កីឡាជាតិ
ជាតិ
បឹងកេតស្វាគមន៍ Ceres Negros ល្ងាចនេះ ដោយគ្មានវត្តមាន Gbenga
× ក្រុមបឹងកេត បើកទ្វារពហុកីឡដ្ឋានជាតិទទួលស្វាគមន៍ក្រុមភ្ញៀវ Ceres-Negros របស់ហ្វីលីពីន នាការប្រកួតវគ្គជម្រុះពូល F នៃពានរង្វាន់ AFC Cup 2018 នាម៉ោង៦:៣០នាទីល្ងាចថ្ងៃពុធ ទី១១ ខែមេសា ឆ្នាំ២០១៨។ ខ្សែប្រយុទ្ធនីហ្សេរីយ៉ា Gbenga Samuel មិនអាចជួយក្រុមបឹងកេតសងសឹក Cere Negros នៅល្ងាចនេះបានទេ ក្រោយរូបគេជាប់បម្រាម។ ការអវត្តមានរបស់ Gbenga បានក្លាយជាក្តីកង្វល់សម្រាប់គ្រូបង្វឹកបឹងកេត ក្នុងការតតាំងជាមួយជើងខ្លាំងរបស់ហ្វីលីពីនផងដែរ។
ខ្សែប្រយុទ្ធនីហ្សេរីយ៉ា Gbenga Samuel Ajayi នឹងគ្មានវត្តមានជាមួយក្រុមបឹងកេតក្នុងជំនួបសងសឹកក្រុម Ceres Negros របស់ហ្វីលីពីននៅល្ងាចនេះ បន្ទាប់ពីរូបគេជាប់ពិន័យកាតក្រហមក្នុងជំនួបជាមួយ Home United របស់សិង្ហបុរី កាលពីថ្ងៃទី១៤ ខែមីនា ក្រោយប៉ះទង្គិចជាមួយខ្សែការពារ Juma'at Jantan។
លោក កែវ កុសល គ្រូបង្វឹកក្រុមបឹងកេតបាននិយាយថា ការអវត្តមានខ្សែប្រយុទ្ធល្បឿនលឿនខាងលើ វាអាចបង្កផលប៉ះពាល់សម្រាប់បឹងកេតផងដែរ ក្នុងជំនួបដ៏សំខាន់ដែលបឹងកេតត្រូវការឈ្នះ ដើម្បីផ្គាប់ចិត្តអ្នកគាំទ្រមួយនេះ។ ក្នុងសន្និសីទសារព័ត៌មានមុនការប្រកួតកាលពីល្ងាចថ្ងៃទី១០ មេសា គ្រូបង្វឹករូបនេះបានរៀបរាប់យ៉ាងដូច្នេះថា៖«ការបាត់បង់ Gbeng នៅក្នុងការប្រកួតដ៏តានតឹងមួយនេះ វាអាចប៉ះពាល់ដល់ការលេងរបស់យើងខ្លះដែរ តែយើងមានកីឡាករ ឃួន ឡាបូរ៉ាវី ដើម្បីជំនួសទីតាំងរបស់គាត់ហើយ។ និយាយរួមយើងមានកីឡាករប៉ុន្មាន យើងត្រូវប្រឹងប្រែងលេងឲ្យអស់ទៅតាមហ្នឹង»។
ជាមួយគ្នានេះ លោក កែវ កុសល ជំរុញឲ្យកីឡាករទាំងអស់ត្រូវចេះសាមគ្គីក្នុងក្រុម និងប្រឹងប្រែងលេងឲ្យអស់ពីសមត្ថភាព ដើម្បីបង្ហាញទម្រង់លេងមួយដ៏ល្អសម្រាប់ទស្សនិកកម្ពុជា។ លោករំពឹងថា បឹងកេតនឹងធ្វើបានល្អជាងជំនួបទី១ សម្រាប់ការប្រកួតជើងទី២ល្ងាចនេះ។
លោកបានបន្ថែមថា៖««ខ្ញុំគិតថា ការជាមួយ Ceres-Negros ជាការប្រកួតមួយដ៏លំបាក ព្រោះ Ceres Negros ជាក្រុមខ្លាំង ដែលកំពុងឈរលេខ១ក្នុងពូល។ ពួកគេសម្បូរកីឡាករល្អៗ ដែលទាមទារឲ្យក្រុមយើង ត្រូវប្រឹងប្រែងឲ្យបានខ្លាំង ព្រោះវានៅលើទឹកដីរបស់យើង ដើម្បីអ្នកគាំទ្រ និងបង្ហាញពីទម្រង់លេងរបស់យើង»។
លោក កែវ កុសល ត្រូវដឹកនាំក្រុមបឹងកេត តទល់ជាមួយក្រុម Ceres Negros របស់ហ្វីលីពីនសម្រាប់ជំនួបវគ្គជម្រុះពានរង្វាន់ AFC Cup 2018 ជើងទី២ប្រចាំពូល F នាម៉ោង៦:៣០នាទីល្ងាចថ្ងៃទី១១ មេសា ឆ្នាំ២០១៨ នៅពហុកីឡដ្ឋានជាតិ។ នាការប្រកួតជើងទី១នៅលើទឹកដីហ្វីលីពីន កាលពីថ្ងៃទី១៣ ខែកុម្ភៈ ឆ្នាំ២០១៨ បឹងកេតបានប្រកួតចាញ់ក្រុម Ceres Negros ក្នុងលទ្ធផល ៩-០។ ចំណែកក្រុមម្ចាស់ផ្ទះសិង្ហបុរី Home United បើកទ្វារកីឡដ្ឋាន Jalan Besar Stadium ស្វាគមន៍ Shan United របស់មីយ៉ាន់ម៉ានៅម៉ោង៦:៣០នាទីល្ងាចដូចគ្នា(ម៉ោងកម្ពុជា)៕
Tag:
បាល់ទាត់
AFC Cup 2018
កែវ កុសល
© រក្សាសិទ្ធិដោយ thmeythmey.com