ជាតិ
សម្ដេច ហ៊ុន សែន៖ ក្រុមក្បត់គ្រោងបំផ្ទុះនៅសៀមរាប និងភ្នំពេញ តែរដ្ឋាភិបាលទប់ស្កាត់បាន លោក សម សេរី ប្រធានចលនារណសិរ្យរំដោះជាតិខ្មែរ
× ភ្នំពេញ៖ រដ្ឋាភិបាល ប្រកាសជោគជ័យពីការទប់ស្កាត់ផែនការរបស់ក្រុមលោក សម សេរី ដែលប៉ុនប៉ងបំផ្ទុះគ្រាប់ នៅក្នុងរាជធានីភ្នំពេញ និងសៀមរាប។ លោក សម សេរី គឺជាប្រធានប្រធានចលនារណសិរ្សរំដោះជាតិខ្មែរ ដែលរដ្ឋាភិបាលចាត់ទុកជាក្រុមក្បត់ជាតិ។
ថ្លែងនៅក្នុងពិធីចែកសញ្ញាបត្រដល់និស្សិត នៃសាកលវិទ្យាល័យជាតិគ្រប់គ្រងនៅថ្ងៃទី១០ មេសានេះ សម្ដេចនាយករដ្ឋមន្ត្រី ហ៊ុន សែន បាននិយាយថា ក្រុមលោក សម សេរី នេះបានរៀបចំគម្រោងបំផ្ទុះគ្រាប់ នៅតំបន់វត្តភ្នំ និងខេត្តសៀមរាប នៅថ្ងៃទី១២ មេសា។ ប៉ុន្តែគម្រោងនេះ ត្រូវបានរដ្ឋាភិបាលដឹងមុន ហើយសម្ដេច ហ៊ុន សែន បានបញ្ជាឲ្យអាជ្ញាធរទប់ស្កាត់ស្ថានការណ៍ហើយ។
«នៅអឺរ៉ុប ប៉ុន្មានកន្លែងហើយប្រើឡានដេញបុកមនុស្សតែម្ដង ពួកភេរវកម្មគេមិនប្រើគ្រាប់បែកតទៅទៀតទេ។ ឯយើងមិនទាន់មានអ្វីកើតឡើងទេ ប៉ុន្តែយើងត្រូវខិតខំប្រឹងប្រែងទប់ស្កាត់ ។ យប់មិញខ្ញុំបានបញ្ចេញព័ត៌មានសម្ងាត់ ទៅឲ្យអភិបាលក្រុងក៏បានដឹងហើយ។ ខ្ញុំសូមប្រកាសផែនការលោកឯង ទាក់ទងបញ្ហានៅថ្ងៃ ១២ មេសា នៅវត្តភ្នំនោះ អ្នកឯងត្រូវប្រុងប្រយ័ត្ន ព្រោះខ្ញុំគ្រប់គ្រងសភាពការណ៍បានមុនហើយ។ អាហ្នឹង គឺមេក្បត់ជាតិឈ្មោះ សម សេរី កំពុងបញ្ជាឲ្យបង្កសកម្មភាពផ្ទុះ។ ខ្ញុំបានបញ្ជូនទៅផ្នែកពាក់ព័ន្ធហើយ …ប៉ុន្តែផែនការរបស់អ្នកឯង ខ្ញុំចាប់បានមុនទៅហើយ»។ នេះជាការបញ្ជាក់របស់សម្ដេច ហ៊ុន សែន។
បន្ថែមពីនេះប្រមុខរដ្ឋាភិបាល បានបញ្ជាឲ្យកម្លាំងប្រដាប់អាវុធទាំងអស់ ត្រូវត្រៀមខ្លួនជានិច្ច ក្នុងការការពារសន្តិសុខ សណ្ដាប់ធ្នាប់ដល់ប្រជាពលរដ្ឋ នាថ្ងៃចូលឆ្នាំខ្មែរនេះ។
គួរបញ្ជាក់ថា លោក សម សេរី គឺជាប្រធានចលនារណសិរ្សរំដោះជាតិខ្មែរ ដែលមានមូលដ្ឋាននៅប្រទេសដាណឺម៉ាក់ កាលពីឆ្នាំ២០១២ ។ លោក សម សេរី ធ្លាប់បញ្ជាក់ថា ការបង្កើតចលនានេះឡើង ដើម្បីតស៊ូ រំដោះប្រជាពលរដ្ឋខ្មែរពីអាណានិគមបែបថ្មីរបស់វៀតណាម និងរបបដឹកនាំរបស់នាយករដ្ឋមន្ត្រី ហ៊ុន សែន។ ប៉ុន្តែចលនារណសិរ្យរំដោះជាតិខ្មែរនេះ ត្រូវបានរដ្ឋាភិបាលកម្ពុជា ចាត់ទុកជាចលនាក្បត់ជាតិ។ រដ្ឋាភិបាល ក៏បានចាប់ខ្លួនសមាជិកចលនារណសិរ្យនេះប្រមាណ១០នាក់ កាលពីថ្ងៃ២៣ តុលា ឆ្នាំ២០១៤ នៅគ្រាដែលពួកគេចូលរួមធ្វើបាតុកម្មនៅមុខស្ថានទូតវៀតណាម ដោយដុតទង់ជាតិវៀតណាម៕
Tag:
ហ៊ុន សែន
ចូលឆ្នាំ
សម សេរី
© រក្សាសិទ្ធិដោយ thmeythmey.com