ខ្សែប្រយុទ្ធឆ្នើមរបស់ Liverpool កីឡាករ Mohamed Salah និងខ្សែបម្រើ Leroy Sane របស់ក្លិប Manchester City បានក្លាយជាម្ចាស់ពានរង្វាន់កីឡាករឆ្នើម និងកីឡាករយុវជនឆ្នើមប្រចាំឆ្នាំ២០១៨ របស់សមាគម Professional Footballers’ Association (PFA) ក្នុងពិធីចែករង្វាន់នៅសណ្ឋាគារ Grosvenor ក្រុងឡុងដ៍ នៅថ្ងៃទី២៣ ខែមេសា ឆ្នាំ២០១៨ ។
Mohamed Salah បានក្លាយជាម្ចាស់ពាន PFA Player of the Year ដោយទទួលបានសំឡេងឆ្នោតគាំទ្រលើសគូប្រជែង Kevin de Bruyne, David Silva និង Leroy Sane របស់ Manchester City ខ្សែប្រយុទ្ធ Harry Kane របស់ Tottenham រួមទាំងអ្នកចាំទី David de Gea របស់ Manchester United។
ខ្សែប្រយុទ្ធសញ្ជាតិអេហ្ស៊ីប Salah បានចាប់ផ្តើមរដូវកាលដំបូងដ៏អស្ចារ្យនៅលើទឹកដីអង់គ្លេសនៃក្របខណ្ឌ Premier League ក្រោយចាកចេញពី Roma មកចូលរួមជាមួយ Liverpool រដូវកាលនេះ។
ជាមួយគ្នានេះដែរ ខ្សែបម្រើអន្តរជាតិអាល្លឺម៉ង់ Leroy Sane បើទោះចាញ់ Salah ក្តី ប៉ុន្តែសមាជិកក្រុម Man City នេះ បានឈ្នះពានកីឡាករយុវជនឆ្នើម PFA Young Player រដូវកាល២០១៧-២០១៨ផងដែរ។ អតីតខ្សែបម្រើ Schalke 04 វ័យ២២ឆ្នាំរូបនេះ យកឈ្នះពិន្ទុកីឡាករវ័យក្មេងដ៏ទៃទៀតដូចជាមិត្តរួមក្រុម Ederson Moraes និង Raheem Sterling, Harry Kane, Marcus Rashford និង Ryan Sessegnon របស់ Fullham។
Sane ឆ្នះពាន PFA Young Player ប្រចាំឆ្នាំ២០១៨
អតីតខ្សែក្រុមជម្រើសជាតិអង់គ្លេស និងក្លិប West Brom លោក Cyrille Regis ដែលទទួលមរណភាពក្នុងអាយុ ៥៩ឆ្នាំ កាលពីខែមករាកន្លងទៅ ឈ្នះពានរង្វាន់ PFA Merit Award។
ចំណែក កីឡាការិនី Fran Kirby ដែលលេងឲ្យក្លិប Chelseea បានឈ្នះពាន Women’s Player of the Year ខណៈកីឡាការិនី Lauren Hemp នៃក្លិប Bristol City ឈ្នះពាន Women’s Young Player of the Year។ អតីតកីឡាការិនី Arsenal និងជាប្រធានក្រុមជម្រើសជាតិអង់គ្លេស Kelly Smith MBE ទទួលបានពាន PFA Special Achievement Award៕
កីឡាការិនី Fran Kirby ខ្សែប្រយុទុទ្ធ Chelsea ណ្នះពាន Women's Player Of the year
កីឡាការិនី Lauren Hemp សមាជិកក្លិប Bristol City ឈ្នះពាន Women's Young Player