ជាតិ
ក្រសួងទេសចរណ៍ តម្រូវឲ្យរមណីយដ្ឋានទេសចរណ៍ទាំងអស់ ចូលរួមប្រឡង«រមណីយដ្ឋានទេសចរណ៍គំរូ»
× ភ្នំពេញ៖ ក្រសួងទេសចរណ៍ ប្រកាសរៀបចំការប្រឡងប្រណាំង«រមណីយដ្ឋានទេសចរណ៍គំរូ-Best Tourism Resort»លើកទី២ ដើម្បីបង្កើនប្រសិទ្ធភាព គុណភាព និងក្នុងនិរន្តរភាពទេសចរណ៍។ បើតាមសេចក្តីជូនដំណឹងរបស់ក្រសួងទេសចរណ៍ ពិធីប្រគល់ពានរង្វាន់ដល់ជ័យលាភី នឹងប្រព្រឹត្តទៅនៅក្នុងអំឡុងខែវិច្ឆិកា ឬខែធ្នូ ឆ្នាំ២០១៨ ហើយរមណីយដ្ឋានទេសចរណ៍ មានកាតព្វកិច្ច ចូលរួមប្រឡងប្រណាំងក្នុងកម្មវិធីនេះ។
ក្រសួងទេសចរណ៍ សូមដាក់ចេញនូវការប្រឡងប្រណាំង«រមណីយដ្ឋានទេសចរណ៍គំរូ-Best Tourism Resort»លើកទី២ ដើម្បីបង្កើនប្រសិទ្ធភាពក្នុងការអភិវឌ្ឍ និងគ្រប់គ្រងរមណីយដ្ឋានទេសចរណ៍ ឲ្យមាននិរន្តរភាព គុណភាព និងប្រកដោយភាពច្នៃប្រឌិតខ្ពស់ និងការបង្កើតថ្មី ក្លាយជាផលិតផលទេសចរណ៍ប្រកបដោយភាពទាក់ទាញខ្ពស់ ក៏ដូចជាដើម្បីចូលរួមក្នុងចលនាប្រឡងប្រណាំង«ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ»។
រមណីយដ្ឋានទាំងអស់ ត្រូវដាក់បាក្យចូលរួមការប្រឡប្រណាំងរមណីយដ្ឋានគំរូ ជាកាតព្វកិច្ច ហើយនីតិវិធីនៃការដាក់ពាក្យចូលរួមប្រកួត គិតចាប់ពីខែឧសភា ដល់ខែមិថុនាឆ្នាំ២០១៨ ដោយរមណីយដ្ឋានទាំងអស់ អាចស្នើសុំទម្រង់បែបបទចុះឈ្មោះប្រឡងប្រណាំង ដោយផ្ទាល់នៅមន្ទីរទេសចរណ៍រាជធានី-ខេត្ត ឬនៅក្រសួងទេសចរណ៍។ នេះបើតាមសេចក្តីជូនដំណឹងរបស់ក្រសួងទេសចរណ៍ ដែលបានបញ្ជាក់ទៀតថា បេក្ខភាពត្រូវដាក់ពាក្យចូលរួមប្រឡងប្រណាំងដយបំពេញឲ្យបានត្រឹមត្រូវ ភ្ជាប់ជាមួយឯកសារពាក់ព័ន្ធរួចបញ្ជូនមកក្រសួងទេសចរណ៍ តាមរយៈមន្ទីរទេសចរណ៍រាជធានី-ខេត្ត រៀងរាល់ម៉ោងធ្វើការ ឬផ្ញើមកកាន់អ៊ីម៉ែល
[email protected] ។
តាមក្រសួងទេសចរណ៍ ពីខែមិថុនា ដល់ខែសីហា ឆ្នាំ២០១៨ គណៈកម្មការវាយតម្លៃការប្រឡងប្រណាំងរមណីយដ្ឋានទេសចរណ៍គំរូ នឹងត្រួតពិនិត្យ និងវាយតម្លៃពាក្យសុំឯកសារពាក់ព័ន្ធ និងស្ថានភាពជាក់ស្តែង របស់រមណីយដ្ឋានទេសចរណ៍បេក្ខភាព។
ពីខែសីហា ដល់ខែតុលា គណៈកម្មការវាយតម្លៃ នឹងប្រមូលទិន្នន័យ និងរៀបចំរបាយការណ៍ចុងក្រោយនិងឈានទៅប្រកាសជ័យលាភីការប្រឡងប្រណាំងរមណីយដ្ឋានទេសចរណ៍គំរូលើកទី២។ នៅក្នុងខែតុលានោះដែរ គណៈកម្មការវាយតម្លៃ នឹងជូនដំណឹងពីជ័យលាភីដល់ម្ចាស់រមណីយដ្ឋាន។ នេះបើតាមក្រសួងទេសចរណ៍ ដែលបញ្ជាក់ថា ពិធីប្រគល់ពានរង្វាន់ដល់ជ័យលាភី នឹងប្រព្រឹត្តទៅ នៅក្នុងអំឡុងខែវិច្ឆិកា ឬខែធ្នូ ឆ្នាំ២០១៨ ។
ព័ត៌មានលម្អិត ពីការប្រឡងប្រណាំង«រមណីដ្ឋានទេសចរណ៍គំរូ» លើកទី២នេះ សូមទំនាក់ទំនងទៅកាន់ លេខទូរសព្ទ ០៩២/០៩៨ ៦៥៦ ៧៩៧ ឬតាមអ៊ីម៉ែល
[email protected] ៕
© រក្សាសិទ្ធិដោយ thmeythmey.com