សេរីភាពសារព័ត៌មាន៖ កម្ពុជាធ្លាក់ចំណាត់ថ្នាក់ តែប្រសើរជាងរដ្ឋអាស៊ាន៥ទៀត

ជាតិ

សេរីភាពសារព័ត៌មាន៖ កម្ពុជាធ្លាក់ចំណាត់ថ្នាក់ តែប្រសើរជាងរដ្ឋអាស៊ាន៥ទៀត

26, Apr 2018 , 10:11 am

រូបភាព

ដោយ: រួបរួម

កម្ពុជាស្ថិតនៅលេងរៀងទី១៤២ក្នុងចំណោម១៨០ប្រទេសសម្រាប់ចំណាត់ថ្នាក់សេរីសារព័ត៌មានប្រចាំឆ្នាំ២០១៨។ នេះបើតាមសន្ទស្សន៍ 2018 World Press Freedom Index របស់អង្គការអ្នកកាសែតគ្មានព្រំដែន (Reportes Sans Frontiers)។

កម្ពុជាធ្លាក់ចំណាត់ថ្នាក់១០លេខ បើប្រៀបធៀបទៅនឹងឆ្នាំ២០១៧ (លេខ១៣២) ប៉ុន្តែកើន៣.៨៣ពិន្ទុលើចំណាត់ថ្នាក់រួម។ អង្គការអ្នកកាសែតគ្មានព្រំដែន បានកត់សម្គាល់ថា នារយៈពេលចុងក្រោយនេះ មិនមានករណីអ្នកកាសែត អ្នកកាសែតពលរដ្ឋ និងជំនួយការផ្នែកសារព័ត៌មានដែលត្រូវបានសម្លាប់ នោះឡើយនៅកម្ពុជា ប៉ុន្តែស្ថាប័ននេះ បានរិះគន់រដ្ឋាភិបាលរបស់សម្តេច ហ៊ុន សែន ពីបទព្យាយាមបំបិទសំឡេងដែលរិះគន់។

សម្រាប់ចំណាត់ថ្នាក់ទី១៤២នេះ កម្ពុជាស្ថិតត្រង់ចំណុចក្រហម ដែលមានន័យថា គ្រោះថ្នាក់ ប៉ុន្តែមិនធ្ងន់ធ្ងរខ្លាំង។ បើប្រៀបធៀបជាមួយបណ្តាប្រទេសអាស៊ានទាំង១០ កម្ពុជា ឈរពីលើម៉ាឡេស៊ី (១៤៥) សិង្ហបុរី (១៥១) ព្រុយណេ (១៥៣)។ ឡាវ (១៧០) និងវៀតណាម (១៧៥) ស្ថិតក្នុងចំណោមប្រទេសដែលមានស្ថានភាពសារព័ត៌មានអាក្រក់បំផុត។ កម្ពុជាស្ថិតនៅពីក្រោម ឥណ្ឌូណេស៊ី (១២៤) ហ្វីលីពីន (១៣៣) មីយ៉ាន់មា់ (១៣៧) និងថៃ (១៤០)។

ន័រវេស ស៊ុយអែត ហូឡង់ ហ្វាំងឡង់ និងស្វីស ជាប្រទេសដែលមានសេរីភាពសារព័ត៌មានប្រសើរជាងគេនៅឆ្នាំ២០១៨នេះ។ បារាំងស្ថិតនៅលេខរៀងទី៣៣ អង់គ្លេសទី៤០ រីឯសហរដ្ឋអាមេរិកទី៤៥។ ប្រទេសដែលមានស្ថានភាពសារព័ត៌មានអាក្រក់ជាងគេបំផុតគឺ កូរ៉េខាងជើង អេរីត្រេ តួកមេនីស្ថាន ស៊ីរី និងចិន៕