សុខ លឹមហេង ក្នុងដំណើរទៅប្រជែងជាមួយជើងខ្លាំងអុកចត្រង្គអង្គរសង្ក្រាន្ត

កីឡាជាតិ

ជាតិ

សង្រ្កាន្តឆ្នាំថ្មី

សុខ លឹមហេង ក្នុងដំណើរទៅប្រជែងជាមួយជើងខ្លាំងអុកចត្រង្គអង្គរសង្ក្រាន្ត

12, Apr 2018 , 3:02 pm

រូបភាព

កីឡាករ សុខ លឹមហេង (អាវខ្មៅឆ្វេង)ប្រកួតជាមួយកីឡាករ ឃឹម ឃឹម ក្នងវគ្គ១២នាក់ចុងក្រោយនៅ NOCC

ដោយ:

កីឡាករ សុខ លឹមហេង ដែលគេចាត់ទុកជាតារារះថ្មីលើវិថីស្តេចអុក ជាបេក្ខភាព១រូបក្នុងចំណោម៨រូប ដែលទទួលបានកៅអីឡើងទៅប្រកួតក្នុងដំណាក់កាលផ្តាច់ព្រ័ត្រនៅព្រឹត្តិការណ៍អង្គរសង្ក្រាន្ត នាខេត្តសៀមរាប។ សម្រាប់ការបង្ហាញខ្លួនជាលើកដំបូងនេះ សុខ លឹមហេង បានដាក់ក្តីរំពឹងខ្ពស់ក្នុងការគ្រងជើងឯកនៅឆ្នាំនេះ។ ដើម្បីត្រៀមការប្រកួតនេះ លឹមហេង នឹងបង្កើនការហ្វឹកហាត់ពង្រឹងសមត្ថភាពទ្វេដង ពិសេសប្រកួតមិត្តភាពអន្តរជាតិជាមួយកីឡាករជិតខាង ដើម្បីដកស្រង់បច្ចេកទេសថ្មីៗ។

ទោះបីជាកីឡាករចំណូលសម្រាប់ដំណាក់កាលផ្តាច់ព្រ័ត្រនៃព្រឹត្តិការណ៍អង្គរសង្ក្រាន្ត តែកីឡាករ សុខ លឹមហេង មានទំនុកចិត្តយ៉ាងមុតមាំក្នុងការប្រជែងដណ្តើមជើងឯកជាមួយជើងខ្លាំង៧រូបទៀតនៅឆ្នាំនេះ។ «សម្រាប់ការឡើងទៅប្រកួតដណ្តើមជើងឯកប្រចាំព្រឹត្តិការណ៍អង្គរសង្ក្រាន្តឆ្នាំនេះ ខ្ញុំមានសង្ឃឹមខ្ពស់ពី៦០ទៅ៧០ភាគរយ។ ហើយខ្ញុំនឹងខិតខំប្រឹងប្រែង ដើម្បីឈានដល់វគ្គផ្តាច់ព្រ័ត្រ»។ នេះជាការបង្ហាញទំនុកចិត្តរបស់កីឡាករ សុខ លឹមហេង ដែលបានបន្ថែមថា ខ្លួននឹងបង្កើនការហ្វឹកហាត់ ពិសេសស្វែងរកដៃគូនៅប្រទេសជិតខាងប្រកួតមិត្តភាពដកស្រង់បច្ចេកទេសល្អៗបន្ថែមទៀត។

ក្នុងចំណោមជើងខ្លាំងទាំង៧រូបដែលបានកៅអីសម្រាប់ព្រឹត្តិការណ៍អង្គរសង្ក្រាន្ត កីឡាករ សុខ លឹមហេង បានចាត់ទុកម្ចាស់ជើងឯកពីរជំនាន់(២០១៤-២០១៥) ឈាវ បូរ៉ា ជាឧបសគ្គធំសម្រាប់រូបគេក្នុងការប្រជែងជើងឯកឆ្នាំនេះ ខណៈកីឡាករដទៃអាចប្រដំប្រសង។ ទន្ទឹមនឹងនេះទាំងកីឡាករ ឈាវ បូរ៉ា និងកីឡាករជើងខ្លាំងដទៃទៀត សុទ្ធតែបង្ហាញការព្រួយបារម្ភចំពោះសមត្ថភាពរបស់ សុខ លឹមហេង ដោយពួកគេបានចាត់ទុក លឹមហេង ជាឧបសគ្គសម្រាប់ខ្លួនផងដែរ។

សម្រាប់ការប្រកួតជុំដំបូងប្រចាំមណ្ឌលភ្នំពេញដែលមានកីឡាករជើងខ្លាំងប្រមាណជាង៦០នាក់ចូលរួម កីឡាករ សុខ លឹមហេង ទទួលបានចំណាត់ថ្នាក់លេខ១ ក្រោយរូបគេយកឈ្នះម្ចាស់ជើងឯកពានរង្វាន់សម្តេច ហ៊ុន សែន ឆ្នាំ២០១០ ឆយ វិរ៉ា ក្នុងវគ្គពាក់កណ្តាលផ្តាច់ព្រ័ត្រ និងឈ្នះកីឡាករ ស៊ីវ ស៊ីន នៅវគ្គផ្តាច់ព្រ័ត្រ។

នាការប្រកួតជម្រុះជុំទី២នៅទីស្នាក់ការ NOCC កាលពីថ្ងៃទី៨ មេសា ឆ្នាំ២០១៨ កីឡាករ សុខ លឹមហេង ឈរចំណាត់ថ្នាក់លេខ១ប្រចាំពូល B ក្រោយបីប្រកួតឈ្នះ២ ស្មើ១។ ក្នុងនោះ លឹមហេង ស្មើជាមួយ លឹម ផល្លា ក្នុងជំនួបទី១ ហើយបានយកឈ្នះ កែវ វឌ្ឍនា ក្នុងជំនួបទី២ និងឈ្នះ ជា ស៊ីដេត នៅជំនួបចុងក្រោយ។

បន្ទាប់មកនៅវគ្គ១២នាក់ចុងក្រោយដែលជាវគ្គចាញ់ធ្លាក់ សុខ លឹមហេង បានទម្លាក់កីឡាករ ឃឹម ឃឹម ដើម្បីទទួលបានកៅអីវគ្គ៨នាក់ចុងក្រោយសម្រាប់ព្រឹត្តិការណ៍អង្គរសង្ក្រាន្តឆ្នាំនេះ។ ជ័យជម្នះជាបន្តបន្ទាប់របស់កីឡាករ សុខ លឹមហេង ធ្វើឲ្យមហាជនប្រៀបធៀបរូបគេថា «តារារះថ្មីលើវិថីស្តេចអុកចត្រង្គ»។

នេះជាលើកទី១ សម្រាប់កីឡាករ សុខ លឹមហេង ដែលទទួលបានកៅអីឡើងទៅប្រកួតក្នុងវគ្គ៨នាក់ចុងក្រោយព្រឹត្តិការណ៍អង្គរសង្ក្រាន្ត តែវាជាលើកទី៣សម្រាប់ការចូលរួមប្រកួត ខណៈពីរលើកដំបូងកីឡាកររូបនេះធ្លាក់ត្រឹមវគ្គជម្រុះ។ លឹមហេង ចេះលេងអុកចត្រង្គតាំងពីអាយុ៦ឆ្នាំ។ ប៉ុន្តែរូបគេបានបោះបង់ចោលអស់រយៈជាច្រើនឆ្នាំ ដោយសារជាប់រវល់ជាមួយការសិក្សា។ ទើបតែ៤ទៅ៥ឆ្នាំចុងក្រោយនេះ លឹមហេង បានចូលប្រឡូកក្នុងវិស័យនេះសារជាថ្មី និងបានចូលរួមប្រកួតប្រជែងជើងឯកជាបន្តបន្ទាប់រហូតក្លាយជាកីឡាករជម្រើសជាតិប្រចាំសហព័ន្ធកីឡាអុកចត្រង្គកម្ពុជា៕

សូមថ្លែងអំណរគុណដល់ក្រុមហ៊ុនដែលបានចូលរួមឧបត្ថម៖

១, ឥណទានគេហដ្ឋានរបស់ធនាគារ ស៊ីអាយអិមប៊ី ផ្តល់ជូនអត្រាការប្រាក់ 7.99% បន្ថែមជាមួយសេវាធានារ៉ាប់រងអាយុជីវិតរហូតដល់ 50,000 ដុល្លារអាមេរិក ដោយឥតគិតថ្លៃ។ សូមទំនាក់ទំនង 023 988 388 ។

២, រថយន្តប្រណីតម៉ាក Mercedes-Benz (មែសឺដេស-បិនស៍) ថ្មីៗឆ្នាំ២០១៨ កំពុងដាក់លក់នៅ ក្រុមហ៊ុន ស្តារ អូតូ (ខេមបូឌា) ខូអិលធីឌី ស្ថិតនៅមហាវិថីសម្តេច ហ៊ុន សែន ឬផ្លូវ៦០ម៉ែត្រ ភ្នំពេញ។ ទូរស័ព្ទផ្នែកលក់ 017 231 488 និងផ្នែកសេវាកម្ម ០11 726 988 ។

៣, ស្អាតដូចតារា ស្អាតបែបស៊ូណេ, ទូរស័ព្ទទំនាក់ទំនង៖ 017 800 150 / 098 5000 88 , ទីតាំងស្ថិតនៅផ្សារទំនើបសុវណ្ណា។

៤, រីករាយឆ្នាំថ្មី! បង្កើតបរិយាកាសដ៏រីករាយនៅក្នុងឆ្នាំថ្មីជាមួយ កូកា-កូឡា រសជាតិនៃអារម្មណ៍ស្រស់ស្រាយ។