កីឡាជាតិ
ជាតិ
រឿង សោភ័ណ្ឌ តបតការឌឺដងរបស់កីឡាករថៃ Saensatharn P.K.Saenchai
× អ្នកលេងគុនខ្មែរជួរមុខមួយចំនួនរួមមានកីឡាករ ធឿន ធារ៉ា, កែវ រំចង់ និង រឿង សោភ័ណ្ឌ ជាដើមបាននាំគ្នាសរសេរសារ ក៏ដូចជាបង្ហោះវីដេអូនៅលើបណ្តាញសង្គមហ្វេសប៊ុក ដើម្បីឆ្លើយតមនឹងកីឡាករថៃ Saensatharn P.K.Saenchai ដែលបានចេញវីដេអូដឺដងកាលពីពេលថ្មីៗ។ ជាក់ស្តែងកាលពីថ្ងៃទី១៨ មេសា កីឡាករ រឿង សោភ័ណ្ឌ បានចេញវីដេអូដោយបបួលឲ្យកីឡាករថៃ Saensatharn មកវាយជាមួយខ្លួននៅលើទឹកដីកម្ពុជា។
ក្រោយមានការឌឺដងដាក់គ្នាតាមបណ្តាញសង្គមហ្វេសប៊ុករវាងអ្នកប្រដាល់ថៃ Saensatharn P.K.Saenchai ជាមួយអ្នកប្រដាល់ជួរមុខកម្ពុជា កែវ រំចង់ និងមឿន សុខហ៊ុច។ កាលពីថ្ងៃទី១៨ មេសា អ្នកលេងកណ្តាប់ដៃ រឿង សោភ័ណ្ឌ ដែលកំពុងស្ថិតនៅប្រទេសបារាំង បានបង្ហោះវីដេអូសកម្មភាពហ្វឹកហាត់ជាមួយពាក្យសម្តី ដោយបបួលអ្នកប្រដាល់ថៃខាងលើឲ្យមកប្រកួតនៅកម្ពុជា។
ក្នុងវីដេអូមានរយៈពេល២៤វិនាទី កីឡាករ រឿង សោភ័ណ្ឌ បាននិយាយយ៉ាងដូច្នេះថា៖«Saensatharn បើឯងចង់ខ្លាំង ឯងមកប្រកួតនៅស្រុកខ្មែរមក អាពៅ»។ ការចេញវីដេអូរបស់កីឡាករកម្ពុជារូបនេះ គឺដើម្បីឆ្លើយតបនឹងការដឺដងរបស់អ្នកប្រដាល់ថៃ Saensatharn ដែលបានបង្ហោះវីដេអូជាភាសាថៃ រៀបរាប់ឈ្មោះកីឡាករកម្ពុជាដែលរូបគេចង់ប្រកួតជាមួយ។
ចំណែកកីឡាករ កែវ រំចង់ ឯណេះវិញ ក្រោយបានឃើញវីដេអូដែល Saensatharn ចង់ជួបជាមួយខ្លួនបានឆ្លើយតបតាមរយៈហ្វេសប៊ុកផ្លូវការរបស់ខ្លួនថា៖«យល់ព្រម Saensatharn! ខ្ញុំកំពុងរង់ចាំអ្នក។ អ្នកស្គាល់ខ្ញុំឲ្យច្បាស់ ខ្ញុំមិនដែលខ្លាចនោះទេ»។
តាមរយៈសារឆ្លើយតបនេះ កែវ រំចង់ ទទួលបានការគាំទ្រយ៉ាងខ្លាំងពីសំណាក់មិត្តភក្តិក្នុងបណ្តាញសង្គមហ្វេសប៊ុក ពិសេសអ្នកគាំទ្រវិស័យកីឡាប្រដាល់។ លើសពីនេះពួកគេចង់ឲ្យ រំចង់ ជួបអ្នកប្រដាល់ថៃខាងលើឆាប់ៗថែមទៀតផង៕
Tag:
ប្រដាល់គុនខ្មែរ
រឿង សោភ័ណ្ឌ
Saensatharn
© រក្សាសិទ្ធិដោយ thmeythmey.com