អន្តរជាតិ
ក្រោយស្ងាត់មិននិយាយអ្វីសោះ កូរ៉េខាងជើងចាប់ផ្ដើមពិភាក្សាពីជំនួបជាមួយអាមេរិក រូបភាព AFP
× មេដឹកនាំកំពូលកូរ៉េខាងជើង គីម ជុងអ៊ុន បានជជែកពីគម្រោងជំនួបជាមួយមេដឹកនាំកូរ៉េខាងត្បូង និងប្រធានាធិបតីអាមេរិកក្នុងកិច្ចប្រជុំផ្ទៃក្នុងបក្សពលករកូរ៉េខាងជើង។ នេះជាលើកដំបូងដែលមេដឹកនាំកូរ៉េខាងជើងបានលើកឡើងពីគម្រោងនៃការជួបជាមួយប្រទេសទាំងពីរនេះ។ លោក គីម ជុងអ៊ុន បានរាយការណ៍ពីស្ថានភាពបច្ចុប្បន្ននៅឧបទ្វីបកូរ៉េដែលមានការវិវត្តជាវិជ្ជមានជាបន្តបន្ទាប់ ខណៈលោក ដូណាល់ ត្រាំ រំពឹងថា ទំនាក់ទំនងអាមេរិក និងកូរ៉េខាងជើងនឹងខុសពីឆ្នាំមុនៗ។
បន្ទាប់ពីស្ងាត់មិននិយាយអ្វីជាយូរមក កូរ៉េខាងជើងបាននិយាយជាលើកដំបូងពាក់ព័ន្ធជំនួបប្រវត្តិសាស្ត្រជាមួយអាមេរិក។ ប្រជុំការិយាល័យនយោបាយរបស់បក្សពលករកូរ៉េខាងជើងនៅថ្ងៃទី៩ ខែមេសា បានពិភាក្សាពីដំណើរការទៅមុខនៃទំនាក់ទំនងកូរ៉េខាងជើង និងកូរ៉េខាងត្បូង ក៏ដូចជាលទ្ធភាពនៃការជួបគ្នារវាងលោក គីម ជុងអ៊ុន និងប្រធានាធិបតីអាមេរិក ដូណាល់ ត្រាំ នៅដំណាច់ខែឧសភាខាងមុខ។
យោងតាមទីភ្នាក់ងារព័ត៌មានរដ្ឋកូរ៉េខាងជើង KCNA លោក គីម ជុងអ៊ុន បានរាយការណ៍ស៊ីជម្រៅពីស្ថានភាពនៅឧបទ្វីបកូរ៉េ និងជំនួបរវាងលោក និងលោក ត្រាំ ។ មេដឹកនាំកូរ៉េខាងជើងក៏និយាយយ៉ាងលម្អិតពីជំនួបជាមួយប្រធានាធិបតីកូរ៉េខាងត្បូង មូន ចេអ៊ីន នៅតំបន់គ្មានកងទ័ពខណ្ឌចែកកូរ៉េទាំងពីរផង។ បើតាម KCNA ក្នុងកិច្ចប្រជុំលើកនេះ លោក គីម បានដាក់ចេញនយោបាយការបរទេសថ្មីរបស់បក្សពលករ និងការដោះស្រាយដែលកើតឡើង។
តាមរយៈស្ថានការធូរស្រាលនៅឧបទ្វីបកូរ៉េ មេដឹកនាំកូរ៉េខាងជើងបានយល់ព្រមជួបជាមួយមេដឹកនាំកូរ៉េខាងត្បូង និងអាមេរិកជាបន្តបន្ទាប់។ លោក គីម នឹងជួបជាមួយលោក មូន នៅថ្ងៃទី២៧ ខែមេសា នៅអាគារសន្តិភាព ភាគខាងត្បូងខ្សែព្រំដែន។ ចំណែកឯជំនួបជាមួយលោក ត្រាំ ស្ថិតនៅដំណាក់កាលចរចានៅឡើយ ស្របពេលដែលទីតាំង និងពេលវេលាជាក់លាក់នៅមិនទាន់កំណត់នៅឡើយ។ មន្ត្រីប្រទេសទាំងពីរបានជួបគ្នាជាច្រើនលើកដើម្បីរៀបចំជំនួបនេះ។
ការលើកឡើងជាលើកទីមួយរបស់មេដឹកនាំកូរ៉េខាងជើងជុំវិញជំនួបជាមួយលោក ត្រាំ កាន់តែធ្វើឲ្យលទ្ធភាពនៃជំនួបនេះលេចឡើងកាន់តែច្បាស់ខ្លាំង។ ភាពស្ងប់ស្ងាត់កន្លងមក ធ្វើឲ្យមានការបារម្ភថា កូរ៉េខាងជើងមានជំហរមិនទាន់ច្បាស់លាស់លើជំនួបនេះ ឬមិនចង់ចរចាជាមួយអាមេរិកតែម្ដង ទើបមិនទាន់និយាយអ្វីសោះ ហើយនេះខុសពីអាមេរិកដែលប្រឹងប្រែងរៀបចំខ្លួនជាស្រេចសម្រាប់ការជួបគ្នាលើកដំបូង។
ជំនួបលើកដំបូងរវាងលោក ត្រាំ និងលោក គីម នឹងផ្ដោតសំខាន់លើការលុបបំបាត់នុយក្លេអ៊ែរពីឧបទ្វីបកូរ៉េ។ ជារឿងមិនធ្លាប់មាន កូរ៉េខាងជើងបានប្រកាសជាម្ដងហើយម្ដងទៀតថា ខ្លួនមានឆន្ទៈរំសាយនុយក្លេអ៊ែររបស់ខ្លួន និងថា នេះជាជំហរឥតប្រែប្រួលរបស់ខ្លួនទៀតផង។ ជំហររបស់កូរ៉េខាងជើង គឺជាអ្វីដែលអាមេរិកចង់បានជាច្រើនឆ្នាំមកនេះ ប៉ុន្តែការចរចាលើកដំបូងនេះមិនប្រាកដថា ទទួលបានលទ្ធផលតាមការចង់បានឡើយ៕
Tag:
អាមេរិក
កូរ៉េខាងជើង
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com