World Cup៖ ម្ចាស់ជើងឯក៥ជំនាន់ ប្រេស៊ីល បានលេខ៤នៅទឹកដីខ្លួនឯងកាលពី៤ឆ្នាំមុន

កីឡាអន្តរជាតិ

អន្តរជាតិ

World Cup៖ ម្ចាស់ជើងឯក៥ជំនាន់ ប្រេស៊ីល បានលេខ៤នៅទឹកដីខ្លួនឯងកាលពី៤ឆ្នាំមុន

08, Apr 2018 , 10:39 pm

រូបភាព

ដោយ: ទេព ពិទូរ្យ

ម្ចាស់ជើងឯក៥សម័យកាល ប្រេស៊ីល និងជាក្រុមដែលឈ្នះពានរង្វាន់កីឡាបាល់ទាត់ពិភពលោកនេះ ច្រើនជាងគេ បានកៅអីទៅកាន់ការប្រកួតដណ្តើមពានរង្វាន់ FIFA World Cup ឆ្នាំ២០១៨ នៅរុស្ស៊ី ស្ថិតនៅក្នុងពូល E ត្រូវជួបជាមួយ ស្វីស កូស្តារីកា និងស៊ែប៊ី។

អ្នកចាត់ការទូទៅ៖ លោក Tite (ប្រេស៊ីល)

ការប្រែប្រួលរបស់ក្រុមជម្រើសជាតិប្រេស៊ីលចាប់តាំងពីការឡើងកាន់កាប់ដោយលោក Tite កាលពីខែខែមិថុនាឆ្នាំ ២០១៦ មិនមានអ្វីគួរឲ្យកត់សម្គាល់ទេ គឺក្រុមសាំបានេះនៅតែខ្លាំង។ នៅក្នុងការប្រកួតវគ្គជម្រុះនៅតំបន់អាមេរិកឡាទីន អតីតអ្នកចាត់ការ Corinthians វ័យ៥៦ឆ្នាំ បានជួយប្រេស៊ីលឈ្នះ៩ប្រកួតជាប់គ្នា ដើម្បីក្លាយជាក្រុមដំបូងគេដែលអាចចូលរួមជាមួយម្ចាស់ផ្ទះទៅរុស្ស៊ីក្នុងព្រឹត្តិការណ៍ World Cup លើកទី២២។

កីឡាករឆ្នើម៖ Neymar

ជ័យលាភីពានរង្វាន់កីឡាបាល់ទាត់ FIFA Confederations Cup និងម្ចាស់មេដាយមាសអូឡាំពិក Neymar នឹងបង្ហាញខ្លួនជាលើកទី២ របស់គេនៅក្នុងការប្រកួតកីឡាបាល់ទាត់ពិភពលោកឆ្នាំ២០១៨ ដែលធ្វើឡើងនៅទឹកដីរុស្ស៊ី។

តារាឆ្នើម និងជាកីឡាករមានតម្លៃខ្លួនថ្លៃជាងគេលើលោករបស់ Paris Saint-Germain នេះក៏ធ្លាប់ឈ្នះពានរង្វាន់ FIFA Club World Cup ឆ្នាំ ២០១៥ ម្តងដែរ កាលស្នាក់នៅជាមួយ Barcelona។

ប្រវត្តិក្នុង World Cup៖

នេះជាវត្តមានលើកទី ២១ហើយ សម្រាប់ក្រុមជម្រើសជាតិប្រេស៊ីលនៅក្នុងព្រឹត្តិការណ៍លំដាប់ពិភពលោកនេះ ដែលមានន័យថាប្រទេសនេះអាក់ខានចូលរួមតែមួយលើកប៉ុណ្ណោះចាប់តាំងពីការបង្កើតពាននេះឡើងនៅឆ្នាំ១៩៣០មក។ លទ្ធផលល្អបំផុតដែលពួកគេទទួលបានគឺលើកបាន World Cup រហូតដល់ទៅ៥លើក ក្នុងឆ្នាំ១៩៥៨, ១៩៦២ ,១៩៧០, ១៩៩៤ និង២០០២។ ក្រៅពីនេះក្រុមរហស្សនាមសាំបាធ្លាប់រងជើងឯក២លើក និងឈានដល់វគ្គពាក់កណ្តាលផ្តាច់ព្រ័ត្រ១១ដងផងដែរ។ ប្រេស៊ីល ឈរនៅចំណាត់ថ្នាក់ទី២ពិភពលោក ក្នុងតារាង FIFA Ranking៕

កម្មវិធីប្រកួត៖

- ១៨ មិថុនា៖ ប្រេស៊ីល Vs ស្វីស (ម៉ោង ១អធ្រាត្រ ម៉ោងនៅកម្ពុជា)

- ២២ មិថុនា៖ ប្រេស៊ីល Vs កូស្តារីកា (ម៉ោង ៧យប់)

- ២៨ មិថុនា៖ ស៊ែប៊ី Vs ប្រេស៊ីល (ម៉ោង ១អធ្រាត្រ)