កីឡាអន្តរជាតិ
អន្តរជាតិ
UCL៖ James ថាខ្លួនត្រៀមធ្វើឲ្យ Zidane ខកចិត្ត ក្នុងជំនួប Bayern-Real
× ក្រោយពីស្តារភាពខ្លាំងឡើងវិញជាមួយ Bayern Munich កីឡាករ James Rodriguez មានឱកាសបង្ហាញឲ្យ Real Madrid ឃើញនូវអ្វីដែលពួកគេកំពុងតែបាត់បង់ នៅពេលក្រុមទាំងពីរត្រូវជួបគ្នាក្នុងការប្រកួតជើងទី១ វគ្គពាក់កណ្តាលផ្តាច់ព្រ័ត្រពានរង្វាន់ UEFA Champions League នៅរាត្រីថ្ងៃទី២៥ ខែមេសា វេលាម៉ោង ១:៤៥នាទី [ម៉ោងនៅកម្ពុជា]។ នេះបើតាមការចុះផ្សាយរបស់កាសែត The National។
James បានមករួមរស់ជាមួយ Real Madrid រយៈពេល៣រដូវកាល ក្រោយផ្លាស់ចេញពី Monaco កាលពីឆ្នាំ២០១៤។ រដូវកាលដំបូងខ្សែបម្រើអន្តរជាតិកូឡុំប៊ីរូបនេះ បានបង្ហាញទម្រង់លេងដ៏គួរឲ្យចាប់អារម្មណ៍នៅលើទឹកដីអេស្ប៉ាញ Santiago Bernabeu និងដើរតួយ៉ាងសំខាន់សម្រាប់ក្រុមជម្រើសជាតិក្នុងព្រឹត្តិការណ៍បាល់ទាត់ពិភពលោក ឆ្នាំ២០១៤។
ប៉ុន្តែក្រោយលោក Zinedine Zidane ចូលមកកាន់តំណែងពីឆ្នាំ២០១៦មក ម្ចាស់ស្បែកជើងមាស World Cup នៅប្រេស៊ីលរូបនេះ មិនស្ថិតក្នុងក្រសែភ្នែកគ្រូបារាំង និងមិនសូវបានបង្ហាញខ្លួននោះទេ ទើបសម្រេចទៅចូលរួមជាមួយ Bayern Munich នៅដើមរដូវកាលនេះក្នុងលក្ខខណ្ឌខ្ចីជើង២រដូវកាល។ នៅទឹកដីអាល្លឺម៉ង់ James មានឱកាសបង្ហាញខ្លួនបានច្រើនប្រកួត និងជួយក្រុមមានមូលដ្ឋានក្នុងក្រុងមុយនិចលើកពាន Bundesliga រដូវកាល ២០១៧-២០១៨ ទៀតផង។
James បានប្រាប់កាសែតអេស្ប៉ាញ AS មុនពេលការប្រកួតជើងទី១ នៅកីឡដ្ឋាន Allianz Arena ថា៖«ការប្រកួតរវាងក្រុមទាំងពីរនឹងមានលក្ខណៈពិសេសសម្រាប់ខ្ញុំ។ ខ្ញុំនៅ Real រយៈពេល៣ឆ្នាំមកហើយ ខ្ញុំមានមិត្តភក្តិនៅទីនោះនិងការចងចាំដ៏ល្អ។ ប៉ុន្តែពេលនេះ ខ្ញុំគិតតែពីក្រុមរបស់ខ្ញុំ ថាត្រូវធ្វើរបៀបណាទើបអាចយកឈ្នះ Real បាន»។
អតីតសមាជិកក្រុម FC Porto វ័យ២៦ឆ្នាំរូបនេះ អាចមានសិទ្ធិចូលលេងឲ្យ Bayern ទល់នឹង Real Madrid ដែលជាក្រុមអាណាព្យាបាលខ្លួន បើទោះស្ថិតនៅជាកីឡាករខ្ចីជើងក៏ដោយ ព្រោះច្បាប់របស់សហព័ន្ធកីឡាបាល់ទាត់ទ្វីបអឺរ៉ុប UEFA បានចែងដូច្នេះ៕
Tag:
បាល់ទាត់
UEFA Champions League
Bayern Munich
Real Madrid
James Rodriguez
© រក្សាសិទ្ធិដោយ thmeythmey.com