រថយន្ត
អន្តរជាតិ
ឡាវបន្តប្រកាសលក់រថយន្តទំនើបរបស់រដ្ឋដែលដកហូតពីមេដឹកនាំដើម្បីកាត់បន្ថយការចំណាយខ្ជះខ្ជាយ រូបភាព The Nation
× រដ្ឋាភិបាលក្រុងវៀងចន្ទន៍ បានប្រកាសដាក់លក់រថយន្តទំនើបប្រភេទ Mercedes-Benz របស់រដ្ឋជាច្រើនគ្រឿងជាថ្មីម្តងទៀត ក្នុងយុទ្ធនការសន្សំសំចៃថវិការដ្ឋ និងធានាឲ្យបានថា មន្ត្រីរដ្ឋ អាចប្រើប្រាស់រថយន្តត្រឹមតែជាប្រភេទសាមញ្ញ និងតម្លៃថោកប៉ុណ្ណោះ ។
ក្រសួងហិរញ្ញវត្ថុរបស់ឡាវ បានចេញសេចក្តីជូនដំណឹងមួយដល់ភាគីពាក់ព័ន្ធសម្រាប់ការចូលរួមដេញថ្លៃ និងទិញរថយន្តរបស់រដ្ឋម៉ាក Mercedes-Benz E350 ចំនួន១៥គ្រឿង និងម៉ាក Mercedes-Benz S350 ចំនួនមួយគ្រឿង ដែលបែបបទចូលរួមដេញថ្លៃ ចាប់ផ្តើមលក់នៅថ្ងៃទី៥ ខែមេសា ។ នេះបើយោងតាមការចុះផ្សាយរបស់សារព័ត៌មានឡាវ Vientiane Times ។
តាមប្រភពព័ត៌មានដដែល នេះ គឺជាលើកទីពីរហើយរបស់រដ្ឋាភិបាលឡាវដែលបានដាក់ដេញថ្លៃលក់រថយន្តរដ្ឋដែលត្រូវបានប្រើប្រាស់សម្រាប់ដឹកជញ្ជូនមន្ត្រីជាន់ខ្ពស់របស់ប្រទេស ។ ឆ្នាំមុន រដ្ឋាភិបាលឡាវ បានលក់រថយន្តប្រភេទ BMW 730 LI និង Mercedes Benz S350 ដែលត្រូវបានប្រើប្រាស់ជាមធ្យោបាយរបស់ប្រធានាធិបតី អនុប្រធានាធិបតី នាយករដ្ឋមន្ត្រី និងបណ្តាមេដឹកនាំជាន់ខ្ពស់ឡាវផ្សេងទៀត ។
ការដាក់ដេញថ្លៃលក់រថយន្តទំនើបៗរដ្ឋរបស់ថ្នាក់ដឹកនាំកំពូលរបស់ប្រទេសឡាវ គឺជាព្រឹត្តិការណ៍ប្រវត្តិសាស្ត្រមួយហើយ នៃកិច្ចការដឹកនាំប្រទេសរបស់រដ្ឋាភិបាលឡាវ ។ បើតាម Vientiane Times បច្ចុប្បន្ន មន្ត្រីជាន់ខ្ពស់រដ្ឋាភិបាលឡាវ កំពុងតែប្រើប្រាស់រថយន្តប្រភេទ Toyota Camry តម្លៃទាបជំនួសវិញ ។
សូមជម្រាបផងដែរថា គោលនយោបាយនៃការដកហូតឡានទំនើបពីមន្ត្រីជាន់ខ្ពស់ និងផែនការដាក់ឲ្យដេញថ្លៃនេះ ធ្វើឡើងក្រោយពីមេដឹកនាំបក្សកុម្មុយនីស្ត និងរដ្ឋាភិបាលឡាវ បានព្រមព្រៀងគ្នាថា ឈប់បើកបរ និងប្រើប្រាស់យានយន្តទំនើបៗដូចជា BMW និង Mercedes Benzes ក្នុងគោលដៅដើម្បីកាត់បន្ថយការចំណាយថវិកាជាតិ។ ហើយជំនួសមកវិញ មន្ត្រីជាន់ខ្ពស់ អាចប្រើប្រាស់យានយន្តដែលមានម៉ាក និងតម្លៃថោក និងសមរម្យបានហើយ ៕
Tag:
ឡាវ
រថយន្ត
អាស៊ាន
© រក្សាសិទ្ធិដោយ thmeythmey.com