ជនល្មើស៤នាក់ ត្រូវបានសមត្ថកិច្ចចាប់ខ្លួន ពាក់ព័ន្ធការផលិតគ្រឿងញៀន

ជាតិ

សង្គមជាតិ

ជនល្មើស៤នាក់ ត្រូវបានសមត្ថកិច្ចចាប់ខ្លួន ពាក់ព័ន្ធការផលិតគ្រឿងញៀន

12, Apr 2018 , 10:19 pm

រូបភាព

ដោយ:

ភ្នំពេញ៖ អគ្គស្នងការនគរបាលជាតិ បានបង្ក្រាបជនល្មើស ៤រូប ដែលពាក់ព័ន្ធការកែច្នៃប្រភេទគ្រឿងញៀន មានប្រមាណជិត២៧គីឡូក្រាម។ ជនល្មើសទាំង៤រូបនេះ គឺជាជនជាតិខ្មែរ ២នាក់ និងជនជាតិចិន ២នាក់។

ថ្លែងនៅក្នុងសន្និសីទកាសែតជុំវិញករណីជួញជួរ និងផលិតកែច្នៃគ្រឿងញៀនខុសច្បាប់ កាលពីព្រឹកថ្ងៃទី១២ ខែមេសា លោក ឡឹក វណ្ណៈ នាយករងមន្ទីរប្រឆាំងគ្រឿងញៀននៃក្រសួងមហាផ្ទៃ បានឲ្យដឹងថា ជនល្មើសទាំង៤នាក់នេះ ត្រូវបានបញ្ជូនមកអគ្គស្នងការនគរបាលជាតិ ជាមួយនឹងគ្រឿងញៀន៤ប្រភេទ ដែលមានទម្ងន់ជិត២៧គីឡូក្រាម។

នាយករងមន្ទីរប្រឆាំងគ្រឿងញៀនរូបនេះ បានបញ្ជាក់ដូច្នេះថា៖ «ប្រភេទគ្រឿងញៀនជិត២៧គីឡូក្រាមនេះ មានការនាំចូលពីប្រទេសឡាវ ដែលយកមកផលិតនៅកម្ពុជា ដើម្បីបន្ធូរបន្ថយ ឬបង្កើនគុណភាពដើម្បីនាំចេញទៅក្រៅប្រទេសបន្តទៀត ហើយមួយចំនួនទៀតសម្រាប់ជួញដូរប្រើប្រាស់ក្នុងស្រុក»។

លោក ឡឹក វណ្ណៈ បានបន្ថែមថា សមត្ថកិច្ចពាក់ព័ន្ធបានចុះបង្ក្រាបករណីគ្រឿងញៀនចំនួន៤គោលដៅ ទើបឃាត់ខ្លួនបានជនល្មើស៤នាក់ និងប្រមូលបានថ្នាំញៀន ដូចជា ម្សៅកេតាមីន ១ថង់ ស្មើនឹង៧៨០០ក្រាម, កេតាមីន(Katamine) ៦កញ្ចប់ ទម្ងន់៣៨៤,១៦ក្រាម, មេតំហ្វេតាមីន (ICE)រាវ កន្លះធុងជ័រ ទម្ងន់៥៦០០ក្រាម, ហេរ៉ូអ៊ីន(Heroine) ទម្ងន់ ២១០,០១ក្រាម ,មេតំហ្វេតាមីន(ICE) ១៤កញ្ចប់ ស្មើទម្ងន់ ៦៥៣៧,៤៣ក្រាម និងវត្ថុតាងផ្សេងទៀត។

បើតាមព្រះរាជអាជ្ញា ជនល្មើសទាំងនេះ នឹងត្រូវបញ្ជូនទៅកាន់តុលាការ ដើម្បីដោះស្រាយទៅតាមនីតិវិធីច្បាប់៕