ជាតិ
អ្នកនាំពាក្យ៖ កម្ពុជាសង្ឃឹមមានលទ្ធផលវិជ្ជមានច្រើនក្នុងជំនួបមេដឹកនាំបងប្អូនកូរ៉េ
× មិនខុសពីពិភពលោកទាំងមូលឡើយ កម្ពុជាបានតាមដានស្ថានការណ៍នយោបាយនៅឧបទ្វីបកូរ៉េយ៉ាងយកចិត្តទុកដាក់។ កម្ពុជាគាំទ្រការលើកស្ទួយសន្តិភាពរវាងបងប្អូនកូរ៉េទាំងពីរ។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានអះអាងថារដ្ឋាភិបាលកម្ពុជាកំពុងតាមដានយ៉ាងជិតស្និទ្ធស្ថានការណ៍នយោបាយដែលបានវិវឌ្ឍន៍ជាវិជ្ជមានខ្លាំងនៅឧបទ្វីបកូរ៉េ។ មន្ត្រីជាន់ខ្ពស់នៃក្រសួងការបរទេសកម្ពុជាដដែលបានបញ្ជាក់ រដ្ឋាភិបាលកម្ពុជាសាទរការវិវឌ្ឍជាវិជ្ជមាននេះ ដោយរាប់ចាប់តាំងជំនួបដ៏សំខាន់រវាងលោកប្រធានាធិបតីចិន ស៊ី ជីនភីង និងប្រមុខដឹកនាំកូរ៉េខាងជើង គីម ជុងអ៊ុន។
អ្នកនាំពាក្យក្រសួងការបរទេសកម្ពុជាបានអធិប្បាយប្រាប់សារព័ត៌មានថ្មីៗថា៖«យើងស្វាគមន៍ការវិវឌ្ឍជាវិជ្ជមានខ្លាំងនូវស្ថានការណ៍នយោបាយក្នុងតំបន់ឧបទ្វីបកូរ៉េ។ ជំនួបរវាងប្រធានាធិបតី ស៊ី ជីនភីង និងប្រមុខដឹកនាំកូរ៉េខាងជើង គីម ជុងអ៊ុន បានបំបែកភាពជាប់គាំងកន្លងមក និងបានបើកផ្លូវរហូតដល់មានជំនួបកំពូលរវាងមេដឹកនាំកូរ៉េទាំងពីរនាថ្ងៃទី២៧ខែមេសា និងគម្រោងជំនួបរវាងប្រមុខដឹកនាំកូរ៉េខាងជើង និងប្រធានាធិតី ដូណាល់ ត្រាំ នាចុងខែឧសភាខាងមុខ»។
ជាលើកដំបូងរបស់ប្រមុខដឹកនាំកូរ៉េខាងជើង លោក គីម ជុងអ៊ុន ចាប់តាំងពីថ្ងៃដែលលោកឡើងកាន់អំណាចនាចុងឆ្នាំ២០១១ ដែលត្រូវជួបជាមួយមេដឹកនាំកំពូលនៃកូរ៉េខាងត្បូង លោក មូន ចេអ៊ីន។ ទាក់ទងនឹងជំនួបជាប្រវត្តិសាស្ត្រនៃមេដឹកនាំបងប្អូនកូរ៉េដែលជាប្រទេសមួយក្នុងពិភពលោកដែលរស់នៅបែកបាក់គ្នាក្នុងពេលបច្ចុប្បន្ននេះ អ្នកនាំពាក្យក្រសួងការបទេសកម្ពុជាបានថ្លែងយ៉ាងដូច្នេះថា៖«យើងសង្ឃឹមថាជំនួបនោះនឹងផ្តល់ផលវិជ្ជមានក្នុងបុព្វហេតុសន្តិភាព និងការរំសាយអាវុធនុយគ្លេអ៊ែរដោយសន្តិវិធី។ ជំហររបស់កម្ពុជា គឺយើងគាំទ្រចំណុចទាំងពីរនេះ»។
មន្ត្រីជាន់ខ្ពស់នៃក្រសួងការបរទេសកម្ពុជាក៏បានបញ្ជាក់ឲ្យដឹងដែរថា កម្ពុជាមិនដែលត្រូវបានស្នើជាផ្លូវការឲ្យមានតួនាទីនៅក្នុងកិច្ចការសម្របសម្រួលរវាងជម្លោះបងប្អូនកូរ៉េទាំងពីរនោះឡើយ៕
Tag:
ជុំ សុន្ទរី កូរ៉េខាងជើង កូរ៉េខាងត្បូង
មូន ចេអ៊ីន
គីម ជុងអ៊ុន
© រក្សាសិទ្ធិដោយ thmeythmey.com