សង្គមអន្តរជាតិ
ឥណ្ឌា៖ដើម្បីការពារប្រាសាទ អ្នកទេសចរម្នាក់អាចទស្សនាប្រាសាទ Taj Mahal ត្រឹមបីម៉ោងប៉ុណ្ណោះ
× រដ្ឋាភិបាលឥណ្ឌាបានសម្រេចដាក់កំណត់ពេលវេលាឲ្យរាល់ភ្ញៀវទេសចរទាំងអស់ដែលចង់ចូលទស្សនាប្រាសាទ Taj Mahal ដើម្បីធ្វើយ៉ាងណាការពារសុវត្ថិភាពប្រាសាទ។ ភ្ញៀវទេសចរម្នាក់ៗអាចចូលទៅទស្សនាប្រាសាទនេះបានត្រឹមបីម៉ោងប៉ុណ្ណោះ។
រាល់អ្នកទេសចរទាំងអស់អាចមានពេលវេលាច្រើនបំផុតត្រឹមបីម៉ោងប៉ុណ្ណោះ បើសិនជាគេចង់ចូលទៅទស្សនាប្រាសាទ Taj Mahal របស់ឥណ្ឌា។ នេះជាការសម្រេចរបស់រដ្ឋាភិបាលឥណ្ឌាកាលពីខែមីនាកន្លងទៅ។
បើតាមការបញ្ជាក់របស់ស្ថាប័នស្ទង់មតិបុរាណវិទ្យាឥណ្ឌា (ASI) ការសម្រេចកំណត់ពេលសម្រាប់អ្នកទស្សនានេះដោយសាររដ្ឋាភិបាលចង់គ្រប់គ្រងចំនួនអ្នកមកទស្សនា និងទប់ស្កាត់ការបំពុលដែលអាចកើតមានឡើងនិងបង្កគ្រោះថ្នាក់ដល់ប្រាសាទផង។
ប្រធានស្ថាប័ននេះលោកបណ្ឌិត K. K. Muhammed បានថ្លែងប្រាប់សារព័ត៌មានរុស្ស៊ីដូច្នេះ៖« ការសម្រេចនេះនឹងរួមចំណែកបន្ថយភាពណែនណាន់តាន់តាប់ ពេលដែលមានអ្នកទេសចរចូលទៅទស្សនាប្រាសាទ Taj Mahal ព្រោះជាធម្មតាពួកគេចូលទៅពេញមួយថ្ងៃតែម្តង។ ដូច្នេះវានឹងអាចគ្រប់គ្រងបានបញ្ហានេះជាពិសេសចំនួនមនុស្សនៅក្នុងបរិវេណប្រាសាទ។ លើសពីនេះទៀតការកំណត់ពេលវេលានេះនឹងក្លាយជាឱកាសសម្រាប់មនុស្សគ្រប់គ្នាក្នុងការចូលទៅទស្សនាប្រាសាទ»។
លោកបញ្ជាក់បន្ថែមផងដែរថា លោកមិនជឿជាក់ថា វិធានការនេះនឹងធ្វើឲ្យអ្នកទេសចរខកចិត្តលែងមកទស្សនាប្រាសាទដ៏ល្បីល្បាញនេះឡើយ។
«ពេលអនុវត្តដំបូង វាអាចថាមានការលំបាកច្រើនសម្រាប់អ្នកទេសចរ ប៉ុន្តែជារួមពួកគេអាចយល់បានពីភាពចាំបាច់នៃវិធានការនេះដើម្បីធានាពីសុវត្ថិភាព និងគុណភាពនៃសំណង់ស្ថាបត្យកម្មប្រវត្តិសាស្ត្រដែលជាសម្បត្តិមនុស្សជាតិ»។ លោក Muhammed និយាយដូច្នេះ។
ប្រាសាទ Taj Mahal នេះត្រូវបានគេចាត់ទុកជាសំណង់ដែលជានិមិត្តរូបនៃសេចក្តីស្រលាញ់។ ប្រាសាទនេះត្រូវបានសាងសង់ឡើងកាលពីឆ្នាំ ១៦៣២ ដោយអធិរាជ Shah Jahan។ អ្នកទេសចររាប់ពាន់នាក់មកពីទូទាំងពិភពលោកមកទស្សនាទីតាំងប្រវត្តិសាស្ត្រ និងសម្បត្តិបេតិកភណ្ឌពិភពលោកនេះរៀងរាល់ថ្ងៃ៕
© រក្សាសិទ្ធិដោយ thmeythmey.com