ចិន គាំទ្រឲ្យចាត់វិធានការលើជនជាតិខ្លួន ដែលធ្វើខុសច្បាប់នៅកម្ពុជា

ជាតិ

សង្គមជាតិ

ចិន គាំទ្រឲ្យចាត់វិធានការលើជនជាតិខ្លួន ដែលធ្វើខុសច្បាប់នៅកម្ពុជា

19, Apr 2018 , 4:17 pm

រូបភាព

ជំនួបរវាងលោកនេត សាវឿន និងលោក លាង ជីងរ៉ុង នៅថ្ងៃទី១៩ ខែមេសា ឆ្នាំ២0១៨។ រូបពីអគ្គស្នងការនគរបាលជាតិ

ដោយ: ថ្មីៗ

រដ្ឋាភិបាលចិន មិនត្រឹមតែមិនជំទាស់នោះទេ តែថែមទាំងជំរុញបន្ថែមឲ្យអាជ្ញាធរកម្ពុជា ចាត់វិធានាការលើជនជាតិចិន រួមទាំងអ្នកវិនិយោគចិន ដែលប្រព្រឹត្តបទល្មើសផ្សេងៗ និងធ្វើខុសប្រពៃណីខ្មែរ។ នេះបើតាមគេហទំព័រនៃអគ្គស្នងការនគរបាលជាតិ។

គេហទំព័រនៃអគ្គស្នងការនគរបាលជាតិ បានចុះផ្សាយថា រដ្ឋាភិបាលចិន ក៏បានស្នើឲ្យអាជ្ញាធរកម្ពុជា ចាប់បញ្ជូនជនជាតិចិន ដែលមករស់នៅ និងធ្វើការដោយខុសច្បាប់ ទៅប្រទេសចិនវិញផងដែរ។ គោលជំហរខាងលើ ត្រូវបានលោក លាង ជីងរ៉ុង (LIAO JINGRONG) អគ្គនាយកកិច្ចសហប្រតិបត្តិការអន្តរជាតិនៃក្រសួងសន្តិសុខសារធារណៈចិន លើកឡើងក្នុងជំនួបជាមួយលោក នេត សាវឿន អគ្គស្នងការនគរបា នៅព្រឹក ថ្ងៃទី១៩ ខែមេសា ឆ្នាំ២០១៨នេះ។

លោក គៀត ច័ន្ទថារិទ្ធ អគ្គស្នងការរងនគរបាលជាតិ បានអះអាងថា កាលពីឆ្នាំកន្លងទៅ ជនជាតិចិនប្រមាណជាង៥០០នាក់ ត្រូវបានចាប់បញ្ជូនទៅប្រទេសចិនវិញ។ គេហទំព័រនៃអគ្គស្នងការនគរបាលជាតិ បានស្រង់ប្រសាសន៍របស់មេនគរបាលជាន់ខ្ពស់រូបនេះ ទៅចុះផ្សាយយ៉ាងដូច្នេះថា៖«ចិននៅតែបន្តសហការជាមួយកម្ពុជាផ្នែកសន្តិសុខ ហើយអរគុណកម្ពុជា ចំពោះចំណាត់ការលើជនជាតិចិននាពេលកន្លងមក ដែលបានប្រព្រឹត្តខុសច្បាប់នៅកម្ពុជា»។

យ៉ាងណាក៏ដោយ លោក លាង ជីងរ៉ុង បានស្នើឲ្យលោក នេត សាវឿន ជួយការពារ និងបង្កើនសន្តិសុខដល់ជនជាតិចិន និងអ្នកវិនិយោគចិន ដែលកំពុងរស់នៅ និងរកស៊ីដោយស្របច្បាប់នៅកម្ពុជា។ នេះបើតាមការចុះផ្សាយក្នុងគេហទំព័រនៃអគ្គស្នងការនគរបាលជាតិដដែល៕