មូលនិធិសកលផ្តល់ជំនួយជាង៥៥លានដុល្លារ ឲ្យកម្ពុជាប្រយុទ្ធនឹងជំងឺអេដស៍ និងរបេង

ជាតិ

សេដ្ឋកិច្ច

មូលនិធិសកលផ្តល់ជំនួយជាង៥៥លានដុល្លារ ឲ្យកម្ពុជាប្រយុទ្ធនឹងជំងឺអេដស៍ និងរបេង

10, Apr 2018 , 7:59 am

រូបភាព

រូបពីក្រសួងសេដ្ឋកិច្ចនិងហិរញ្ញវត្ថុ

ដោយ: អ៊ូ សុខមាន (OU Sokmean)

ភ្នំពេញ៖ កម្ពុជា ទទួលបានជំនួយឥតសំណងប្រមាណ៥៥លានដុល្លារ ពីមូលនិធិសកល។ ការបញ្ជាក់ពីការទទួលបានជំនួយនេះ ធ្វើឡើងនៅក្នុងពិធីប្រកាសឲ្យអនុវត្ត«កម្មវិធីប្រយុទ្ធប្រឆាំងនឹងជំងឺអេដស៍ និងរបេងនៅកម្ពុជា» នៅថ្ងៃទី៩ ខែមេសានេះ នៅទីស្តីការក្រសួងសេដ្ឋកិច្ច និងហិរញ្ញវត្ថុ។

តាមរយៈសេចក្តីជូនដំណឹងរបស់ក្រសួងសេដ្ឋកិច្ច និងហិរញ្ញវត្ថុ លោក អូន ព័ន្នមុនិរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងនៅចំពោះមុខ លោក ម៉ាក អេឌីងតុន (Mark Edington) នាយកផ្នែកគ្រប់គ្រងថវិកាហិរញ្ញប្បទានឥតសំណងនៃមូលនិធិសកលដូច្នេះថា៖«ហិរញ្ញប្បទានឥតសំណងថ្មីៗប្រមាណ ៥៥.៤លានដុល្លារនេះ គឺជាជំហ៊ានដ៏ធំមួយ នៃកិច្ចខិតខំប្រឹងប្រែងរួមគ្នារបស់យើងនិងពិភពលោកទាំងមូល»។

មូលនិធិសកល គឺជាដៃគូដ៏សំខាន់បំផុតរបស់យើង ក្នុងការប្រយុទ្ធប្រឆាំង នឹងជំងឺអេដស៍ របេង និងគ្រុនចាញ់ ដែលបានចូលរួមចំណែក ដ៏ច្រើនដល់កម្ពុជា ដើម្បី សម្រេចបានបាននូវសមិទ្ធផលជាទីមោទន ក្នុងការកាត់បន្ថយចំនួនគ្រោះថ្នាក់ ពីជំងឺទាំងនេះ។ នេះជាការបញ្ជាក់របស់លោក អូន ព័ន្នមុនិរ័ត្ន ដែលបានឲ្យដឹងទៀតថា ក្នុងចំណោមជំនួយឥតសំណងនេះ ថវិកាចំនួន៤១លានដុល្លារ សម្រាប់ការងារប្រយុទ្ធប្រឆាំងជំងឺអេដស៍ និងថវិកាប្រមាណ១៣លានដុល្លារផ្សេងទៀត សម្រាប់ការងារប្រយុទ្ធនឹងជំងឺរបេង។ សម្រាប់លោក រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ថវិកាជំនួយនេះ នឹងជួយឲ្យកម្ពុជាសម្រេចបាននូវឌ្ឍនភាពថ្មីៗទៀត សម្រាប់រយៈពេលពីរឆ្នាំ គឺឆ្នាំ២០១៨ ដល់ឆ្នាំ២០២០។

តាមលោក អូន ព័ន្នមុនិរ័ត្ន នេះគឺជាគម្រោងទី១ហើយ ដែលមូលនិធិសកលបានឯកភាពទទួលយកប្រព័ន្ធប្រទេស(Country System) សម្រាប់គម្រោង។ ការដាក់ឲ្យប្រើប្រាស់ប្រព័ន្ធប្រទេសនេះ មិនត្រឹមតែជួយលើកកម្ពស់ប្រសិទ្ធភាពអនុវត្តគម្រោង និងពង្រឹងសមត្ថភាពទទួលខុសត្រូវរបស់ក្រសួង-ស្ថាប័ន អនុវត្តគម្រោងប៉ុណ្ណោះទេ តែថែមទាំងជាសក្ខីភាពបង្ហាញពីជំនឿទុកចិត្តកាន់តែរឹងមាំជាងមុនរបស់មូលនិធិសកល ចំពោះសមត្ថភាព និងភាពជាម្ចាស់របស់កម្ពុជា លើការគ្រប់គ្រងគម្រោងអភិវឌ្ឍថែមទៀត៕