UCL៖ Pep រំពឹង Man City អាចធ្វើបាន ដូច Barca ទម្លាក់ PSG កាលពីរដូវកាលមុន

កីឡាអន្តរជាតិ

អន្តរជាតិ

UCL៖ Pep រំពឹង Man City អាចធ្វើបាន ដូច Barca ទម្លាក់ PSG កាលពីរដូវកាលមុន

10, Apr 2018 , 3:48 pm

រូបភាព

លោក Pep Guardiola គ្រូបង្វឹក Man City រំពឹងវាយបក Liverpool វិញ នៅជើងទីពីរ។ រូបថត AFP

ដោយ: ទេព ពិទូរ្យ

លោក Pep Guardiola អ្នកចាត់ការទូទៅ Manchester City បាននិយាយយ៉ាងមុតមាំថា «នៅក្នុងកីឡាបាល់ទាត់អ្វីៗក៏អាចកើតឡើងបានដែរ»។ លោកលើកឡើងបែបនេះ នៅមុនជំនួបរវាងក្រុមមេឃខៀវ និងហង្សក្រហម នៃពានរង្វាន់ UEFA Champions League ជើងទី២ វគ្គ១/៤ ផ្តាច់ព្រ័ត្រ ខណៈក្រុមដែលដឹកនាំដោយអ្នកចាត់អេស្ប៉ាញត្រូវតែយកឈ្នះលើ Liverpool ក្នុងលទ្ធផលលើសពី ៣-០ ឡើងទៅទើបអាចឈានទៅវគ្គបន្តបាន។

Manchester City នឹងបើកទ្វារកីឡដ្ឋាន Etihad ទទួលស្វាគមន៍ក្រុមភ្ញៀវ Liverpool វិញសម្រាប់ការប្រកួតជើងទី២ នារាត្រីថ្ងៃទី១០ ខែមេសា វេលាម៉ោង ១:៤៥ នាទី បន្ទាប់ពីបរាជ័យយ៉ាងធ្ងន់ធ្ងរក្នុងការប្រកួតជើងទី១ នៅទឹកដី Anfield រហូតដល់ ៣-០។

បើទោះយ៉ាងនេះក្តី លោក Guardiola នៅតែជឿជាក់លើកូនក្រុមរបស់ខ្លួនថានឹងអាចវាយបកយកឈ្នះក្រុមរបស់លោក Juergen Klopp នៅជើងទី២នេះបាន ដោយលើកឡើងថា «នៅក្នុងកីឡាបាល់ទាត់អ្វីៗក៏អាចកើតឡើងបានដែរ»។ នេះបើតាមការផ្សាយរបស់ DailyMail។

អ្នកចាត់ការសញ្ជាតិអេស្ប៉ាញវ័យ៤៧ឆ្នាំរូបនេះ ក៏បានលើកឧទាហរណ៍មករំលឹកកាលពី Barcelona វាយបកយកឈ្នះ Paris St Germain វគ្គ ១/៤ ជើងទី២ កាលពីរដូវកាលមុនរហូតដល់ទៅ ៦-១ វិញ បើទោះបីក្រុមយក្សបារាំងរកបានគ្រាប់បាល់ ៤-០ លើក្រុមយក្សអេស្ប៉ាញនៅជើងទី១ក្តី។

យ៉ាងណាក៏ដោយ អ្នកចាត់ការក្រុមហង្សក្រហម Liverpool លោក Klopp ក៏បានផ្តល់កំលាំងចិត្ត និងជំរុញឲ្យកូនក្រុមខ្លួនលេងឲ្យបានល្អដូចកាលជើងទី១ ដោយមិនមើលស្រាលគូប្រជែងនៅជើងទី២នេះឡើយ ហើយធ្វើយ៉ាងដើម្បីរកគ្រាប់បាល់បន្ថែមទៀត៕