ជាតិ
រថយន្ត
តោះ! កម្មវិធីហៅតាក់ស៊ី និងរ៉ឺម៉កកង់បីជិះដែលបង្កើតដោយកូនខ្មែរ
× តោះ!(Tos Tov) ជាApplication មួយសម្រាប់ហៅតាក់ស៊ី និងរ៉ឺម៉កកង់បី (ខ្មែរ,ឥណ្ឌា )ជិះ តាមរយៈទូរសព្ទដៃ ដែលបានបង្កើតដោយកូនខ្មែរ។ កម្មវិធីនេះ បានដំណើរការ ១ឆ្នាំហើយ គឺចាប់តាំងនៅក្នុងខែមេសា ឆ្នាំ២០១៧មក។
សម្រាប់ការហៅតាក់ស៊ីតាមកម្មវិធី Tos Tov គឺតម្លៃ៦ពាន់រៀលពេលចាប់ផ្តើមឡើងជិះ ហើយគីឡូមបន្ទាប់តម្លៃ១,៦០០ពាន់រៀល។ ចំណែក រ៉ឺម៉កកង់បីខ្មែរ មួយគីម៉ែត្រដំបូងតម្លៃ៤ពាន់រៀល ហើយតម្លៃគីឡូម៉ែត្របន្ទាប់តែ១,២០០រៀលប៉ុណ្ណោះ។ ចំណែកឯរ៉ឺម៉កកង់បីឥណ្ឌា មានតម្លៃថោកជាងរ៉ឺម៉កកង់បីខ្មែរបន្តិច គឺមួយគីម៉ែត្រដំបូងតម្លៃ៣ពាន់រៀល ហើយតម្លៃគីឡូម៉ែត្របន្ទាប់តែ១,២០០រៀលប៉ុណ្ណោះ។ មូលហេតុខុសគ្នា គឺរ៉ឺម៉កកង់បីខ្មែរ គឺគាត់ប្រើសាំង ឯរ៉ឺម៉កកង់បីឥណ្ឌា គឺប្រើហ្គាស។ នេះបើតាមការពន្យល់របស់លោក លោក ប្រឿង សេង។
លោក ប្រឿង សេង នាយកប្រតិបត្តិនៃTos Tov Co., LTD បានប្រាប់សារព័ត៌មានថ្មីៗថា លោកសុខចិត្តបង្កើតឈ្មោះ និងខិតខំកសាងកេរ្តិ៍ឈ្មោះកម្មវិធីដោយខ្លួនឯង ព្រោះលោកចង់ឲ្យប្រជាពលរដ្ឋខ្មែរមានមោទនភាពនឹងស្នាដៃរបស់ជាតិសាសន៍ខ្លួន និងចង់បង្ហាញថា កូនខ្មែរ ក៏មានសមត្ថភាព មិនចាញ់បរទេសដែរ។ លោក ប្រឿង សេង បញ្ជាក់បន្ថែមដូច្នេះ៖«ជាគោល ពួកខ្ញុំចង់ធ្វើអ្វីជារបស់ខ្មែរ។ តាមពិតពួកខ្ញុំក៏អាចធ្វើការងារហ្នឹងស្រួលដែរ ដោយទិញកម្មវិធីពីបរទេសមក ឬទិញឈ្មោះពីបរទេសមកបាន ដោយសារខ្មែរយើងរាល់ថ្ងៃនិយម «Brand» ពីបរទេស។ ប៉ុន្តែពួកខ្ញុំអត់គិតអ៊ីចឹង។ ពួកខ្ញុំចង់ធ្វើអ្វីមួយឲ្យខ្មែរយើងមានមោទនភាព គេធ្វើបាន ខ្មែរយើងក៏មិនអន់ដែរ។ App ហ្នឹងគឺសរសេរកូដដោយអ្នកជំនាញជនជាតិខ្មែរ ដែលពួកគាត់ចប់ពីសាលាផ្សេងៗនៅខ្មែរយើង»។
បច្ចុប្បន្នមានអ្នកទាញយក Application «តោះ» ទៅប្រើប្រាស់គឺជិត៥ពាន់នាក់។ ចំណែកឯ តាក់ស៊ី ជាង១៥០នាក់ និងរ៉ឺម៉កកង់បីរបស់ខ្មែរ និងឥណ្ឌា មានជាង៣០០នាក់។ ចំនួនមានតិចតួចណាស់ បើធៀបនឹងកម្មវិធីរបស់បរទេស ដែលបានវាយលុកទីផ្សារកម្ពុជា។ ប៉ុន្តែទោះជាត្រូវប្រកួតប្រជែងខ្លាំងជាមួយBrandបរទេស លោក ប្រឿង សេង សង្ឃឹមថាប្រជាពលរដ្ឋខ្មែរ នឹងគាំទ្រ កម្មវិធីដែលបង្កើតឡើងដោយកូនខ្មែរមួយនេះ៕
© រក្សាសិទ្ធិដោយ thmeythmey.com