អន្តរជាតិ
នុយក្លេអ៊ែរកូរ៉េខាងជើង៖ ព្យុងយ៉ាងប្រាប់វ៉ាស៊ីនតោនដោយផ្ទាល់ថា ខ្លួនមានឆន្ទៈចរចា រូបភាព AFP
× កូរ៉េខាងជើង បានប្រាប់អាមេរិកផ្ទាល់មាត់ថា ខ្លួនមានឆន្ទៈចរចាស្ដីពីការរំសាយនុយក្លេអ៊ែរនៅឧបទ្វីបកូរ៉េពេលមេដឹកនាំកំពូល គីម ជុងអ៊ុន ជួបជាមួយប្រធានាធិបតី ដូណាល់ ត្រាំ នៅខែឧសភាខាងមុខ។ នេះជាលើកដំបូងដែលកូរ៉េខាងជើងបង្ហាញជំហរចរចាលើបញ្ហានុយក្លេអ៊ែរ ដែលខ្លួនធ្លាប់តែអះអាងថា មិនមែនជាកម្មវត្ថុនៃការចរចាណាមួយឡើយ។ ការបង្ហាញជំហរនេះ ធ្វើឡើងក្នុងជំនួបសម្ងាត់រវាងមន្ត្រីប្រទេសទាំងពីរ។
មន្ត្រីអាមេរិក និងកូរ៉េខាងជើងបានជួបគ្នាដោយសម្ងាត់នៅពេលលថ្មីៗនេះ ដោយក្នុងនោះមន្ត្រីក្រុងព្យុងយ៉ាងអះអាងថា ខ្លួនត្រៀមរួចស្រេចដើម្បីជជែកពីការលុបបំបាត់នុយក្លេអ៊ែរអំឡុងពេលជំនួបមេដឹកនាំប្រទេសទាំងពីរនៅខែក្រោយ។ នេះបើតាមមន្ត្រីអាមរិកប្រាប់សារព័ត៌មានក្នុងស្រុក Wall Street Journal នៅថ្ងៃទី៨ ខែមេសា។ អាចថា នេះជាលើកទីមួយហើយដែលកូរ៉េខាងជើងប្រាប់អាមេរិកដោយផ្ទាល់បែបនេះ។
ការជួបពិភាក្សាដោយផ្ទាល់រវាងអាមេរិក និងកូរ៉េខាងជើង ស្ថិតនៅកម្រិតទាបនៅឡើយ។ សារព័ត៌មានអាមេរិកផ្សាយថា មន្ត្រីក្រសួងការបរទេសអាមេរិកបានជួបជាមួយមន្ត្រីកូរ៉េខាងជើងតាមរយៈស្ថានបេសកកម្មកូរ៉េខាងជើងប្រចាំអង្គការសហប្រជាជាតិ ខណៈមន្ត្រីផ្នែកចារកម្មប្រទេសទាំងពីរក៏បានជួបគ្នាជាសម្ងាត់ដែរ។ អនាគតរដ្ឋមន្ត្រីការបរទេសអាមេរិក Mike Pompeo ដែលជាអតីតប្រធានទីភ្នាក់ងារចារកម្មកណ្ដាល (CIA) បានដឹកនាំការងារចរចាសម្ងាត់នេះ។
ជំនួបលួចលាក់រវាងមន្ត្រីអាមេរិក និងកូរ៉េខាងជើង មានគោលដៅរៀបចំជំនួបលើកដំបូងរវាងមេដឹកនាំកំពូល គីម ជុងអ៊ុន និងប្រធានាធិបតី ដូណាល់ ត្រាំ ស្ដីការរំលាលចោលនុយក្លេអ៊ែរពីឧបទ្វីបកូរ៉េ។ ទីតាំង និងពេលវេលាជាក់លាក់មិនទាន់កំណត់នៅឡើយ តែវាជាប្រធានបទនៃការជួបគ្នាសម្ងាត់នេះ។ ទោះជាលោក គីម ជុងអ៊ុន ជាអ្នកស្នើជួបមុនក្ដី គេមិនទាន់ឮកូរ៉េខាងជើងនិយាយពីជំនួបនេះសូម្បីតែមួយម៉ាត់នៅឡើយទេ។
កន្លងមក អាមេរិកពឹងផ្អែកស្ទើរទាំងស្រុងលើកូរ៉េខាងត្បូងក្នុងទំនាក់ទំនងជាមួយកូរ៉េខាងជើង ដ្បិតគូសត្រូវទាំងពីរនេះគ្មានទំនាក់ទំនងផ្លូវការឡើយ។ ចំណែកការអញ្ជើញរបស់លោក គីម ទៅកាន់លោក ត្រាំ ក៏ត្រូវបានធ្វើឡើងតាមរយៈមន្ត្រីកូរ៉េខាងត្បូងដែរ។ ជុំវិញជំនួបសម្ងាត់រវាងមន្ត្រីខាងលើវិញ មន្ត្រីអាមេរិកមិនបានបញ្ជាក់ពីទីតាំង និងកន្លែងជួបគ្នាឡើយ ដោយគ្រាន់តែនិយាយថា ភាគីទាំងពីរជួបគ្នាផ្ទាល់ច្រើនលើកប៉ុណ្ណោះ។
ដូចដឹងស្រាប់ ជំនួបជាប្រវត្តិសាស្ត្ររវាងមេដឹកនាំអាមេរិក និងកូរ៉េខាងជើង នឹងផ្ដោតលើបញ្ហានុយក្លេអ៊ែរកូរ៉េខាងជើង។ ប៉ុន្តែគេឃើញមានការព្រមានទុកហើយថា កុំរំពឹងខ្ពស់ពេកពីជំនួបនេះ។ នេះក៏ព្រោះតែកូរ៉េខាងជើងមិនអាចបោះបង់នុយក្លេអ៊ែរដោយងាយឡើយ។ ដើម្បីបោះបង់អាវុធរបស់ខ្លួន កូរ៉េខាងជើងទំនងជាដាក់លក្ខខណ្ឌខ្ពស់រហូតដល់ថ្នាក់អាមេរិកមិនអាចធ្វើតាមបាន ហើយការចរចាក៏អាចបរាជ័យទៀតផង៕
Tag:
កូរ៉េខាងជើង
អាមេរិក
នុយក្លេអ៊ែរ
© រក្សាសិទ្ធិដោយ thmeythmey.com