អន្តរជាតិ
បារាំង-អាមេរិក អះអាងថាខ្លួនមិនបានផ្លោងមីស៊ីលចូលមូលដ្ឋានទ័ពស៊ីរីដែលសម្លាប់កងទ័ព ១៤នាក់ឡើយ
× មូលដ្ឋានទ័ពអាកាសស៊ីរីនៅខេត្ត Homs រងការវាយប្រហារដោយមីស៊ីលនៅព្រឹកថ្ងៃចន្ទទី ៩ ខែមេសានេះដែលបណ្តាលឲ្យមនុស្ស ១៤ នាក់ស្លាប់ក្នុងនោះមានកងកម្លាំងរដ្ឋាភិបាលអ៊ីរ៉ង់ផង។ គេមិនទាន់ដឹងច្បាស់ថា អ្នកណាជាអ្នកពាក់ព័ន្ធការវាយប្រហារនេះឡើយ ប៉ុន្តែបារាំង និងអាមេរិកបានចេញមុខបញ្ជាក់ថា ខ្លួនមិនមានពាក់ព័ន្ធការបាញ់ផ្លោងមីស៊ីលនេះទេ។
កងកម្លាំងប្រហែល ១៤ នាក់បានស្លាប់ក្នុងនោះមានកងកម្លាំងរបស់អ៊ីរ៉ង់ដែលទៅជួយច្បាំងរដ្ឋាភិបាលស៊ីរីផង នៅក្នុងការបាញ់ផ្លោងមីស៊ីលលើមូលដ្ឋានទ័ពអាកាស T-4 នាព្រឹកព្រហាមថ្ងៃចន្ទនេះ។ នេះបើតាមការបញ្ជាក់របស់ស្ថាប័នឃ្លាំមើលសិទ្ធិមនុស្សស៊ីរីដែលដកស្រង់ដោយទីភ្នាក់ងារព័ត៌មាន AFP។
ស្ថាប័នខាងលើបន្ថែមថា បច្ចុប្បន្ននេះកងម្លាំងស៊ីរី រុស្ស៊ី អ៊ីរ៉ង់ និងក្រុមហេស្បូឡា លីបង់សុទ្ធតែឈរជើងនៅលើទឹកដីស៊ីរីដើម្បីជួយគាំទ្ររដ្ឋាភិបាលស៊ីរីក្នុងសង្គ្រាមប្រឆាំងក្រុមភេរវជន និងក្រុមឧទ្ទាមនោះ។ ប៉ុន្តែគេមិនដឹងថា មូលដ្ឋាទ័ពអាកាស T-4 មានកងទ័ពបរទេសច្រើនប៉ុណ្ណាឡើយ។
ខាងទីភ្នាក់ងារព័ត៌មានរដ្ឋស៊ីរីបានចុះផ្សាយផងដែរពីការវាយប្រហារនេះប៉ុន្តែវាមិនមានការបញ្ជាក់នោះឡើយថា អ្នកស្លាប់ឬរបួសមានប៉ុន្មានពិតប្រាកដនោះ។ មូលដ្ឋានទ័ពអាកាស T-4 នេះនៅចំកណ្តាលខេត្តHoms ហើយវាមានឈ្មោះថា ព្រលានយន្តហោះ Tiyas។
ពាក់ព័ន្ធការវាយប្រហារដោយមីស៊ីលនេះ វាមិនទាន់មានការកំណត់សញ្ញាណភាគីដែលប្រើប្រាស់មីស៊ីលនេះនៅឡើយទេ ប៉ុន្តែកន្លងមកអ៊ីស្រាអែលធ្លាប់វាយប្រហារលើមូលដ្ឋានទ័ពស៊ីរីតាមផ្លូវអាកាសកន្លងមក។ ជាឧទាហរណ៍កាលពីខែកុម្ភៈកន្លងមក ទាហានអ៊ីស្រាអែលវាយប្រហារលើមូលដ្ឋានទ័ពស៊ីរីដែរ ហើយគោលដៅកម្ចាត់កងកម្លាំងគាំទ្ររដ្ឋាភិបាលអាសាដ ដូចជាអ៊ីរ៉ង់ និងហេស្បូឡាជាដើម។ យ៉ាងណាមិញពាក់ព័ន្ធនឹងបញ្ហានេះ ខាងកងទ័ពអ៊ីស្រាអែលបានបដិសេធផ្តល់យោបល់ជុំវិញនញ្ហានេះរួចទៅហើយ។
តាមពិតទៅការវាយប្រហារលើមូលដ្ឋានទ័ពអាកាសស៊ីរីគឺកើតឡើងក្រោយពេលដែលមានការរាយការណ៍ថា អាវុធគីមីត្រូវបានគេប្រើប្រាស់ជាថ្មីទៀតនៅស៊ីរីដើម្បីប្រឆាំងជនស៊ីវិលនាទីក្រុងឌូម៉ា ដែលបណ្តាលឲ្យមនុស្សយ៉ាងណចណាស់ ១៤ នាក់ឯណោះ។ ឆ្លើយតបនឹងបញ្ហាចំណែកមេដឹកនាំបារាំងលោក អេម៉ានុយអែល ម៉ាក្រុង និងលោក ដូណាល់ ត្រាំ ប្រធានាធិបតីអាមេរិកបានព្រមចាត់វិធានការធ្ងន់ធ្ងររួមដើម្បីថ្កោលទោស និងប្រឆាំងក្រុងដាម៉ាសដូចគ្នា។
ពាក់ព័ន្ធនឹងការវាយប្រហារមូលដ្ឋានទ័ពស៊ីរីនេះដែរ យោធាបារាំងដែលមានវត្តមាននៅស៊ីរីបានបដិសេធពាក្យអារចាមអារាមទាំងអំប្បាលម៉ានពាក់ព័ន្ធនឹងខ្លួន ហើយតំណាងបារាំងនេះអះអាងច្បាស់ថា ខ្លួនមិនពាក់ព័ន្ធការបាញ់ផ្លោងមីស៊ីលចូលមូលដ្ឋានទ័ពអាកាសឡើ។
អ្នកនាំពាក្យកងទ័ពជើងគោកបារាំងលោក Patrik Steiger បានប្រាប់ទីភ្នាក់ងារព័ត៌មាន AFP ដូច្នេះថា ៖«វាមិនមែនក្រុមយើងឡើយ»។
ក្រៅពី តំណាងយោធាបារាំង ខាងយោធាអាមេរិកក៏បានចេញមុខបកស្រាយដូចគ្នាថា ខ្លួនមិនបានដឹង និងមិនពាក់ព័ន្ធការបាញ់ផ្លោងមីស៊ីលស្រោចចូលទឹកដីស៊ីរីនោះឡើយ៕
Tag:
អាមេរិក
បារាំង
ស៊ីរី
Homs
© រក្សាសិទ្ធិដោយ thmeythmey.com