ជាតិ
រថភ្លើងបុករថយន្ត កំហុសអ្នកណា? ប្រភពរូបថត៖ ឡៃលី ប៉ោយប៉ែត
× ថ្ងៃសៅរ៍មួយករណី ហើយថ្ងៃចន្ទមួយករណីទៀត! គ្រោះថ្នាក់រថភ្លើងបុករថយន្តនៅតំបន់ក្រុងប៉ោយប៉ែត ខេត្តបន្ទាយមានជ័យ និងទីកន្លែងផ្សេងទៀត បានក្លាយជារឿងដ៏គួរឲ្យព្រួយបារម្ភ ដោយសារតែវាបានកើតឡើងជាញឹកញាប់។
កាលពីព្រឹកថ្ងៃសៅរ៍ ទី២១ ខែមេសា រថយន្តមួយគ្រឿងបានធ្វើដំណើរឆ្លងកាត់លើផ្លូវរថភ្លើងនៅចំណុចភូមិបាលិលេយ្យ២ ក្រុងប៉ោយប៉ែត ហើយពេលធ្វើដំណើរបានពាក់កណ្តាលផ្លូវ រថភ្លើងមកដល់ និងបុករថយន្តនោះប៉ើងខ្ទាត។ ករណីស្រដៀងគ្នា បានកើតឡើងផងដែរនៅព្រឹកថ្ងៃចន្ទ ទី២៣ ខែមេសា នៅចំណុចភូមិនិមិត្ត១ ក្រុងប៉ោយប៉ែតដដែល។
ករណីទាំងពីរមិនបណ្តាលឲ្យមនុស្សស្លាប់ ប៉ុន្តែអ្នកបើកបររងរបួសធ្ងន់ ខណៈរថយន្ត និងរថភ្លើងរងការខូចខាត។ យោងតាមការផ្សាយរបស់គេហទំព័រផ្សព្វផ្សាយអប់រំនៃក្រសួងមហាផ្ទៃ ភាគីរថយន្តជាអ្នកដែលត្រូវសងការខូចខាត និងការជួសជុលរថភ្លើង។
វាប្រហែលជាមិនអាចទៅរួចឡើយ សម្រាប់ភាគីរថយន្តក្នុងការទាមទារសំណងផ្លូវច្បាប់ពីខាងរថភ្លើង ដោយសារតែពួកគាត់បានបើករំលោភលើផ្លូវអាទិភាពរបស់រថភ្លើង។ ទោះបីជាយ៉ាងណាក៏ដោយ អាជ្ញាធរដែនដី និងស្ថាប័ន ជំនាញទទួលរងនូវការស្តីបន្ទោសថា មិនបានដាក់ផ្លាកសញ្ញាឲ្យបានត្រឹមត្រូវ ប៉ុន្តែករណីមួយចំនួនអ្នកបើកបររថយន្តខ្វះការប្រុងប្រយ័ត្នដោយមិនខ្វល់ពីផ្លាកសញ្ញាណែនាំ៕
© រក្សាសិទ្ធិដោយ thmeythmey.com