កូនប្រុសលោក គង់ គាំ បង្កើតបក្សថ្មី ដើម្បីចូលរួមបោះឆ្នោត ព្រោះមិនជឿថាបក្សសង្គ្រោះជាតិ រស់ឡើងវិញ

ជាតិ

នយោបាយជាតិ

កូនប្រុសលោក គង់ គាំ បង្កើតបក្សថ្មី ដើម្បីចូលរួមបោះឆ្នោត ព្រោះមិនជឿថាបក្សសង្គ្រោះជាតិ រស់ឡើងវិញ

25, Apr 2018 , 6:00 pm

រូបភាព

លោក គង់ មុនីកា កូនប្រុសពៅរបស់លោក គង់ គាំ ប្រកាសបង្កើតគណបក្សឆន្ទៈខ្មែរ។ រូបពីគណនេយ្យហ្វេសបុករបស់លោក គង់ មុនីកា

ដោយ: សារព័ត៌មានថ្មីៗ

ភ្នំពេញ៖ គណបក្សថ្មីមួយ មានឈ្មោះថាគណបក្សឆន្ទៈខ្មែរ ដែលស្ថាបនិកជាសែស្រឡាយរបស់ឥស្សជននយោបាយជាន់ខ្ពស់ខាងប្រឆាំង នឹងត្រូវកើតឡើងក្នុងពេលឆាប់ៗនេះ ដើម្បីចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨។

អ្នកដែលចេញមកប្រកាសបង្កើតគណបក្សថ្មីនេះ គឺលោក គង់ មុនីកា កូនប្រុសពៅរបស់លោក គង់ គាំ ដែលគេដឹងឮថាជាអតីតអ្នកនយោបាយប្រឆាំងដ៏មានឥទ្ធិពលមួយរូប និងជាមនុស្សជិតស្និទ្ធបំផុតរបស់លោក សម រង្ស៊ី អតីតប្រធានគណបក្សសង្គ្រោះជាតិ។ មូលហេតុ ដែលជំរុញឲ្យលោក គង់ មុនីកា សម្រេចចិត្តបង្កើតគណបក្សថ្មី គឺដោយសារតែលោក ពុំមានសុទិដ្ឋិនិយមថា គណបក្សសង្គ្រោះជាតិ អាចឈរឈ្មោះនិងដាក់បេក្ខជន សម្រាប់ការបោះឆ្នោតនៅឆ្នាំ២០១៨។

លោក គង់ មុនីកា ដែលមានបងប្រុសពីរនាក់ គឺលោក គង់ សភា និងលោក គង់ បូរ៉ា ធ្លាប់ធ្វើជាតំណាងរាស្ត្រ បានបញ្ជាក់ក្នុងសេចក្តីប្រកាសរបស់លោក នៅថ្ងៃទី២៥ ខែមេសា ឆ្នាំ២០១៨នេះ យ៉ាងដូច្នេះថា៖«គណបក្សឆន្ទៈខ្មែរ ជារូបកាយថ្មី តែព្រលឹង និងស្មារតីពីឆ្នាំ២០១៣ និងឆ្នាំ២០១៧ របស់ប្រជាពលរដ្ឋខ្មែរ ដែលរួមកាយ រួមចិត្តជាធ្លុងមួយ ដើម្បីឈានទៅសម្រេចឲ្យមានការផ្លាស់ប្តូរនោះ ប្រាកដជាដណ្តើមបានជ័យជម្នះជាប្រវត្តិសាស្ត្រនិងត្រចះត្រចង់ នៅឆ្នាំ២០១៨ ជាមិនខាន»។

សារចុងក្រោយរបស់លោក គង់ មុនីកា ដែលមិនសូវឮឈ្មោះពីមុន គឺអំពាវនាវឲ្យប្រជាពលរដ្ឋ ចូលរួមជាមួយ និងគាំទ្រគណបក្សថ្មីរបស់លោក។

លោក គង់ គាំ ដែលជាឪពុក បានប្រាប់សារព័ត៌មានថ្មីៗតាមទូរសព្ទថា លោក និងលោក សម រង្ស៊ី រួមទាំងឥស្សរជននយោបាយខាងប្រឆាំងផ្សេងទៀត ពុំបានជំរុញឬឈរពីក្រោយលោក គង់ មុនីកា ក្នុងការបង្កើតគណបក្សថ្មីនេះទេ។ អតីតអ្នកនយោបាយចាស់វស្សា និងធ្លាប់ជាប្រធានគណបក្សភ្លើងទៀន បានបញ្ជាក់យ៉ាងដូច្នេះថា៖«ការបង្កើតនេះ គឺជាឆន្ទៈផ្ទាល់របស់គេ ហើយអ្នកចូលរួមភាគច្រើន គឺជាអតីតសកម្មជនគណបក្សប្រឆាំង»។

លោក សម រង្ស៊ី គោរពលើការសម្រេចចិត្តបង្កើតគណបក្សថ្មីនេះ។ នេះបើតាមលោក គង់ គាំ ដដែល ដោយលោក បន្ថែមយ៉ាងដូច្នេះថា៖«ខ្ញុំទើបនឹងទទួលបានព័ត៌មានពីមនុស្សនៅជុំវិញលោកប្រធាន សម រង្សី ថា គាត់ មិនជំទាស់ទេ។ គាត់ យល់ថាអ្នកបង្កើតគណបក្សនេះ សុទ្ធតែជាអ្នកប្រជាធិបតេយ្យដូច្នគ្នា»។

លោក គង់ គាំ និងកូនប្រុសទាំងពីរ ជាអតីតតំណាងរាស្ត្រ ស្ថិតក្នុងចំណោមថ្នាក់ដឹកនាំទាំង១១៨នាក់របស់គណបក្សសង្គ្រោះជាតិ ដែលត្រូវបានតុលាការកំពូល ហាមឃាត់ក្នុងការធ្វើនយោបាយរយៈពេល៥ឆ្នាំ។

លោក សម រង្ស៊ី រួមទាំងថ្នាក់ដឹកនាំប្រឆាំងនៅក្រៅប្រទេស ប្រឹងប្រែងសម្បើមណាស់ ដើម្បីជំរុញឲ្យសហគមន៍អន្តរជាតិ ជួយធ្វើអន្តរាគមន៍ មកលើស្ថានការណ៍នយោបាយនៅកម្ពុជា។ គោលបំណងធំបំផុតរបស់ពួកគេ គឺចង់ឲ្យមានការដោះលែងលោក កឹម សុខា និងទាមទារឲ្យគណបក្សសង្គ្រោះជាតិ រស់ឡើងវិញ ដើម្បីបានចូលរួមក្នុងការបោះឆ្នោត។

ប៉ុន្តែ រហូតមកដល់ពេលនេះ ការខិតខំរបស់ពួកគេ មិនទាន់ទទួលបានសញ្ញាវិជ្ជមាននៅឡើយទេ ខណៈការបោះឆ្នោតកាន់តែខិតជិតមកដល់។ នៅថ្ងៃទី៣០ ខែមេសានេះ ការចុះឈ្មោះគណបក្ស សម្រាប់ប្រកួតប្រជែងការបោះឆ្នោត នឹងចាប់ផ្តើមហើយ ហើយនឹងត្រូវបញ្ចប់នៅថ្ងៃទី១៤ ខែឧសភា ឆ្នាំ២០១៨។

លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប.) ធ្លាប់អះអាងថា ការចុះឈ្មោះគណបក្សសម្រាប់ប្រកួតប្រជែង នឹងមិនពន្យារពេលជាដាច់ខាត។ លោក សង្កត់ធ្ងន់ថា គណបក្សណា មិនបានចុះឈ្មោះ គឺស្មើនឹងមិនបានចូលរួមការបោះឆ្នោត៕