ភ្នំពេញ៖ក្រោយពីការបោះឆ្នោតអាណត្តិទី៥នេះ បញ្ហានយោបាយបានផ្ទុះឡើងដោយឥតស្រាកស្រាន្ត រហូតដល់ មានការឃុំខ្លួនមេបក្សនយោបាយ ការរំលាយអតីតគណបក្សសង្គ្រោះជាតិ និងហាមសកម្មភាពមន្ត្រីនយោបាយ១០៨នាក់។ បញ្ហាទាំងនេះ បានបង្កក្តីព្រួយបារម្ភដល់ប្រជាពលរដ្ឋ និងអ្នកតាមដានស្ថានការណ៍នយោបាយ។ ពួកគេស្នើឲ្យអ្នកនយោបាយ ពិចារណារកច្រកចេញពីផ្លូវជម្លោះនយោបាយ ដើម្បីងាកមកដំណោះស្រាយបញ្ហាជាតិ ល្អជាងគិតពីផលប្រយោជន៍ផ្ទាល់ខ្លួន។
ប្រជាពលរដ្ឋដែលបានតាមដានបញ្ហានយោបាយ ចាត់ទុកថា ការឃាត់ខ្លួនអ្នកនយោបាយ និរំលាយគណបក្សប្រឆាំង កើតឡើងដោយសារតែចរិតអ្នកនយោបាយមិនទាន់មានភាពចាស់ទុំ។ ពួកគេមិនចង់ឃើញអ្នកនយោបាយប្រជែងគ្នាកាន់អំណាចក្រោមរូបភាពអាក្រក់ ដែលផ្ដល់គំរូមិនល្អដល់ក្មេងជំនាន់ក្រោយនោះដែរ។ លោក វិបុល ជាពលរដ្ឋដែលតាមដានរឿងនយោបាយនោះ ស្នើឲ្យអ្នកនយោបាយរកដំណោះស្រាយនយោបាយ តាមរយៈការចរចា និងវប្បធម៌សន្ទនាវិញ ដើម្បីការអភិវឌ្ឍប្រទេសជាតិ។
«ខ្ញុំចង់ឃើញអ្នកនយោបាយមានគំនិតចាស់ទុំជាងមុន ព្រោះពួកគាត់កាន់តែចាស់ៗអស់ហើយ ដូច្នេះពួកគាត់គួរតែចេះអធ្យាស្រ័យគ្នា យោគយល់គ្នាឲ្យបានច្រើន។ ហើយត្រូវរួមគ្នាមកដោះស្រាយបញ្ហាជាតិ ឲ្យបានច្រើនជាងការឈ្លោះគ្នានោះ ទើបជាការប្រសើរ។ នេះជាការលើកឡើងរបស់លោក វិបុល។
សម្រាប់លោក សន ជ័យ នាយកអង្គការសម្ព័ន្ធគណនេយ្យភាពសង្គមកម្ពុជា ហៅកាត់ថា ANSA បាននិយាយថា ភាពស្រុះស្រួលនយោបាយ នឹងនាំផលប្រយោជន៏ជាច្រើន ដល់សេដ្ឋកិច្ចសង្គម ដែលអ្នកនយោបាយត្រូវពិចារណាឡើងវិញ។ ដូច្នេះលោក សន ជ័យ ជឿជាក់ថា ច្រកចេញនយោបាយនឹងអាចកើតមាន នៅមុនពេលការបោះឆ្នោតមកដល់។
ថ្លែងប្រាប់សារព័ត៌មានថ្មីៗ នាយកអង្គការសម្ព័ន្ធគណនេយ្យភាពសង្គមកម្ពុជារូបនេះ បានបញ្ជាក់ដូច្នេះថា៖«នៅពេលអ្នកនយោបាយគិតពីប្រយោជន៍រួម ប្រយោជន៍សាធារណៈជាគោល ខ្ញុំគិតថាការសម្របសម្រួលនយោបាយនឹងកើតឡើង។ ប៉ុន្តែបើអ្នកនយោបាយនៅតែគិតពីផលប្រយោជន៍បុគ្គលច្រើនជាង ខ្ញុំគិតថាវាមិនអាចទៅរួច។ ដូច្នេះមានតែការតម្កល់ផលប្រយោជន៍ជាតិជាធំ ទើបអាចរកច្រកចេញ ឈានទៅស្រុះស្រួលនយោបាយ ដាក់លើតុចរចា នឹងអាចឈានទៅរកការប្រកួតប្រជែងផ្នែកនយោបាយបាន»។
អតីតមេបក្សសង្គ្រោះជាតិ ធ្លាប់បង្ហើបពីបំណងចង់ចរចាជាមួយសម្ដេច ហ៊ុន សែន។ លោក សម រង្ស៊ី យល់ថា ដើម្បីបន្តវប្បធម៌សន្ទនា ឬក៏ដើម្បីឲ្យការចរចាកើតឡើងបាន លុះត្រាតែសម្តេច ហ៊ុន សែន ទុករឿងបុគ្គលមួយអន្លើសិន។ សម្រាប់លោក រឿងជាតិ គឺសំខាន់ជាងរឿងបុគ្គល។ ប៉ុន្តែគោលបំណងចរចានេះ ត្រូវបានរាំខ្ទប់ ដោយសារសារនយោបាយរបស់ប្រមុខរដ្ឋាភិបាល ដែលបានប្រកាសថា មិនបើកផ្លូវចរចានយោបាយជាមួយអតីតគណបក្សប្រឆាំងឡើយ។
បន្ថែមពីនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រាប់សារព័ត៌មានថ្មីៗថា មិនទាន់មានសញ្ញាវិជ្ជមានចំពោះអតីតគណបក្សសង្គ្រោះជាតិ សម្រាប់ឱកាសចរចា ឬអាចឲ្យបក្សមួយនេះរស់ឡើងវិញ។ «បក្សប្រជាជនមិនដែលមាននយោបាយអរិយភាពជាមួយគណបក្សដទៃទេ លើមូលដ្ឋានដែលគណបក្សទាំងឡាយ មានអាទិភាពនៅក្នុងសង្គមកម្ពុជានេះ គោរពគោលការណ៍ត្រឹមត្រូវតាមច្បាប់។ ហើយបើចង់ឲ្យយើងទៅចរចា ឲ្យទៅសហការជាមួយអ្នកក្បត់ជាតិ យើងទៅមិនរួចទេ ព្រោះអតីតបក្សប្រឆាំងក្បត់ជាតិ ហើយចង់រស់ឡើងវិញវាគឺទៅមិនរួចទេ»។ នេះជាការបញ្ជាក់របស់លោក សុខ ឥសាន។
តែយ៉ាងណាអ្នកវិភាគនយោបាយមើលឃើញថា ដំណោះស្រាយនយោបាយ នឹងកើតចេញជារូបរាងតាមរយៈការសម្បទាននយោបាយ និងវប្បធម៌សន្ទនា។ ហើយការសម្របសម្រួលដំណោះស្រាយពីបរទេស ក៏ជាផ្នែកមួយ ជួយដល់នយោបាយកម្ពុជាផងដែរ។ សម្រាប់លោក ហង្ស វិទូ អ្នកវិភាគនយោបាយ មើលឃើញថា ប្រទេសជប៉ុន គឺជាតួអង្គសំខាន់ក្នុងការដោះស្រាយបញ្ហានយោបាយកម្ពុជា។
ថ្លែងប្រាប់សារព័ត៌មានថ្មីៗ អ្នកវិភាគរូបនេះ បានអត្ថាធិប្បាយដូច្នេះថា៖«ប្រទេសជប៉ុន គឺជាប្រទេសដែលឆ្លាតវៃ ហើយគេធ្វើការទូតដោយសន្តិវិធី ក្នុងការព្យាយាមលើកទឹកចិត្តកម្ពុជាឲ្យដោះស្រាយបញ្ហាដោយសន្តិវិធី ។ហើយខ្ញុំយល់ថាជប៉ុន មានសុទិដ្ឋិនិយម មុនថ្ងៃបោះឆ្នោត កម្ពុជានឹងមានច្រកចេញមួយ ដើម្បីឈានទៅរកការបោះឆ្នោត ដោយមានបក្សប្រឆាំងចូលរួម។ ហើយខ្ញុំយល់ថា ជប៉ុនមុននឹងស្នើដល់កម្ពុជា ជប៉ុនដឹងខ្លួនថា មានឥទ្ធិពលប៉ុណ្ណាចំពោះកម្ពុជា ជប៉ុនដឹងជាមុនស្រេច។ ទី២ កម្ពុជាខ្លួនឯងក៏ដឹងថា ជប៉ុនមានតួនាទីសំខាន់ប៉ុណ្ណាសម្រាប់កម្ពុជា ទាំងផ្នែកនយោបាយ ផ្នែកសេដ្ឋកិច្ច និងជំនួយក្តី… ដូច្នេះចង់មិនចង់ក៏ជប៉ុន នៅតែមានឥទ្ធិពលចំពោះការសម្រេចរបស់រដ្ឋាភិបាលកម្ពុជា»៕