កម្ពុជារកចំណូលបាន៣០០លានដុល្លារ ក្នុងរយៈពេល៣ថ្ងៃ នៃចូលឆ្នាំខ្មែរ

សេដ្ឋកិច្ច

កម្ពុជារកចំណូលបាន៣០០លានដុល្លារ ក្នុងរយៈពេល៣ថ្ងៃ នៃចូលឆ្នាំខ្មែរ

21, Apr 2018 , 10:30 am

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ កម្ពុជា រកចំណូលបាន៣០០លានដុល្លារ ពីភ្ញៀវទេសចរជាតិ និងអន្តរជាតិ ក្នុងរយៈពេល៣ថ្ងៃ នៃពិធីបុណ្យចូលឆ្នាំខ្មែរ។ ឧស្សាហកម្មទេសចរណ៍កម្ពុជា កំពុងក្លាយជាវិស័យអាទិភាពមួយ ក្នុងចំណោមវិស័យធំៗទាំង៤ នៃសេដ្ឋកិច្ចជាតិ។

ក្រសួងទេសចរណ៍ បានបញ្ជាក់ថា កម្ពុជារកចំណូលបានរាប់ពាន់លានដុល្លារក្នុងមួយឆ្នាំៗ ពីភ្ញៀវទេសចរអន្តរជាតិក្នុងវិស័យនេះ ដើម្បីជួយសេដ្ឋកិច្ចកម្ពុជា។ក្នុងន័យនេះក្រសួងទេសចរណ៏ បានបន្ថែមថា កម្ពុជាទាក់ទាញភ្ញៀវទេសចរជាតិ និងអន្តរជាតិ ជាង៥លាននាក់ មកទស្សនាតំបន់ទេសចរណ៍ផ្សេងៗ នៅក្នុងអំឡុងពេល៣ថ្ងៃ នៃពីធីបុណ្យចូលឆ្នាំប្រពៃណីខ្មែរ ។ បើតាមក្រសួងទេសចរណ៍ ក្នុងពិធីសង្ក្រាន្ត៣ថ្ងៃនេះ វិស័យទេសចរណ៍ បានចាក់បញ្ចូលប្រាក់ប្រមាណ៣០០លានដុល្លារបន្ថែមទៅក្នុងចរន្តសេដ្ឋកិច្ច។

កម្ពុជាមានសក្តានុភាពជាច្រើន ដូចជា ភូមិសាស្ត្រ ធម្មជាតិ និង វប្បធម៌ប្រពៃណី ។ទាំងនេះជាលក្ខខ័ណ្ឌចាំបាច់ក្នុងការអភិវឌ្ឍទេសចរណ៍ ឲ្យក្លាយទៅជាវិស័យសេដ្ឋកិច្ចដ៏ខ្លាំងក្លាមួយ។

កាលពីឆ្នាំ២០១៧ កម្ពុជាទទួលបានទេសចរអន្តរជាតិជាង ៥,៦លាននាក់ ក្នុងកំណើន ១១,៨ភាគរយ ដែលនាំចំណូលចូលជាតិប្រមាណ ៣.៦៣៨ លានដុល្លារ ស្មើ ១៣ភាគរយ នៃផលិតផលក្នុងស្រុកសរុប និងបានបង្កើតការងារផ្ទាល់ប្រមាណជាង ៦២ម៉ឺននាក់ ក្នុងនោះមគ្គុទ្ទេសក៍ទេសចរណ៍មានចំនួនជាង ៥ពាន់នាក់។

ជាចក្ខុវិស័យឆ្នាំ២០២០ កម្ពុជារំពឹងទទួលបានទេសចរអន្តរជាតិប្រមាណ ៧លាននាក់ នាំចំណូលចូលជាតិប្រមាណ ៥ពាន់លានដុល្លារ និងបង្កើតការងារផ្ទាល់ជិត ១លាននាក់ ក្នុងនោះតម្រូវការមគ្គុទ្ទេសក៍ទេសចរណ៍មានប្រមាណជាង ១ម៉ឺននាក់។ នេះបើតាមរដ្ឋមន្ត្រីក្រសួងទេសចរណ៍លោក ថោង ខុន ដែលបានបន្ថែមថា បច្ចុប្បន្នក្រសួងទេសចរណ៍ កំពុងយកចិត្តទុកដាក់ជាអាទិភាព ដល់ការបណ្តុះបណ្តាលជំនាញ និងបង្កើតការងារដល់យុវជនកម្ពុជា សំដៅឆ្លើយតបនឹងកំណើនទេសចរជាតិ និងអន្តរជាតិដ៏ខ្លាំងក្លា៕