អន្តរជាតិ
UN ៖ពិភពលោកប្រឈមការគំរាមកំហែងនៃការប្រើប្រាស់អាវុធនុយក្លេអ៊ែរកាន់តែខ្លាំង
× មន្ត្រីជាន់ខ្ពស់អង្គការសហប្រជាជាតិបានព្រមានថា ការគំរាមកំហែងដោយការប្រើប្រាស់អាវុធនុយក្លេអ៊ែរកើនឡើងខ្លាំងនៅពេលបច្ចុប្បន្ន ដែលវាជាសញ្ញាអាក្រក់ចំពោះពិភពលោក។ មហាអំណាចនុយក្លេអ៊ែរបន្តអភិវឌ្ឍក្បាលគ្រាប់នុយក្លេអ៊ែររបស់ខ្លួនជាបន្តបន្ទាប់ បើទោះជាពួកគេជាសមាជិកនៃកិច្ចព្រមព្រៀងហាមឃាត់ការសាយភាយនៃអាវុធនុយក្លេអ៊ែរក៏ដោយ។
លោកស្រី Izumi Nakamitsu តំណាងអង្គការសហប្រជាជាតិទទួលបន្ទុកកិច្ចការរំសាយអាវុធ បានថ្លែងនៅថ្ងៃចន្ទទី ២៣ ខែមេសាថា ការគំរាមកំហែងដោយការប្រើប្រាស់អាវុធនុយក្លេអ៊ែរនៅលើពិភពលោកក្លាយជាបញ្ហាប្រឈមធំ។
យោងតាមទីភ្នាក់ងារព័ត៌មាន AFP នៅក្នុងវេទិកាកិច្ចប្រជុំនៅក្រុងហ្សឺណែវស្តីពីការត្រួតពិនិត្យកិច្ចព្រមព្រៀងហាមឃាត់ការសាយភាយអាវុធនុយក្លេអ៊ែរ (NPT) លោកស្រីបានថ្លែងដូច្នេះថា ៖ «ការគំរាមកំហែងដោយការគំរាមប្រើប្រាស់អាវុធនុយក្លេអ៊ែរដោយចេតនាកំពុងកើនឡើងខ្លាំង។ វោហាសព្ទជុំវិញភាពចាំបាច់នៃការប្រើប្រាស់អាវុធនុយក្លេអ៊ែរកើនឡើងដូចគ្នា»។
អ្នកជំនាញរូបនេះព្រមានថា បណ្តារដ្ឋមានអាវុធនុយក្លេអ៊ែរកំពុងបន្តធ្វើទំនើបកម្មកម្មវិធីនុយក្លេអ៊ែររបស់ខ្លួន ហើយវាក៏នាំឲ្យមានការប្រឈមមុខជាថ្មីនៃការប្រណាំងប្រជែងសព្វាវុធដូចគ្នា។ វាប្រៀបដូចជាពេលវេលានៅសម័យសង្គ្រាមត្រជាក់មុនពេលកិច្ចព្រមព្រៀង NPT នេះត្រូវបានបង្កើតឡើងដែរ។ ប៉ុន្តែលោកស្រីក៏កត់សម្គាល់ដែរពីការប្រឹងប្រែងរបស់បណ្តាប្រទេសមហាអំណាចក្នុងការបន្តចរចាគ្នាលើការគ្រប់គ្រងអាវុធនិងរំសាយសព្វាវុធសាកលផង។
តាមពិតទៅមហាអំណាចប្រាំសមាជិកក្រុមប្រឹក្សាសន្តិសុខអង្គការសហប្រជាជាតិ បារាំង អង់គ្លេស រុស្ស៊ី ចិន និងអាមេរិកសុទ្ធតែជាភាគីនៃកិច្ចព្រមព្រៀងការពារការរីសាយភាពនៃអាវុធនុយក្លេអ៊ែរនេះដែរ។ ប៉ុន្តែមហាអំណាចទាំងទីនេះនៅតែបន្តធ្វើទំនើបកម្មក្បាលគ្រាប់នុយក្លេអ៊ែរខ្លួន និងបន្តរក្សាទុកអាវុធនុយក្លេអ៊ែរជាផ្នែកមួយនៃយុទ្ធសាស្ត្រការពារជាតិរបស់ខ្លួនផង។ ដូចឃើញស្រាប់ រដ្ឋបាលអាមេរិករបស់លោក ដូណាល់ ត្រាំ បានសម្រេចធ្វើទំនើបកម្មក្បាលគ្រាប់នុយក្លេអ៊ែររបស់ខ្លួនកាលពីថ្មីៗនេះ ដែលវាបង្កភាពងាយស្រួលដល់ការប្រើប្រាស់អាវុធនេះផងដែរ។
វេទិកាកិច្ចប្រជុំគណៈកម្មការត្រួតពិនិត្យកិច្ចព្រមព្រៀងស្តីពីការហាមឃាត់ការប្រើប្រាស់អាវុធនុយក្លេអ៊ែរ ឆ្នាំ ២០២០ ត្រូវបានធ្វើឡើងបន្ទាប់ពីកូរ៉ខាងជើង ប្រកាសបោះបង់ចោលកម្មវិធីមីស៊ីលនិងនុយក្លេអ៊ែរ និងរំសាយអាវុធផង។ កូរ៉េខាងជើងដើរចេញពីកិច្ចព្រមព្រៀងនេះកាលពី ១៥ ឆ្នាំមុន។
អ្នកតំណាងអង្គការសហប្រជាជាតិរូបនេះបានសាទរចំពោះការវិវត្តន៍នៃស្ថានភាពនេះ ហើយរំពឹងថា វានឹងរួមចំណែកដល់ការកសាងទំនុកចិត្តរវាងគូភាគី និងជួយដល់ការសន្ទនាគ្នានៅពេលខាងមុខជុំវិញការដោះស្រាយបញ្ហានុយក្លេអ៊ែរផង៕
Tag:
NPT
នុយក្លេអ៊ែរ
UN
Izumi Nakamitsu
© រក្សាសិទ្ធិដោយ thmeythmey.com