ជាតិ
សម្ដេច ហ៊ុន សែន៖ យើងមិនត្រូវទុកជំងឺរ៉ាំរ៉ៃ ឲ្យក្លាយជាជំងឺមហារីក រហូតងាប់ខ្លួនទេ
× ភ្នំពេញ៖ ជាថ្មីម្ដងទៀត សម្ដេចនាយករដ្ឋមន្ត្រី ហ៊ុន សែន នៅតែរំឭកពីអភិក្រមចំនួន៥ចំណុច ទៅដល់មន្ត្រីរាជការ ឲ្យខិតខំប្រឹងប្រែងបំពេញការងារ បម្រើផលប្រយោជន៍ដល់ប្រជាពលរដ្ឋឲ្យមានប្រសិទ្ធិភាព ក្នុងនាមជាគណបក្សនយោបាយដឹកនាំរដ្ឋាភិបាល។
អភិក្រមចំនួន៥នោះ រួមមាន «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់»។ ក្នុងន័យនេះសម្ដេច ហ៊ុន សែន ចង់សំដៅលើការដោះស្រាយបញ្ហានានា របស់ប្រជាពលរដ្ឋឲ្យទាន់ពេលវេលា ពីសំណាក់អាជ្ញាធរមូលដ្ឋាន រហូតដល់មន្ត្រីថ្នាក់ជាតិ ពោលគឺមិនត្រូវទុកបញ្ហារបស់ពលរដ្ឋ ឲ្យក្លាយទៅជាជំងឺរ៉ាំរ៉ៃ រហូតទៅជាមហារីកនៅក្នុងសង្គមនោះទេ។
ថ្លែងក្នុងកិច្ចប្រជុំត្រួតពិនិត្យប្រចាំឆ្នាំ២០១៧ និងការវាយតម្លៃសមិទ្ធផល៥ឆ្នាំ នៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ នៅព្រឹកថ្ងៃទី២០ មេសានេះ សម្ដេច ហ៊ុន សែន បាននិយាយដូច្នេះថា៖« មុននេះយើងមានអភិក្រមត្រឹមតែ៤ទេ ឆ្លុះកញ្ចក់ ងូតទឹក ដុសក្អែល និងព្យាបាល ប៉ុន្តែចាប់ពីចុងឆ្នាំ២០១៧មក យើងបានដាក់ចេញនូវចំណុចសំខាន់មួយទៀត គឹការវះកាត់តែម្ដង។ គឺមិនត្រឹមតែព្យាបាលហើយ បន្តទុកនៅជំងឺរ៉ាំរ៉ៃតទៅទៀតទេ នេះគឺជាការរំឭកធ្វើការដាស់តឿនសារជាថ្មីម្ដងទៀត នៅក្នុងចំណោមមន្ត្រីរបស់យើង គឺចាំបាច់ណាស់ ការវះកាត់គឺមិនអាចទុកឲ្យជំជំងឺរ៉ាំរ៉ៃនេះ ក្លាយជាជំងឺមហារីក រហូតងាប់ខ្លួននោះទេ។ នេះជាចំណុចដែលខ្ញុំសូមបញ្ជាក់»។
ជាក់ស្ដែងពលរដ្ឋមួយចំនួនធំ ដែលជួបមានបញ្ហាវិវាទដីធ្លីជាមួយក្រុមហ៊ុន ឬអ្នកមានអំណាចកន្លងមក ធ្លាប់បាននាំគ្នាឡើងមកតវ៉ា នៅទីក្រុងភ្នំពេញ ដើម្បីសុំការអន្តរាគមន៍សម្ដេចនាយករដ្ឋមន្ត្រី ហ៊ុន សែន និងពីស្ថាប័នក្រសួងពាក់ព័ន្ធនានា ក្នុងការដោះស្រាយបញ្ហាដីធ្លីរបស់ពួកគេ។ ដោយសារតែបញ្ហាពលរដ្ឋរងគ្រោះដីធ្លីរាប់ពាន់គ្រួសារ ផ្ទុះការតវ៉ាជាបន្តបន្ទាប់នេះ ហើយពុំមានដំណោះស្រាយទាន់ពេលវេលានោះ វាក៏ក្លាយជាចំណុចរសើបមួយ ដែលបានទាញទម្លាក់ប្រជាប្រិយភាពរដ្ឋាភិបាល ពី៩០កៅអី មកត្រឹម៦៨កៅអីកាលពីឆ្នាំ២០១៣កន្លងមក។
ប៉ុន្តែបញ្ហាទាំងនេះ ត្រូវបានប្រមុខរដ្ឋាភិបាល ទប់ស្កាត់ស្ថានការណ៍វិញ តាមរយៈការដាក់ចេញអភិក្រមខាងលើនេះ ដើម្បីដោះស្រាយបញ្ហាជូនប្រជាពលរដ្ឋ។ មកដល់ពេលនេះ ប្រជាពលរដ្ឋរងគ្រោះដីធ្លីមួយចំនួន ត្រូវបានគេសង្កេតឃើញថា ពួកគាត់កំពុងទទួលបានដំណោះស្រាយសមរម្យ ពីសំណាក់រដ្ឋាភិបាលវិញ ក្រោមការដោះស្រាយរបស់ក្រសួងរៀបចំដែនដី នគរូបនីយកម្ម និងសំណង់ រួមទាំងក្រសួងពាក់ព័ន្ធផ្សេងទៀត។ ក្រៅពីនេះ បណ្ដាក្រសួងដទៃទៀត ក៏កំពុងយកចិត្តទុកដាក់ខ្ពស់លើបញ្ហាពលរដ្ឋផងដែរ បន្ទាប់ពីនាយករដ្ឋមន្ត្រី ហ៊ុន សែន បានព្រមានរុះរើគណៈរដ្ឋមន្ត្រីជាថ្មី នៅអាណត្តិទី៦ខាងមុខនេះ ប្រសិនជាសម្ដេច មើលឃើញថា រដ្ឋមន្ត្រី និងមន្ត្រីតាមក្រសួងណា មិនអើពើលើបញ្ហាពលរដ្ឋ៕
Tag:
ហ៊ុន សែន
មន្ត្រីរាជការ
© រក្សាសិទ្ធិដោយ thmeythmey.com