រដ្ឋាភិបាលឥណ្ឌាអនុម័តទោសប្រហារជីវិតសម្រាប់ជនដែលរំលោភក្មេងក្រោម ១២ឆ្នាំ

អន្តរជាតិ

រដ្ឋាភិបាលឥណ្ឌាអនុម័តទោសប្រហារជីវិតសម្រាប់ជនដែលរំលោភក្មេងក្រោម ១២ឆ្នាំ

22, Apr 2018 , 1:06 pm

រូបភាព

ដោយ: សារព័ត៌មានថ្មីៗ

រដ្ឋាភិបាលឥណ្ឌាបានសម្រេចកំណត់ដាក់ទោសប្រហារជីវិតសម្រាប់បណ្តាជនណាក៏ដោយដែលប្រព្រឹត្តអំពើរំលោភសេពសន្ថវៈលើកុមារ។ ការសម្រេចដាក់ច្បាប់នេះឡើង ក៏ដោយសារមានការកើនឡើងនៃករណីរំលោភកុមារពាសពេញប្រទេស ហើយចុងក្រោយបំផុតគឺរំលោភសម្លាប់កុមារីអាយុ ៨ឆ្នាំយ៉ាងសាហាវព្រៃផ្សៃ។

ក្រោយផ្ទុះការតវ៉ា និងមានការខឹងសម្បារក្នុងចំណោមប្រជាជនឥណ្ឌា នាយករដ្ឋមន្ត្រីឥណ្ឌាលោក នារិន្ទ្រា ម៉ូឌី បានសម្រេចកោះប្រជុំគណៈរដ្ឋមន្ត្រីដើម្បីអនុម័តវិធានការដាក់ទោសប្រហារជីវិតប្រឆាំងឧក្រិដ្ឋជនដែលរំលោភកុមារនៅថ្ងៃសៅរ៍ទី ២១ ខែមេសា។

យោងតាមទីភ្នាក់ងារព័ត៌មាន AFP បទបញ្ជារបស់គណៈរដ្ឋមន្ត្រីលោក ម៉ូឌី នេះមានគោលដៅវិសោធនកម្មច្បាប់ប្រឆាំងហិង្សាផ្លូវភេទ ដោយត្រួសត្រាយផ្លូវឲ្យមានការដាក់ទោសប្រហារជីវិតសម្រាប់ជនណាមួយដែលរំលោភកុមារមានអាយុក្រោម ១២ ឆ្នាំ។ ចំណែកទោសអប្បរមានៃជនដែលត្រូវកាត់ទោសរឿងរំលោភក៏ត្រូវបានបន្ថែមផងដែរ។

អ្វីដែលគួរឲ្យកត់សម្គាល់នោះគឺ បទបញ្ជានាយករដ្ឋមន្ត្រីនេះក៏ស្នើពន្លឿននីតិវិធីកាត់ក្តីជនល្មើសផងដែរ ដោយនីតិវិធីនេះត្រុវបញ្ចប់ក្នុងរយៈពេលពីរខែក្រោយពេលចាប់ខ្លួន។ នេះក៏ដោយសារប្រព័ន្ធយុត្តិធម៌ឥណ្ឌាទន់ខ្សោយ និងមានភាពយឺតយ៉ាវ ហើយវារងការរិះគន់ខ្លាំងកន្លងមក។

«បទបញ្ជាក់នេះត្រូវបានបញ្ជូនទៅកាន់ការិយាល័យប្រធានាធិបតីដើម្បីសុំការអនុញ្ញាត ហើយវាជានីតិវធីផ្លូវការក្នុងការដាក់ចេញវិធានការចាំបាច់នានា»។ នេះជាការបញ្ជាក់របស់មន្ត្រីមួយរូបដែលមិនបានបញ្ចេញអត្តសញ្ញាណ។

តាមពិតទៅឥណ្ឌាដាក់ទោសប្រហារជីវិតលើបទឧក្រិដ្ឋធ្ងន់ធ្ងរជាពិសេសករណីសម្លាប់រង្គាល និងភេរវកម្ម។ ប៉ុន្តែរដ្ឋាភិបាលឥណ្ឌារបស់លោក ម៉ូឌី សម្រេចចេញវិធានការនេះ ដោយសារលោករងការថ្កោលទោសខ្លាំងពីមហាជនរឿងអសមត្ថភាពទប់ស្កាត់បញ្ហារំលោភសេពសន្ថវៈ និងមិនចាត់វិធានការប្រឆាំងអ្នកមានអំណាច។ គេឃើញបាតុកម្មកើតឡើងខ្លាំងប៉ុន្មានថ្ងៃចុងក្រោយនេះ ដោយសារពួកគេខឹងសម្បារនឹងការរំលោភសម្លាប់ក្មេងស្រីម៉ូស្លីមអាយុ ៨ឆ្នាំម្នាក់ និងករណីរំលោភសេពសន្ថវៈក្មេងស្រីម្នាក់ដោយអ្នកនយោបាយបក្សកាន់អំណាច BJP នៅរដ្ឋ Jammu Kashmir និង Uttar Pradesh ។

នៅរដ្ឋ Jammu Kashmir ក្មេងស្រីម៉ូស្លីមអាយុ ៨ឆ្នាំម្នាក់ ត្រូវបានជនល្មើសចាប់ជម្រិតហើយរងការបង្ខិតបង្ខំឲ្យប្រើប្រាស់ថ្នាំញៀនផង។ អ្វីដែលព្រៃផ្សៃបំផុតនោះ នាងត្រូវបានជនល្មើសរំលោភច្រើនលើកច្រើនសារ មុននឹងត្រូវគេសម្លាប់ចោលដែរ។

ចំណែករណីរំលោភសេពសន្ថវៈនៅរដ្ឋ Uttar Pradesh វិញនោះ វាពាក់ព័ន្ធអ្នកនយោបាយបក្សកាន់អំណាច BJP របស់នាយករដ្ឋមន្ត្រី នារិន្ទ្រា ម៉ូឌីដែរ។ ករណីពាក់ព័ន្ធអ្នកមានអំណាចនេះ មិនត្រូវបានប៉ូលិសចាត់ការឡើយទោះជាវាកើតឡើងជិតមួយឆ្នាំក្តី ហើយឪពុកក្មេងស្រីរងគ្រោះក៏ត្រូវប៉ូលិសចាប់ឃុំខ្លួនរហូតដល់ស្លាប់ដោយសារព្យាយាមតតាំងជាមួយអ្នកមានអំណាច។ ក្មេងស្រីរងគ្រោះឯណោះវិញព្យាយាមចាក់សាំងដុតខ្លួនឯងនៅដើមខែមេសានេះដើម្បីដាក់សម្ពាធលើអាជ្ញាធរឥណ្ឌាផង៕