតី ក៏បានលើកឡើងពីបញ្ហាក្នុងតំបន់របស់មិត្តអាស៊ាន ដែលមេដឹកនាំកំពូលរបស់អាស៊ានផ្សេងទៀត កម្រនឹងនិយាយណាស់ ដ្បិតវា អាចចាត់ទុកថាជារឿងជ្រៀតជ្រែកផ្ទៃក្នុង និងបំពានអធិបតេយ្យ។ បញ្ហានោះគឺ វិបត្តិជនភៀសខ្លួនជនជាតិភាគតិចរ៉ូហ៊ីងុយ៉ារបស់មីយ៉ាន់ម៉ា។
តាមភ្នាក់ងារព័ត៌មាន Reuters លោកប្រធានាធិបតី បានលើកឡើងយ៉ាងដូច្នេះថា៖« ខ្ញុំ ពិតជាអាណិតប្រជាជននៅទីនោះណាស់។ ខ្ញុំ ពិតជាមានឆន្ទៈ ទទួលយកជនភៀសខ្លួនរ៉ូហ៊ីងយ៉ា ក៏ប៉ុន្តែ ខ្ញុំក៏ចង់ឃើញអឺរ៉ុបចូលរួមទទួល និងដោះស្រាយបញ្ហានេះដែរ»។
លោកថែ្លងបែបនេះហើយ ក៏បន្ទោសសហគមន៍អន្តរជាតិ ដែលអសមត្ថភាពក្នុងការដោះស្រាយបញ្ហានៅមីយ៉ាន់ម៉ា។ « ពួកគេ(សហគមន៍អន្តរជាតិ) មិនអាចដោះស្រាយ សូម្បីតែបញ្ហារ៉ូហ៊ីងយ៉ា។ នេះ គឺជារូបរាងនៃអំពើប្រល័យពូជសាសន៍»។ លោកថ្លែងយ៉ាងដូច្នេះ។
ជុំវិញការលើកឡើងនេះ ប្រាកដណាស់ថា បានធ្វើឲ្យមីយ៉ាន់ម៉ា ដែលជាក្រុមគ្រួសារអាស៊ានដូចគ្នា មិនសប្បាយចិត្តនោះទេ។ តាមភ្នាក់ងារព័ត៌មានដដែលនោះ អ្នកនាំពាក្យរដ្ឋាភិបាលមីយ៉ាន់ម៉ា លោក ហ្ស ធេយ៍ ( Zaw Htay ) បានជំទាស់ ចំពោះការលើកឡើងពីរឿងអំពើប្រល័យពូជសាសន៍ ថាកំពុងតែកើតឡើងនៅមីយ៉ាន់ម៉ា។
អ្នកនាំពាក្យរូបនេះ បានអះអាងថា ការលើកឡើងរបស់លោក ឌូទើតេ មិនឆ្លុះបញ្ចាំងពីការពិតនៃស្ថានភាពមីយ៉ាន់ម៉ាឡើយ។ លោក ហ្ស ធេយ៍ ថែមទាំងចោទ លោក ឌូទើតេ ថា ជាបុគ្គល ដែលនិយាយពីរឿង ដែលទាំងខ្លួនឯងមិនដឹងអ្វីទាល់តែសោះ។
គួរជម្រាបថា តាមរបាយការណ៍របស់អង្គការជំនាញសិទ្ធិមនុស្ស ដែលរួមទាំងអង្គការសហប្រជាជាតិផងនោះ មានជនជាតិរ៉ូហ៊ីងយ៉ាយ៉ាងតិចកន្លះលាននាក់ បានភៀសខ្លួនពីមីយ៉ាន់ម៉ាទៅកាន់ប្រទេសជិតខាង ពិសេសបង់ក្លាដែស។ តាមរយៈកិច្ចសម្ភាសន៍របស់អង្គការទាំងនេះ ជនភៀសខ្លួនភាគច្រើន បានអះអាងថា ពួកគេរងការធ្វើបាបពីអាជ្ញាធរ ខណៈរដ្ឋាភិបាល មីយ៉ាន់ម៉ា អះអាងថា របាយការណ៍ទាំងនោះមិនពិត៕
Tag:
មីយ៉ាន់ម៉ា
រ៉ូហ៊ីងយ៉ា
ហ្វីលីពីន
© រក្សាសិទ្ធិដោយ thmeythmey.com