អន្តរជាតិ
ទូតអាមេរិក៖ អាមេរិកនឹងចាត់វិធានការឆ្លើយតបនឹងការប្រើអាវុធគីមីនៅស៊ីរី ទោះមានឬគ្មាន UN
× ក្នុងក្រុមប្រឹក្សាសន្តិសុខអង្គការសហប្រជាជាតិ ឯកអគ្គរដ្ឋទូតអាមេរិកលោកស្រី Nikki Haley ថ្ងៃចន្ទ ទី៩ មេសា បានថ្កោលទោសស៊ីរី និងសម្ព័ន្ធមិត្តរុស្ស៊ី និងអ៊ីរ៉ង់ពាក់ព័ន្ធការប្រើប្រាស់អាវុធគីមីនៅក្រុង ឌូម៉ា (Douma)។ លោកស្រីព្រមានផងដែរ ទោះមានឬគ្មានអង្គការសហប្រជាជាតិក៏ដោយ អាមេរិកនឹងចាត់វិធានការប្រឆាំងអំពើព្រៃផ្សៃនេះដោយឯកតោភាគី។ លោក ដូណាល់ ត្រាំឯណោះវិញក៏បានប្រកាសដែរថា លោកនឹងសម្រេចចិត្តថាគួរប្រើប្រាស់វិធានការបែបណាប្រឆាំងរបបដឹកនាំស៊ីរីក្នុងរយៈពេល ២៤ទៅ៤៨ម៉ោងទៀត។
ព័ត៌មានជុំវិញការប្រើប្រាស់អាវុធគីមីជាថ្មីនៅស៊ីរី ដាស់សមាជិកក្រុមប្រឹក្សាសន្តិសុខឲ្យជួបប្រជុំគ្នាជាថ្មីនៅថ្ងៃចន្ទទី ៩មេសា ដើម្បីពិភាក្សា និងរកដំណោះស្រាយ។ ប៉ុន្តែវេទិកានេះច្រើនតែក្លាយជាកន្លែងដៀលគ្នារវាងមហាអំណាចច្រើនជាងរកដំណោះស្រាយពិតប្រាកដ។
ក្នុងកិច្ចប្រជុំបន្ទាន់នេះ លោកស្រីឯកអគ្គរដ្ឋទូតអាមេរិកប្រចាំក្រុមប្រឹក្សាសន្តិសុខ Nikki Haley បានឆ្លៀតឱកាសវាយប្រហាររបបដឹកនាំស៊ីរី រុស្ស៊ី និងអ៊ីរ៉ង់មិនសំចៃមាត់។ មន្ត្រីទូតរូបនេះចោទប្រកាន់ និងចាត់ទុករបបដឹកនាំស៊ីរីជាបីសាចដែលប្រើប្រាស់អាវុធគីមីប្រឆាំងជនស៊ីវិលគ្មានអាវុធផង។
បន្ថែមពីលើការរិះគន់ តំណាងអាមេរិករូបនេះបានប្រកាសប្រាប់អង្គប្រជុំទាំងមូលថា អាមេរិកចង់ឲ្យក្រុមប្រឹក្សាសន្តិសុខទទួលយកសេចក្តីព្រាងដំណោះស្រាយរបស់ខ្លួនដែលវាមានគោលដៅបង្កើតការស៊ើបអង្កេតមួយដើម្បីស្វែងរកឲ្យឃើញថា អ្នកណាប្រើប្រាស់អាវុធនេះ។
តែលោកស្រី Haley ក៏សង្កេត់ធ្ងន់ផងដែរថា អាមេរិកមិនរារែកនឹងឆ្លើយតបចំពោះការប្រើប្រាស់អាវុធគីមីនេះឡើយ ហើយអាមេរិកក៏មិនខ្វល់ថា ក្រុមប្រឹក្សាសន្តិសុខអង្គការសហប្រជាជាតិយល់ស្របឬអត់ឡើយចំពោះចំណាត់ការខ្លួន។ ការបរាជ័យរបស់ក្រុមប្រឹក្សាសន្តិសុខក្នុងការទប់ស្កាត់ការប្រើប្រាស់អាវុធគីមី ប្រៀបបីដូចជាអនុញ្ញាតឲ្យមានការប្រើប្រាស់អាវុធហាមឃាត់នេះបន្តទៀតដែរ។
«ប្រវត្តិសាស្ត្រនឹងកត់ចំណាត់បញ្ហានេះ នៅពេលដែលក្រុមប្រឹក្សាសនិ្តសុខមិនអនុវត្តតួនាទីរបស់ខ្លួន និងបង្ហាញឲ្យឃើញថា ខ្លួនមិនមានលទ្ធភាពក្នុងការការពារជនស៊ីវិលនៅស៊ីរីនោះ។ ទោះយ៉ាងណាក៏ដោយ អាមេរិកនឹងឆ្លើយតបចំពោះបញ្ហានេះ។ យើងដល់ដំណាក់កាលមួយដែលពិភពលោកអាចមើលឃើញពីវីធីនៃការសម្រេចឲ្យបាននូវយុត្តិធម៌»។ លោកស្រី Haley ប្រកាសបែបនេះ។
ដោយឡែក ប្រធានាធិបតី ដូណាល់ ត្រាំ វិញក៏បានប្រជុំគណៈរដ្ឋមន្ត្រី និងថ្កោលទោសរដ្ឋាភិបាលស៊ីរីរឿងប្រើប្រាស់អាវុធគីមីនេះដែរ។ ក្នុងកិច្ចប្រជុំថ្ងៃ ចន្ទទី ៩ មេសានោះ លោក ត្រាំ បានប្រកាសប្រាប់អ្នកសារព័ត៌មានថា លោកនឹងសម្រេចចិត្តលើវិធានការតឹងរ៉ឹងដើម្បីតបតនឹងការប្រើប្រាស់អាវុធគីមីនេះក្នុងរយៈពេល ២៤ ឬ៤៨ ម៉ោងទៀត។ គេមិនទាន់ដឹងច្បាស់ថា អាមេរិកនឹងប្រើប្រាស់វិធានការអ្វីឲ្យពិតប្រាកដឡើយ តែគេរំពឹងថា លោកនឹងប្រើប្រាស់ការផ្លោងមីស៊ីលដូចកាលពីឆ្នាំមុនដូច្នេះដែរដើម្បីគំរាមរបបដឹកនាំអាសាដជាថ្មីទៀត៕
Tag:
Nikki Haly
អាមេរិក
ស៊ីរី
អាវុធគីមី
UNSC
© រក្សាសិទ្ធិដោយ thmeythmey.com