ជាតិ
ជប៉ុន មិនចង់ឃើញមិត្ត «កម្ពុជា» រងការរិះគន់ទេ
× ភ្នំពេញ៖ រដ្ឋាភិបាលជប៉ុន មិនចង់ឃើញកម្ពុជា រងការរិះគន់ពីសំណាក់សហគមអន្តរជាតិឡើយ។ នេះជាសម្ដីរបស់រដ្ឋមន្ត្រីការបរទេសជប៉ុនលោក Taro Kono ដែលស្រង់ដោយទូរទស្សន៍ជប៉ុន NHK World។
តាមរយៈខ្លឹមសារទូរទស្សន៍ជប៉ុន NHK បានចុះផ្សាយថា លោក Taro Kono បានជំរុញឲ្យរដ្ឋាភិបាលកម្ពុជា ដែលដឹកនាំដោយសម្ដេច ហ៊ុន សែន ធានាដល់ការបោះឆ្នោតខាងមុខនេះ ធ្វើយ៉ាងណាឲ្យប្រព្រឹត្តទៅដោយសេរី និងយុត្តិធម៌ ស្របតាមឆន្ទៈរបស់ប្រជាពលរដ្ឋ។ រដ្ឋាភិបាលជប៉ុន ប្ដេជ្ញាតាមដានស្ថានការណ៍នយោបាយនៅកម្ពុជា។
«ជប៉ុន និងកម្ពុជា គឺជាមិត្តយូរឆ្នាំមកហើយ។ ហើយជប៉ុនមិនចង់ឃើញមិត្តកម្ពុជា រងការរិះគន់(ពីសំណាក់សហគមអន្តរជាតិ) នោះទេ។ ជប៉ុននឹងបន្តតាមដានយ៉ាងយកចិត្តទុកដាក់លើស្ថានភាពនានានៅក្នុងប្រទេសកម្ពុជា»។ នេះជាសម្តីរបស់រដ្ឋមន្ត្រីការបរទេសជប៉ុនលោក Taro Kono ។
សម្រាប់អ្នកវិភាគនយោបាយនៅកម្ពុជាវិញ យល់ថា ពាក្យសម្តីប៉ុន្មានឃ្លារបស់ជប៉ុននេះ នឹងអាចជួយបន្ធូរបន្ថយស្ថានភាពតាងតឹងនយោបាយ មុនពេលបោះឆ្នោតមកដល់។ ក្នុងន័យនេះលោក ហង្ស វិទូ ពន្យល់ថា ជប៉ុន កំពុងបង្ហាញពីការយកចិត្តទុកដាក់លើបញ្ហានយោបាយនៅកម្ពុជា បើទោះជាគ្មានប្រតិកម្មខ្លាំងដូចបណ្ដាប្រទេសអន្តរជាតិក្តី។ នោះក៏ព្រោះតែជប៉ុន គឺជាប្រទេសដែលប្រើនយោបាយការទូតសម្របសម្រួលបញ្ហា និងមិនដាក់សម្ពាធ ឬលូកដៃចូលកិច្ចការផ្ទៃក្នុងប្រទេសកម្ពុជា ដូចសហគមន៍អន្តរជាតិឡើយ។
បើតាមលោក ហង្ស វិទូ គោលនយោបាយការបរទេសរបស់ជប៉ុនបែបនេះ ទើបអាចដោះស្រាយបញ្ហាកម្ពុជាបាន ខណៈរដ្ឋាភិបាល តែងតែប្រកាន់ជំហរឯករាជ្យមិនចុះញ៉ម សម្ពាធសហគមអន្តរជាតិកន្លងមក ពោលមានន័យថា ប្រើធម៌ត្រជាក់ បង្ក្រាបធម៌ក្តៅ។
ថ្លែងប្រាប់សារព័ត៌មានថ្មីៗ អ្នកវិភាគរូបនេះ បានអត្ថាធិប្បាយដូច្នេះថា៖«ប្រទេសជប៉ុន គឺជាប្រទេសដែលឆ្លាតវៃ ហើយគេធ្វើការទូតដោយសន្តិវិធី ក្នុងការព្យាយាមលើកទឹកចិត្តកម្ពុជាឲ្យដោះស្រាយបញ្ហាដោយសន្តិវិធី ។ហើយខ្ញុំយល់ថាជប៉ុន មានសុទិដ្ឋិនិយម មុនថ្ងៃបោះឆ្នោត កម្ពុជានឹងមានច្រកចេញមួយ ដើម្បីឈានទៅរកការបោះឆ្នោត ដោយមានបក្សប្រឆាំងចូលរួម។ ហើយខ្ញុំយល់ថា ជប៉ុនមុននឹងស្នើដល់កម្ពុជា ជប៉ុនដឹងខ្លួនថា មានឥទ្ធិពលប៉ុណ្ណាចំពោះកម្ពុជា ជប៉ុនដឹងជាមុនស្រេច។ ទី២ កម្ពុជាខ្លួនឯងក៏ដឹងថា ជប៉ុនមានតួនាទីសំខាន់ប៉ុណ្ណាសម្រាប់កម្ពុជា ទាំងផ្នែកនយោបាយ ផ្នែកសេដ្ឋកិច្ច និងជំនួយក្តី… ដូច្នេះចង់មិនចង់ក៏ជប៉ុន នៅតែមានឥទ្ធិពលចំពោះការសម្រេចរបស់រដ្ឋាភិបាលកម្ពុជា»។
តែយ៉ាងណាលោក អ៊ាង សុផល្លែត ជំនួយការផ្ទាល់សម្ដេច ហ៊ុន សែន បានប្រាប់អ្នកសារព័ត៌មាន កាលពីថ្ងៃទី៨ មេសាថា ជំនួបរវាងសម្ដេច ហ៊ុន សែន និងរដ្ឋមន្ត្រីការបរទេសជប៉ុនលោក Taro Kono គ្មានការពិភាក្សាគ្នាអំពីបញ្ហានយោបាយនោះឡើយ ។ លោកថា ភាគីទាំងពីរពិភាក្សាផ្តោតលើការពង្រឹកកិច្ចសហប្រតិបត្តិការបន្ថែម រួមទាំងការបង្ហាញជំហររបស់ជប៉ុន ក្នុងការជួយដល់កម្ពុជាប៉ុណ្ណោះ។
ត្រង់ចំណុចនេះ ប្រមុខរដ្ឋាភិបាល ក៏ធ្លាប់និយាយថា ជប៉ុន ជាប្រទេសមិនជ្រៀតជ្រែកចូលកិច្ចការផ្ទៃក្នុងកម្ពុជា ដូចប្រទេសដទៃឡើយ។ ហើយជប៉ុន គោរពឯករាជ្យ និងគាំទ្ររាល់ការសម្រេចចិត្តរបស់កម្ពុជា។
គួរបញ្ជាក់ថា រដ្ឋាភិបាលជប៉ុន បានផ្ដល់ថវិកាជាង៧លានដុល្លារអាមេរិក សម្រាប់ជួយដំណើការបោះឆ្នោតនៅកម្ពុជា ខណៈចិន ជួយថវិកាជាង២០លានដុល្លារ។ ការផ្ដល់ជំនួយនេះ ត្រូវបានរដ្ឋាភិបាលជប៉ុន រំពឹងថា អាចជួយដល់ការរៀបចំការបោះឆ្នោត ប្រព្រឹត្តទៅដោយសេរី និងយុត្តិធម៌។ ប្រមុខរដ្ឋាភិបាលកម្ពុជា ក៏បានសន្យាចំពោះមុខរដ្ឋមន្ត្រីការបរទេសជប៉ុនថា ការបោះឆ្នោតនៅពេលខាងមុខ នឹងប្រព្រឹត្តទៅដោយសេរី ត្រឹមត្រូវ និងយុត្តិធម៌។ នេះបើតាមទូរទស្សន៍ជប៉ុន NHK World៕
Tag:
ហ៊ុន សែន
Taro Kono
ជប៉ុន
កម្ពុជា
© រក្សាសិទ្ធិដោយ thmeythmey.com