អន្តរជាតិ
នយោបាយអន្តរជាតិ
អាមេរិកមិនដកទ័ពចេញពីស៊ីរីឡើយ ដរាបណាខ្លួនមិនទាន់សម្រេចគោលដៅ
× ក្រោយប្រើប្រាស់មីស៊ីលវាយប្រហារស៊ីរីនៅព្រឹកថ្ងៃសៅរ៍ទី ១៤ ខែមេសា តំណាងសហរដ្ឋអាមេរិកប្រចាំអង្គការសហប្រជាជាតិបានអះអាងថា អាមេរិកនឹងមិនដកទ័ពចេញពីស៊ីរីឡើយ ដរាបណាគោលដៅចម្បងរបស់ខ្លួនមិនទាន់សម្រេចបាននោះ។
រដ្ឋបាលលោក ដូណាល់ ត្រាំ ចាប់ផ្តើមផ្លាស់ប្តូរជំហរជាថ្មីក្នុងបញ្ហាស៊ីរី ក្រោយពេលដែលអាមេរិកនិងសម្ព័ន្ធមិត្តអង់គ្លេស និងបារាំងប្រើប្រាស់មីស៊ីល ១០៣ គ្រាប់ វាយប្រហារទីតាំងមួយចំនួននៅស៊ីរីដើម្បីឆ្លើយតបនឹងព័ត៌មានថា ស៊ីរីប្រើប្រាស់អាវុធគីមីនៅក្រុង ឌូម៉ា។
លោកស្រី Nikki Haley បេសកជនពិសេសរបស់អាមេរិកប្រចាំអង្គការសហប្រជាជាតិបង្ហើបក្នុងបទសម្ភាសន៍ជាមួយ Fox News ថា រដ្ឋបាលអាមេរិកនឹងមិនដកកងទ័ពពីស៊ីរីឡើយ ដរាបណាគោលដៅខ្លួនមិនទាន់សម្រេចបាននោះ។ លោកស្រីបានរៀបរាប់គោលដៅសំខាន់ដែលអាមេរិកចង់បាននោះមានចំនួនបីក្នុងនោះមាន ការទប់ស្កាត់ការប្រើអាវុធគីមីជាថ្មី, ធានាថា ក្រុមភេរវជនរដ្ឋឥស្លាមត្រូវកម្ចាត់ និង ឃ្លាំមើលសកម្មភាពអឺរ៉ង់នៅមជ្ឈិមបូព៌ា។
លោកស្រីបានបន្ថែមបែបនេះ៖ «យើងចង់ឃើញការត្រឡប់មកវិញរបស់កងទ័ពអាមេរិក ប៉ុន្តែយើងមិនចាកចេញឡើយដរាបណាគោលដៅទាំងនេះមិនទាន់សម្រេចបានទេនោះ»។
តាមពិតទៅ កាលពីដើមខែមេសាកន្លងមកនេះ លោក ដូណាល់ ត្រាំ បានប្រកាសថា លោកចង់ឲ្យកងទ័ពអាមេរិកដែលមានប្រហែល ២០០០នាក់នោះចាកចេញពីស៊ីរីឆាប់ៗដោយទុកឲ្យប្រទេសដទៃទទួលខុសត្រូវចំពោះបញ្ហាស៊ីរីវិញ ព្រោះការងាររបស់កងទ័ពអាមេរិកក្នុងការកម្ទេចក្រុមភេរវជនរដ្ឋឥស្លាមជិតចប់ហើយ។ លោកបន្ថែមទៀតថា បើសិនជាចង់ឲ្យអាមេរិកនៅបន្ត អារ៉ាប៊ីសាអូឌីតត្រូវបង់លុយឲ្យអាមេរិកដូចគ្នា។
ក្រោយមកនៅថ្ងៃសៅរ៍ទី ១៤ ខែមេសា លោក ត្រាំ បានប្តូរសម្តីរបស់ខ្លួនដោយប្រកាសថា អាមេរិក និងសម្ព័ន្ធមិត្តនឹងបន្តរក្សាការឆ្លើយតបដោយប្រើប្រាស់កម្លាំង បើសិនជាប្រធានាធិបតីស៊ីរីលោក បាសា អាល់អាសាដ មិនព្រមបញ្ឈប់ការប្រើប្រាស់អាវុធគីមីទេនោះ៕
Tag:
ស៊ីរី
អាមេរិក
ដូណាល់ ត្រាំ
អាវុធគីមី
© រក្សាសិទ្ធិដោយ thmeythmey.com