លោក ស៊ិក ប៊ុនហុក៖ មិនខុសច្បាប់ឡើយ ទោះគ្មានបក្សប្រឆាំង គ្មានអ្នកសង្កេតការណ៍ និងអ្នកបោះឆ្នោតតិច

ជាតិ

នយោបាយជាតិ

លោក ស៊ិក ប៊ុនហុក៖ មិនខុសច្បាប់ឡើយ ទោះគ្មានបក្សប្រឆាំង គ្មានអ្នកសង្កេតការណ៍ និងអ្នកបោះឆ្នោតតិច

11, Apr 2018 , 5:34 pm

រូបភាព

លោក ស៊ិក ប៊ុនហុក ប្រធានគ.ជ.ប. ស្ថិតក្នុងកិច្ចប្រជុំជាមួយភាគីពាក់ព័ន្ធ កាលពីថ្ងៃទី១០ ខែមេសា ឆ្នាំ២០១៨។ រូបពីគ.ជ.ប.

ដោយ: ថ្មីៗ

ភ្នំពេញ៖ ការបោះឆ្នោត មិនអាចខុសច្បាប់ឡើយ បើទោះបីជាអវត្តមានរបស់បក្សប្រឆាំង ហើយសង្គមស៊ីវិល មិនបានចូលរួមសង្កេតការណ៍ រួមទាំងអ្នកបោះឆ្នោត មានចំនួនតិចក្តី។ នេះជាការបញ្ជាក់សាជាថ្មីម្តងទៀតរបស់ គ.ជ.ប. បន្ទាប់ពីមានការលើកឡើងជាញឹកញាប់ថា ការបោះឆ្នោតខាងមុខ នឹងមិនស្របច្បាប់ បើបាត់បក្សប្រឆាំង ហើយអ្នកបោះឆ្នោត មានចំនួនតិច។

មួយរយៈចុងក្រោយនេះ គណៈកម្មាធិការជាតិរៀបចំការបោះឆ្នោត (គ.ជ.ប.) ដែលមានលោក ស៊ិក ប៊ុនហុក អ្នកជំនាញផ្នែកច្បាប់មួយរូប ជាប្រធាន បានព្យាយាមបកស្រាយជាច្រើនលើកច្រើនសា ជុំវិញភាពស្របច្បាប់នៃការបោះឆ្នោតនាពេលខាងមុខ។ ការបកស្រាយរបស់គ.ជ.ប. ជាទូទៅ គឺមានលក្ខណៈបញ្ច្រាស់ពីមតិរិះគន់របស់មជ្ឈដ្ឋានមួយចំនួន រួមទាំងសហគមន៍អន្តរជាតិផងដែរ ដែលយល់ថា ការបោះឆ្នោតនៅកម្ពុជា នឹងមិនស្របច្បាប់ ហើយក៏មិនប្រព្រឹត្តទៅតាមគន្លងប្រជាធិបតេយ្យដែរ បើអវត្តមានរបស់គណបក្សសង្គ្រោះជាតិ។

ក្នុងកិច្ចប្រជុំមួយជាមួយភាគីពាក់ព័ន្ធ កាលពីថ្ងៃទី១០ ខែមេសា ឆ្នាំ២០១៨ លោក ស៊ិក ប៊ុនហុក ប្រធានគ.ជ.ប. បានពន្យល់ម្តងទៀត អំពីការបោះឆ្នោត ដោយលើកយកច្បាប់មកធ្វើជាអំណះអំណាង។ លោក សង្កត់ធ្ងន់ថា ការបោះឆ្នោត នឹងមិនខុសច្បាប់ឡើយ បើទោះបីជាមិនមានការចូលរួមពីគណបក្សសង្គ្រោះជាតិ ហើយសមាគម និងអង្គការក្រៅរដ្ឋាភិបាល មិនបានចូលរួមឃ្លាំមើល។

ប្រធានគ.ជ.ប. បានលើកឡើងយ៉ាងដូច្នេះថា៖«គ្មានការបែងចែកគណបក្សតូច ឬគណបក្សធំ គណបក្សកាន់អំណាច ឬគណបក្សប្រឆាំងឡើយ។ គណបក្សទាំងអស់ មានសិទ្ធិស្មើៗគ្នា ក្នុងការឈរឈ្មោះបោះឆ្នោត។ ច្បាប់ មិនបានចែងថា ទាល់តែមានគណបក្សសង្គ្រោះជាតិ ទើបការបោះឆ្នោត ត្រឹមត្រូវនោះទេ។ ហើយច្បាប់ ក៏មិនបានសំដៅថា ទាល់តែមានអ្នកសង្កេតការណ៍ ទើបការបោះឆ្នោត អាចទទួលយកបានដែរ»។

លោក ស៊ិក ប៊ុនហុក បន្ថែមថា បើប្រជាពលរដ្ឋ ដែលទៅបោះឆ្នោត មានចំនួនតិចមែន ក៏ការបោះឆ្នោត នៅតែអាចចាត់ទុកថា បានការដដែល។ លោក លើកហេតុផលបែបនេះថា៖«ការចេញទៅបោះឆ្នោត ឬមិនចេញទៅបោះឆ្នោត គឺជាសិទ្ធិរបស់ប្រជាពលរដ្ឋ។ គ្មានប្រទេសណាមួយ ហើយក៏គ្មានរដ្ឋធម្មនុញ្ញណា ចែងថា អត្រានៃអ្នកបោះឆ្នោត មានចំនួនតិច ឈានទៅដល់ការលុបចោលនូវការបោះឆ្នោតនោះទេ»។

ប្រសាសន៍របស់លោក ស៊ិក ប៊ុនហុក ដែលថ្លែងក្នុងកិច្ចប្រជុំខាងលើ ត្រូវបានមន្ត្រីគ.ជ.ប. ស្រង់យកទៅសរសេរក្នុងសេចក្តីប្រកាសព័ត៌មាន ហើយផ្សព្វផ្សាយជាសាធារណៈ។ តាមរយៈសេចក្តីប្រកាសព័ត៌មាន គ.ជ.ប. បានប្តេជ្ញាយ៉ាងដូច្នេះថា៖«គ.ជ.ប. នៅតែបន្តការងាររបស់ខ្លួនជាមួយភាគីពាក់ព័ន្ធ ក្នុងដំណើរឆ្ពោះទៅកាន់ការបោះឆ្នោតសកលលើកទី៦ នៅថ្ងៃទី២៩ ខែកក្កដា ឆ្នាំ២០១៨ ប្រកបដោយភាពជោគជ័យ»៕