អន្តរជាតិ
អាសាដ និងគ្រួសារមិនបានភៀសខ្លួនពីស៊ីរីឡើយ ទោះលោកខាងលិចអាចនឹងចូលអន្តរាគមន៍យោធាក៏ដោយ
× ខណៈដែលអាមេរិក និងសម្ព័ន្ធមិត្តត្រៀមចាត់វិធានការប្រឆាំងរដ្ឋាភិបាលស៊ីរីដោយចោទប្រកាន់ថារបបនេះបានប្រើអាវុធគីមីនោះ វាមានព័ត៌មានថា មេដឹកនាំស៊ីរី និងក្រុមគ្រួសារបានភៀសខ្លួនទៅកាន់ទឹកដីអ៊ីរ៉ង់រួចទៅហើយ។ ប៉ុន្តែប្រភពស្និទ្ធនឹងប្រធានាធិបតីបាសា អាល់អាសាដ បានប្រាប់សារព័ត៌មានរុស្ស៊ី Sputnik ថា លោក អាសាដ និងគ្រួសារ មិនបានចាកចេញពីស៊ីរីឡើយ។
សារព័ត៌មានរុស្ស៊ី Sputnik បានស្រង់ប្រភពច្បាស់ការមួយថា ប្រធានាធិបតី បាសា អាល់អាសាដ និងក្រុមគ្រួសារមិនបានភៀសខ្លួនទៅកាន់ប្រទេសអ៊ីរ៉ង់ដើម្បីរកន្លែងមានសុវត្ថិភាពឡើយ បើទោះជាមានការបារម្ភថា អាមេរិក និងសម្ព័ន្ធមិត្តអាចនឹងប្រើប្រាស់អន្តរាគមន៍យោធានៅពេលខាងមុខក្តី។
មកដល់បច្ចុប្បន្ន លោក អាសាដ នៅបន្តរស់នៅស៊ីរី នៅឡើយ ហើយគេមិនទាន់ដឹងច្បាស់ថា អាមេរិក រួមជាមួយសម្ព័ន្ធមិត្តបារាំង និងអង់គ្លេសនឹងចាត់វិធានការបែបណាឡើយ។ ប៉ុន្តែកន្លងមកលោក ដូណាល់ ត្រាំ និងលោក អេម៉ានុយអែល ម៉ាក្រុង សន្យាដាក់ចំណាត់ការតឹងរ៉ឹងដើម្បីឆ្លើយតបនឹងការប្រើប្រាស់អាវុធគីមីនេះ។
អ្នកនាំពាក្យក្រសួងការបរទេសអាមេរិកបានថ្លែងដូច្នេះ៖« ប្រធានាធិបតី ត្រាំ និងក្រុមសន្តិសុខជាតិកំពុងប្រឹក្សាយោបល់គ្នាយ៉ាងយកចិត្តទុកដាក់ជាមួយបណ្តាសម្ព័ន្ធមិត្ត និងដៃគូដើម្បីកំណត់យកវិធានការសមរម្យមួយ»។
ខណៈដែលស្ថានការណ៍កាន់តែតានតឹង ទីភ្នាក់ងារសន្តិសុខផ្លូវអាកាសអឺរ៉ុបបានផ្តល់ដំណឹងឲ្យមានការប្រុងប្រយ័ត្នចំពោះការហោះហើរនៅតំបន់ភាកខាងកើតតំបន់មេឌីទែរ៉ាណេ ព្រោះវាអាចនឹងមានការវាយប្រហារដោយការផ្លោងមីស៊ីលលើទឹកដីស៊ីរីនៅក្នុងរយៈពេលប្រហែល ៧២ ម៉ោងទៀតនោះ។
ទោះបីជាគេមិនទាន់ដឹងថា អាមេរិកនឹងដាក់ចេញវិធានការបែបនេះក៏ដោយ គេរំពឹងថា លោកទំនងជានឹងប្រើប្រាស់ការវាយប្រហារតាមផ្លូវអាកាសដូចឆ្នាំមុន ព្រោះវាមិនសូវគ្រោះថ្នាក់។ គេចាំបានថា កាលពីឆ្នាំមុន ក្រោយមានការចោទប្រកាន់ថា ស៊ីរីបានប្រើប្រាស់អាវុធគីមី លោក ត្រាំ បានចេញបញ្ជាឲ្យកម្លាំងអាមេរិកបាញ់ផ្លោងមីស៊ីល Tomahawk ចំនួន ៥៩គ្រាប់ស្រោចលើមូលដ្ឋានទ័ពអាកាសនៅក្រុង Homs ។
ពាក់ព័ន្ធនឹងការប្រើប្រាស់កម្លាំងទ័ពប្រឆាំងរបបស៊ីរីនេះ រុស្ស៊ី បានព្រមានជាស្រេចហើយ ហើយមហាអំណាចមួយនេះសន្យាឆ្លើយតបវិញរាល់សកម្មភាពខុសច្បាប់នានារបស់លោកខាងលិចនៅស៊ីរី ក្នុងកាលៈទេសៈចាំបាច់។ ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិលោក Vassily Nebenzya បានព្រមានក្នុងក្រុមប្រឹក្សាសន្តិសុខនាថ្ងៃអង្គារទី ១០ មេសា ថាអាមេរិកនឹងត្រូវរ៉ាប់រង និងទទួលខុសត្រូវ បើសិនជាមហាអំណាចនេះហ៊ានបង្កើតសកម្មភាពយោធាខុសច្បាប់ប្រឆាំងស៊ីរីមែននោះ។ វានៅស្រពេចស្រពិលថា តើរុស្ស៊ីនឹងឆ្លើយតបបែបណា ប៉ុន្តែគេដឹងថា រុស្ស៊ីមានខែលការពារមីស៊ីលច្រើនគ្រឿងឈរជើងនៅស៊ីរីតាំងពីឆ្នាំ ២០១៥មកម្ល៉េះ។ វាក្លាយជាគ្រោះថ្នាក់ធំបំផុតសម្រាប់ លោកខាងលិចបើសិនជាពួកគេចង់ប្រើប្រាស់យន្តហោះចម្បាំងទម្លាក់គ្រាប់បែកនៅស៊ីរីនោះ៕
Tag:
ស៊ីរី
បាសា អាល់អាសាដ
អាមេរិក
រុស្ស៊ី
អ៊ីរ៉ង់
អាវុធគីមី
© រក្សាសិទ្ធិដោយ thmeythmey.com