សម្តេច សាយ ឈុំ ចំណាយថវិកា ៤១០លានរៀល ឧបត្ថម្ភអត្តពលិកដែលឈ្នះមេដាយមាស

កីឡាជាតិ

ជាតិ

សម្តេច សាយ ឈុំ ចំណាយថវិកា ៤១០លានរៀល ឧបត្ថម្ភអត្តពលិកដែលឈ្នះមេដាយមាស

13, Apr 2018 , 1:23 pm

រូបភាព

ដោយ:

ប្រធានព្រឹទ្ធសភាកម្ពុជាសម្តេច សាយ ឈុំ បានចំណាយថវិកាប្រមាណ៤១០លានរៀល ឧបត្ថម្ភដល់កីឡាករកីឡាការិនីម្ចាស់មេដាយមាសអាស៊ានហ្គេម អាស៊ីហ្គេម និងពិភពលោក ដើម្បីលើកទឹកចិត្តក្នុងឱកាសបុណ្យចូលឆ្នាំថ្មីប្រពៃណីខ្មែរ។ សម្តេចបានឧបត្ថម្ភគណៈកម្មាធិការជាតិអូឡាំពិកកម្ពុជាចំនួន១ម៉ឺនដុល្លារផងដែរ ដើម្បីតបស្នងស្នាដៃដឹកនាំកីឡានាពេលកន្លងមក។

កីឡាករកីឡាការិនីម្ចាស់មេដាយមាសអាស៊ានហ្គេម អាស៊ីហ្គេម និងពិភពលោកចំនួន៤១រូប ទទួលបានថវិកាឧបត្ថម្ភម្នាក់ៗ១០លានរៀលពីសម្តេច សាយ ឈុំ ប្រធានព្រឹទ្ធសភាកម្ពុជាក្នុងឱកាសបុណ្យចូលឆ្នាំថ្មីប្រពៃណីខ្មែរ។ ការផ្តល់ជូននេះ គឺដើម្បីលើកទឹកចិត្ត ក៏ដូចជាតបស្នងសងគុណចំពោះកីឡាករកីឡាការិនី ដែលបានសាងភាពល្បីល្បាញជូនជាតិមាតុភូមិលើឆាកអន្តរជាតិ។

ជាមួយគ្នានេះ សម្តេច សាយ ឈុំ បានឧបត្ថម្ភថវិកាបន្ថែមចំនួន១ម៉ឺនដុល្លារ ដល់គណៈកម្មាធិការជាតិអូឡាំពិកកម្ពុជា ដើម្បីលើកទឹកចិត្តចំពោះស្នាដៃ ដែលបានដឹកនាំសកម្មភាពកីឡាឲ្យទទួលបានលទ្ធផលនាពេលកន្លងមកផងដែរ។ អត្តពលិកដែលទទួលបានការឧបត្ថម្ភទាំងនោះរួមមាន ប៉េតង់ តេក្វាន់ដូ វ៉ូវីណាម ចំបាប់ កាយវប្បកម្ម ល្បុក្កតោ និងប្រដាល់គុនខ្មែរ។

ថវិកាឧបត្ថម្ភទាំងនោះត្រូវបានប្រគល់ជូនកីឡាករកីឡាការិនី និងគណៈកម្មាធិការជាតិអូឡាំពិកកម្ពុជាកាលពីថ្ងៃទី១០ មេសា ឆ្នាំ២០១៨ នៅព្រឹទ្ធសភា។ ការប្រគល់និងទទួលនេះ ត្រូវបានធ្វើឡើងក្រោមវត្តមានសម្តេច សាយ ឈុំ ប្រធានព្រឹទ្ធសភា, លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា រួមជាមួយមន្ត្រីនិងកីឡាករជាច្រើនរូបទៀត៕