ជាតិ
សង្គមជាតិ
សង្រ្កាន្តឆ្នាំថ្មី
យុវជនកាលពី៥០ឆ្នាំមុន គ្មានទូរសព្ទហៅគ្នាផឹកឡើយ តែចូលចិត្តណាត់គ្នាទៅលេងល្បែងប្រជាប្រិយនៅវត្ត អ្នកស្រី អ៊ុំ សុផានី និងលោក ប្រាក់ ប៉ូ ដែលសុទ្ធតែឈានចូលវ័យជាង៧០ឆ្នាំ រំលឹកពីយុវភាពរបស់ខ្លួនកាលពីប្រមាណ៥០ឆ្នាំមុន
× មានទឹក មានសាច់ហើយឬនៅ? តោះដាក់មួយកេសមក! ហើយទិញទឹកកកផង!។ នេះជាការជួបជុំគ្នាដ៏ពេញនិយមរបស់យុវជនមួយចំនួនធំឱកាសនៃពិធីបុណ្យចូលឆ្នាំថ្មី និងពិធីបុណ្យផ្សេងៗទៀត។ សម្រាប់យុវជនសម័យថ្មី ទូរសព្ទទាក់ទងគ្នាចុះឡើង គម្រោងផឹកស៊ី តែងតែប្រព្រឹត្តទៅដោយរលូន ពោលគឺផ្ទុយពីយុវជនសម័យមុន ដោយការជួបជុំគ្នា តែងតែធ្វើទៅតាមលំអានពីបុរាណ។
នាអំឡុងពេលបុណ្យចូលឆ្នាំប្រពៃណីជាតិខ្មែរ កំលោះក្រមុំ កាលពីជំនាន់មុន សប្បាយនឹងការជួបជុំគ្នានៅតាមវត្តអារាម ឬតាមផ្ទះ ដើម្បីរាំកម្សាន្ត និងលេងល្បែងប្រជាប្រិយ។ ឯការទទួលទានស្រានាវេលាចូលឆ្នាំ មិនមែនជាប្រពៃណី ឬការនិយមរបស់ពួកគាត់នោះឡើយ។
អ្នកស្រី អ៊ុំ សុផានី អាយុ៧២ឆ្នាំ បានរម្លឹកប្រាប់សារព័ត៌មានថ្មីៗ ពីបរិយាកាសនាអំឡុងពេលចូលឆ្នាំខ្មែរថា យុវជនជំនាន់មុន សប្បាយត្រេកអរណាស់ ព្រោះបានជួបជុំសាច់ញាតិបងប្អូន ហូបអាហារជុំគ្នា។ ជាអ្នករស់នៅភ្នំពេញ អ្នកស្រី សុផានី រៀបរាប់ទៀតថា ទាំងចាស់ទាំងក្មេង នាំគ្នាយកចង្ហាន់ទៅវត្ត និងលេងល្បែងប្រជាប្រិយកម្សាន្ត។
អ្នកស្រី អ៊ុំ សុផានី ថ្លែងបន្តដូច្នេះ៖«ឱ្យតែជិតដល់ពេលចូលឆ្នាំ ខ្ញុំមានអារម្មណ៍សប្បាយចិត្តមិនដឹងថាចេញមកពីណា នឹកថានឹងបានជួបជុំបងប្អូន ចម្អិនអាហារហូបជុំគ្នា យកចង្ហាន់ទៅវត្ត បានលេងល្បែងប្រជាប្រិយនៅផ្ទះ។ ផ្ទះខ្ញុំកាលនោះមានទីធ្លាធំ អ្នកភូមិ អ្នកធ្វើដំណើរតាមផ្លូវ គេមកលេងល្បែងប្រជាប្រិយច្រើនណាស់ សប្បាយណាស់។ ដល់ចប់ចូលឆ្នាំ ខ្ញុំនឹកវេលាចូលឆ្នាំណាស់ នឹកឃើញពេលជុំគ្នាសប្បាយ»។
អ្នកភ្នំពេញម្នាក់ទៀត គឺអ្នកស្រី កែវ ណារុំ ។ បច្ចុប្បន្ន គាត់មានអាយុ៧៤ឆ្នាំ។ គាត់ បានរម្លឹកគ្រាចូលឆ្នាំ នៅជំនាន់គាត់ដូច្នេះថា កំលោះក្រមុំតែងប្រជុំគ្នា លេងល្បែងប្រជាប្រិយ និងរាំលេងកម្សាន្តមានចង្វាក់ រាំរង់ រាំក្បាច់ សារាវ៉ាន់ ជាដើម នៅប្រមាណជា១ខែមុន ដល់ថ្ងៃចូលឆ្នាំថ្មី។ អ្នកស្រីកែវ ណារុំ បញ្ជាក់ដូច្នេះ៖«នៅសម័យនោះ គេកាន់ប្រពៃណីបានល្អណាស់។ ដ្បិតតែគេរាំជាមួយគ្នាមែន តែគេមិនប៉ះដៃប៉ះជើងគ្នាទេ។ គេគោរពគ្នាណាស់»។
ចំណែក អ្នកស្រី ស៊ឹម ចាន់យ៉ា អាយុ៧៣ឆ្នាំ អ្នកខេត្តបាត់ដំបងវិញ បានឱ្យដឹងថា កាលពីអ្នកស្រីនៅក្មេង មុនពេលចូលឆ្នាំដូច្នេះ នៅតាមភូមិនីមួយៗអ៊ូអរណាស់ ពោលគឺគេលេងល្បែងប្រជាប្រិយពេញ ស្ទើរគ្រប់មុខផ្ទះ។
បើតាម អ្នកស្រី ចាន់យ៉ា ក្មេងៗក៏តែងតែណាត់គ្នីគ្នា ទៅជួបជុំនៅឯវត្ត ដើម្បីរាំកម្សាន្ត និងលេងល្បែងប្រជាប្រិយដែរ។ «បើនិយាយកាលនៅតូច ជិតចូលឆ្នាំអ៊ីចេះ មិនស្ងាត់ទេ។ គេលេងល្បែងប្រជាប្រិយ ស្រែកលេងអ៊ូអរសប្បាយណាស់ រហូតប្រហែល១០ឆ្នាំមុននៅតែអ៊ូអរ តែដល់ឥឡូវស្ងាត់ប្លែក»។ នេះជាការបន្ថែមរបស់អ្នកបាត់ដំបងរូបនេះ។
ងាកមក លោក ប្រាក់ ប៉ូ អ្នកខេត្តកណ្ដាលវិញ រម្លឹកថា នៅជំនាន់គាត់ នៅរដូវចូលឆ្នាំ ក្មេងៗកំលោះក្រមុំនៅភូមិ មិនត្រឹមតែនាំគ្នាលេងប្រជាប្រិយកម្សាន្ត ដូចជាបោះអង្គញ់ ចោលឈូង ទាញព្រ័ត្រ ប៉ុណ្ណោះទេ។
លោកតាវ័យ៧៣ឆ្នាំរូបនេះ ក៏បញ្ជាក់ដែរថា នៅវត្តអារាមវិញ ក៏មានការសម្តែងល្ខោនផងដែរ។ «ពីក្មេងមិនមានល្បែងអីលេងច្រើនទេ មានតែលេងអង្គញ់ ចោលឈូង ទាញព្រ័ត្រ អីអស់ហ្នឹង។ នៅវត្ត គេមានលេងល្ខោនរាល់ឆ្នាំ។ ក្មេងប្រុសៗរៀបចំស្មៅគោហើយ នាំគ្នាទៅវត្តជួបគ្នា។ ដូច្នេះនៅវត្តអ៊ូអររហូតមិនស្ងាត់ទេ»។ លោក ប្រាក់ ប៉ូ ក៏បានបញ្ជាក់បន្តដែរថា សម័យនោះ មានតែចាស់ៗដែលពិសាស្រា រីឯក្មេងៗវិញមិននឹកនាស្រាដូចបច្ចុប្បន្នទេ៕
សូមថ្លែងអំណរគុណដល់ក្រុមហ៊ុនដែលបានចូលរួមឧបត្ថម៖
១, ឥណទានគេហដ្ឋានរបស់ធនាគារ ស៊ីអាយអិមប៊ី ផ្តល់ជូនអត្រាការប្រាក់ 7.99% បន្ថែមជាមួយសេវាធានារ៉ាប់រងអាយុជីវិតរហូតដល់ 50,000 ដុល្លារអាមេរិក ដោយឥតគិតថ្លៃ។ សូមទំនាក់ទំនង 023 988 388 ។
២, រថយន្តប្រណីតម៉ាក Mercedes-Benz (មែសឺដេស-បិនស៍) ថ្មីៗឆ្នាំ២០១៨ កំពុងដាក់លក់នៅ ក្រុមហ៊ុន ស្តារ អូតូ (ខេមបូឌា) ខូអិលធីឌី ស្ថិតនៅមហាវិថីសម្តេច ហ៊ុន សែន ឬផ្លូវ៦០ម៉ែត្រ ភ្នំពេញ។ ទូរស័ព្ទផ្នែកលក់ 017 231 488 និងផ្នែកសេវាកម្ម ០11 726 988 ។
៣, ស្អាតដូចតារា ស្អាតបែបស៊ូណេ, ទូរស័ព្ទទំនាក់ទំនង៖ 017 800 150 / 098 5000 88 , ទីតាំងស្ថិតនៅផ្សារទំនើបសុវណ្ណា។
៤, រីករាយឆ្នាំថ្មី! បង្កើតបរិយាកាសដ៏រីករាយនៅក្នុងឆ្នាំថ្មីជាមួយ កូកា-កូឡា រសជាតិនៃអារម្មណ៍ស្រស់ស្រាយ។
© រក្សាសិទ្ធិដោយ thmeythmey.com