U21 កម្ពុជាត្រូវជែងជាមួយឡាវ និងសិង្ហបុរី ក្នុងពានរង្វាន់ស្តេចព្រុយណេនៅចុងខែ

កីឡាជាតិ

ជាតិ

U21 កម្ពុជាត្រូវជែងជាមួយឡាវ និងសិង្ហបុរី ក្នុងពានរង្វាន់ស្តេចព្រុយណេនៅចុងខែ

18, Apr 2018 , 7:59 am

រូបភាព

ដោយ:

ក្រុមកីឡាករជម្រើសជាតិអាយុក្រោម២១ឆ្នាំកម្ពុជា(U21)ត្រូវប្រជែងជាមួយក្រុម U21 ឡាវនិងសិង្ហបុរី នាការប្រកួតដណ្តើមពាន់រង្វាន់ស្តេចព្រុយណេ Hassanal Bolkiah Trophy ប្រចាំឆ្នាំ២០១៨ នាចុងខែមេសា ខាងមុខនេះ។ ពានរង្វាន់ស្តេចព្រុយណេឆ្នាំនេះមានក្រុមចូលរួមចំនួន៧រួមមានម្ចាស់ផ្ទះព្រុយណេ កម្ពុជា ឡាវ ថៃ សិង្ហបុរី មីយ៉ាន់ម៉ា និងទីម័រខាងកើត។

ក្រោយផ្អាកអស់រយៈពេល៣ឆ្នាំ ការប្រកួតបាល់ទាត់ដណ្តើមពានរង្វាន់ស្តេចព្រុយណេ Hassanal Bolkiah Trophy កម្រិតយុវជនអាស៊ានអាយុក្រោម២១ឆ្នាំ នឹងចាប់ផ្តើមការប្រកួតឡើងវិញនៅឆ្នាំ២០១៨នេះ។ ក្រុមចំនួន៧រួមមានម្ចាស់ផ្ទះព្រុយណេ កម្ពុជា ឡាវ ថៃ សិង្ហបុរី មីយ៉ាន់ម៉ា និងទីម័រខាងកើតត្រូវប្រជែងគ្នាដណ្តើមជើងឯកនៅឆ្នាំនេះ។

ការប្រកួតបែងចែកជាពីរពូល ដោយពូល A មានម្ចាស់ផ្ទះព្រុយណេ មីយ៉ាន់ម៉ា ថៃ និងទីម័រខាងកើត ខណៈពូល B កម្ពុជា ឡាវ និងសិង្ហបុរី។ ក្រុមកីឡាករជម្រើសជាតិអាយុក្រោម២១ឆ្នាំកម្ពុជាត្រូវជួបប្រកួតបើកឆាកជាមួយ U21 សិង្ហបុរី នៅថ្ងៃទី២៨ មេសា ឆ្នាំ២០១៨ មុនជួបប្រកួតចុងក្រោយប្រចាំពូលជាមួយឡាវ នាថ្ងៃទី៣០ ខែមេសា ឆ្នាំ២០១៨។

ពានរង្វាន់ស្តេចព្រុយណេ Hassanal Bolkiah Trophy ត្រូវបានបង្កើតឡើងដោយសមាគមបាល់ទាត់ព្រុយណេ (Football Association of Brunei Darussalam) នៅឆ្នាំ២០០២។ កម្ពុជាធ្លាប់ចូលរួមពានរង្វាន់នេះចំនួន៤លើក គឺនៅឆ្នាំ២០០២, ២០០៧, ២០១២ និង ២០១៤។ ប៉ុន្តែកម្ពុជាមិនធ្លាប់ទទួលបានជើងឯកនោះទេ បានត្រឹមឡើងវគ្គពាក់កណ្តាលផ្តាច់ព្រ័ត្រម្តងនៅឆ្នាំ២០០៧៕