ជាតិ
ខ្សែរថភ្លើងទៅអាកាសយានដ្ឋានអន្តរជាតិភ្នំពេញ បានដាក់ដំណើរការបណ្តោះអាសន្ន រូបពីហ្វេសប៊ុកក្រសួងសាធារណៈការ និងដឹកជញ្ជូន
× ភ្នំពេញ៖ ខ្សែរថភ្លើងលើផ្លូវ (Tramway) ក្នុងរាជធានីភ្នំពេញ ទៅកាន់អាកាសយានអន្តរជាតិភ្នំពេញ ត្រូវបានដាក់ឲ្យប្រើប្រាស់ជាបណ្តោះអាសន្ន ចាប់ពីថ្ងៃទី១០ ខែមេសា ដល់ថ្ងៃទី១ ខែសីហា ឆ្នាំ២០១៨ ដោយឥតគិតប្រាក់។
ថ្លែងក្នុងពិធីដាក់ឲ្យប្រើប្រាស់រថភ្លើង រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បាននិយាយថា សេវាដឹកជញ្ជូនតាមរថភ្លើងនេះ ប្រើប្រាស់ពេលវេលាប្រមាណ ២២ទៅ២៥នាទី ពីស្ថានីយរថភ្លើងភ្នំពេញ ទៅកាន់អាកាសយានដ្ឋានអន្តរជាតិភ្នំពេញ ដោយឆ្លងកាត់កំណាត់ផ្លូវសហព័ន្ធរុស្សី ចូលអាកាសយានដ្ឋានអន្តរជាតិភ្នំពេញតែម្តង។
បើតាមលោក ស៊ុន ចាន់ថុល ការរៀបចំសេវាដឹកជញ្ជូនតាមរថភ្លើងនេះ ដើម្បីសម្រួលដំណើររបស់ប្រជាពលរដ្ឋ ដែលមានបំណងទៅព្រលានយន្តហោះ ក៏ដូចជាកាត់បន្ថយការស្ទះចរាចរណ៍លើដងផ្លូវ។ ជាពិសេសវា ក៏ជាចំណែកទាក់ទាញភ្ញៀវទេសចរផងដែរ។
សូមរំលឹកថា កាលពីថ្ងៃទី ៤ មេសាកន្លងទៅ ក្រសួងសាធារណការ និងដឹកជញ្ចូន ក៏បានដាក់ឲ្យដំណើរការជាបណ្ដោះអាសន្ននូវកំណាត់ផ្លូវរថភ្លើងពីក្រុងប៉ោយប៉ែត-សិរីសោភ័ណ ក្នុងខេត្តបន្ទាយមានជ័យ ដោយឥតគិតថ្លៃផងដែរ ចាប់តាំងពី ថ្ងៃទី៤ មេសា ដល់ថ្ងៃទី ១ សីហា ឆ្នាំ២០១៨៕
© រក្សាសិទ្ធិដោយ thmeythmey.com