ជាតិ
សង្រ្កាន្តឆ្នាំថ្មី
ចូលឆ្នាំខ្មែរ៖ ក្រសួងទេសចរណ៍ឲ្យអ្នកពាក់ព័ន្ធសហការគ្នាការពាសន្តិសុខ សណ្តាប់ធ្នាប់ និងពង្រឹងគុណភាពទេសចរណ៍
× ភ្នំពេញ៖ ក្នុងឱកាសបុណ្យចូលឆ្នាំប្រពៃណីខ្មែរនេះ ក្រសួងទេសចរណ៍ បានចេញសារាចរណ៍ណែនាំទៅដល់គ្រប់មន្ទីរទេសចរណ៍រាជធានី-ខេត្តទាំងអស់ ឲ្យសហការជាមួយគ្រប់ភាគីពាក់ព័ន្ធ ក្នុងការការពារសន្តិសុខ សុវត្ថិភាព សណ្តាប់ធ្នាប់សាធារណៈ និងជាពិសេស ពង្រឹងផលិតផលទេសចរណ៍នៅតាមមូលដ្ឋានរបស់ខ្លួន។
បើតាមខ្លឹមសារនៃសារាចរណ៍ណែនាំដែលចុះហត្ថលេខាដោយ លោក ថោង ខុន រដ្ឋមនន្ត្រីក្រសួងទេសចរណ៍ មន្ទីរទេសចរណ៍គ្រប់រាជធានី-ខេត្ត ត្រូវសហការជាមួយអាជ្ញាធរគ្រប់លំដាប់ថ្នាក់ ដើម្បីធានាសន្តិសុខ សុវត្ថិភាព សណ្តាប់ធ្នាប់ ចំណតយានយន្ត ដល់ភ្ញៀវទេសចរណ៍ឲ្យបានល្អប្រសើរ។ មន្ទីរទេសចរណ៍គ្រប់រាជធានី-ខេត្ត ក៏ត្រូវសហការជាមួយ មន្ទីរវប្បធម៌ និងវិចិត្រសិល្បៈ មន្ទីរអប់រំ យុវជន និងកីឡា បំផុសការរៀបចំព្រឹត្តិការណ៍សង្ក្រាន្តនៅតាមគោលដៅសំខាន់ៗ និងការប្រឡងចម្រៀងបុរាណ កំណាព្យ អាយ៉ៃ ចាប៉ី ដោយផ្តោតលើខ្លឹមសារស្តីពីសក្តានុពល និងសកម្មភាពទេសចរណ៍ ដែលមានក្នុងមូលដ្ឋាន។
«ត្រូវរៀបចំឲ្យមានការលេងល្បែងប្រជាប្រិយទៅតាមប្រពៃណីជាតិខ្មែរ ដូចជាបោះអង្គញ់ ចោលឈូង ទាញព្រ័ត្រ លាក់កន្សែង និងស្តេចចង់ជាដើម ក៏ដូចជាសម្រួលឲ្យមានការសម្តែងរបាំត្រុដិនៅតាមមូលដ្ឋានអាជីវកម្មទេសចរណ៍ ដូចជាសណ្ឋាគារ ផ្ទះសំណាក់ ភោជនីយដ្ឋាន កន្លែងកម្សាន្ត និងមូលដ្ឋានអាជីវកម្មផ្សេងៗ»។ នេះបើតាមខ្លឹមសារសារាចរណ៍ដដែល។
ក្រសួងទេសចរណ៍ក៏ណែនាំ ឲ្យគ្រប់មន្ទីរទេសចរណ៍ សហការជាមួយមន្ទីរបរិស្ថាន មន្ទីរសុខាភិបាល និងផ្នែកពាក់ព័ន្ធនានា ណែនាំម្ចាស់មូលដ្ឋានអាជីវកម្ម សេវាកម្មទេសចរណ៍ ពិសេសភោជនីយដ្ឋាន អាហារដ្ឋាន ប្រជាពលរដ្ឋ និងភ្ញៀវទេសចរណ៍ ដោយលុបបំបាត់ការបោះសំរាម និងកាកសំណល់ផ្សេងៗនៅក្រៅធុងសំរាម និងកាកសំណល់ផ្សេងៗនៅក្រៅធុង ជាពិសេសជំរុញយុទ្ធនាការ«ភោជនីយដ្ឋានគ្មានសំរាមក្រោមតុ» និងត្រូវចាត់វិធានការតាមគ្រប់រូបភាព ដើម្បីធានាឲ្យបានអនាម័យល្អ នៅក្នុងភោជនីយដ្ឋាន រួមទាំងបន្ទប់ទឹក បង្គន់អនាម័យ ហើយបុគ្គលិកបម្រើការត្រូវមានឯកសណ្ឋានឲ្យបានល្អ។ ទន្ទឹមនេះ ម្ចាស់មូលដ្ឋានអាជីវកម្ម សេវាកម្មទេសចរណ៍ ពិសេសភោជនីយដ្ឋាន អាហារដ្ឋាន ប្រជាពលរដ្ឋ ត្រូវខិតខំសហការជាមួយផ្នែកកពាក់ព័ន្ធអប់រំអ្នកលក់ដូរ ម្ហូបអាហារភេសជ្ជៈតាមដងផ្លូវ ឲ្យថែរក្សាអនាម័យឲ្យបានត្រឹមត្រូវ និងផ្តល់បដិសណ្ឋារកិច្ចល្អចំពោះភ្ញៀវទេសចរ។ ចំពោះខេត្តតំបន់ឆ្នេរសមុទ្រទាំងបួន មន្ទីរទេសចរណ៍ ត្រូវសហការជាមួយអាជ្ញាធរដែនដីចាត់តាំងឲ្យមានអ្នកប្រចាំការ នៅតាមបណ្តោយឆ្នេរ និងមានអ្នកសម្អាតបរិស្ថាន អនាម័យជាប្រចាំ។
ត្រូវសហការជាមួយប្រតិបត្តិករទេចរណ៍ ក្នុងការពង្រឹងគុណភាពផលិតផលទេសចរណ៍ និងចូលរួមទប់ស្កាត់កាជួញដូរ ការប្រើប្រាស់គ្រឿងញៀន និងការធ្វើអាជីវកម្មជួញដូរផ្លូវភេទលើកុមារ ទប់ស្កាត់រាល់សកម្មភាពក្មេងទំនើង និងត្រុវអនុវ្តតតាមច្បាប់ និងការណែនាំរបស់រដ្ឋ លើកកម្ពស់គុណភាពសេវាកម្ម និងអនាម័យម្ហូបអាហារ ព្រមទាំងរក្សាតម្លៃផលិតផល និងសេវាកម្មជូនភ្ញៀវឲ្យបានសមរម្យ។ រាល់ថ្លៃស្នាក់នៅ ម្ហូបអាហារត្រុវសរសេរឲ្យបានច្បាស់លាស់ ក្នុងតារាង ដើម្បីជម្រាបចូនភ្ញៀវឲ្យបានដឹងជាមុន ចៀសវាងការកំនត់ថ្លៃខ្ពស់ហួសហេតុ។ ករណីដែលមិនអនុវត្តតមាតារាងដែលបានបិទផ្សាយ ម្ចាស់មូលដ្ឋាន ឬសេវាកម្មទេសចរណ៍ ត្រូវទទួលខុសត្រូវចំពោះមុខច្បាប់។
ត្រូវហសការជាមួយសាលារាជធានី-ខេត្ត និងប្រព័ន្ធផ្សព្វផ្សាយ ដើម្បីផ្សព្វផ្សាយស្ប៉តទេសចរណ៍ដែលអប់រំ ក្នុងការជំរុញចលនាប្រឡងប្រណាំង «ទីក្រុងស្អាត រមណីយដ្ឋានស្អាតសេវាល្អ បដិសណ្ឋារកិច្ចល្អ» និងត្រូវសហការជាមួយមន្ទីរធម្មការ និងសាសនា រៀបចំវត្តទេសចរណ៍គំរូសម្រាប់ភ្ញៀវទេសចរអន្តរជាតិ អាចស្វែងយល់ពីប្រវត្តិទំនៀមទម្លាប់ នៃការរៀបចំពិធីបុណ្យចូលឆ្នាំខ្មែរប្រពៃណីជាតិ៕
© រក្សាសិទ្ធិដោយ thmeythmey.com