ជាតិ
នយោបាយជាតិ
អ្នកនាំពាក្យ៖ យើង នឹងស្នើឲ្យថៃ បញ្ជូនលោក សម សេរី មកកម្ពុជា លោក សម សេរី ឈរនៅកណ្តាល
× អាជ្ញាធរថៃ បានចាប់លោក សម សេរី ប្រធានចលនារណសិរ្យរំដោះជាតិខ្មែរ កាលពីថ្ងៃទី២៥ ខែមេសា ឆ្នាំ២០១៨។ លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ប្រាប់សារព័ត៌មានថ្មីៗថា លោក សម សេរី បន្តរស់នៅក្នុងប្រទេស ទាំងដែលទិដ្ឋាការ ហួសកាលកំណត់ ទើបត្រូវបានចាប់ខ្លួនបែបនេះ។
អ្នកនាំពាក្យក្រសួងមហាផ្ទៃ អះអាងថា អាជ្ញាធរកម្ពុជា កំពុងពិចារណា ក្នុងការធ្វើបត្យាប័ន ដើម្បីស្នើឲ្យអាជ្ញាធរថៃ បញ្ជូនលោក សម សេរី ដែលជាពលរដ្ឋខ្មែរ-ដាណាម៉ាក់ មកកាន់កម្ពុជា។ លោក និយាយយ៉ាងដូច្នេះថា៖«បើបានបញ្ជូនគាត់មកគឺល្អហើយ។ តែអាជ្ញាធរថៃ បញ្ជូនមក ឬមិនបញ្ជូនមក យើងក៏មិនទាន់ដឹងច្បាស់ដែរ»។
បើតាមវិទ្យុអាស៊ីសេរី មានមនុស្ស ដែលមិនបញ្ចេញអត្តសញ្ញាណ បានអះអាងថា នឹងស្វែងរកកិច្ចអន្តរាគមន៍ពីស្ថានទូតដាណាម៉ាក់ប្រចាំប្រទេសថៃ ដើម្បីសុំឲ្យដោះលែងលោក សម សេរី។ វិទ្យុអាស៊ីសេរី បានចុះផ្សាយយ៉ាងដូច្នេះ៖«ពួកគេសង្ឃឹមថា អាជ្ញាធរថៃ នឹងមិនបញ្ជូន លោក សម សេរី ទៅកាន់ប្រទេសកម្ពុជាឡើយ»។
រដ្ឋាភិបាលកម្ពុជា តែងប្រុងប្រយ័ត្ន និងតាមដានសកម្មភាពរបស់លោក សម សេរី ទោះជាលោក ស្ថិតនៅក្រៅប្រទេសក៏ដោយ។ រដ្ឋាភិបាល ចាត់ទុកលោក ថាជាមនុស្សម្នាក់ ដែលមានបំណងបង្កអសន្តិសុខ និងចលាចលដល់សង្គមកម្ពុជា។ គេ ដឹងឮថា លោក សម សេរី ប្រឆាំងយ៉ាងខ្លាំងក្លានឹងរបបដឹកនាំសព្វថ្ងៃ។
មុខចូលឆ្នាំខ្មែរ សម្តេចនាយករដ្ឋមន្ត្រី ហ៊ុន សែន បានទម្លាយផែនការរបស់លោក សម សេរី ដែលចង់បំផ្ទុះគ្រាប់បែក នៅម្តុំវត្តភ្នំ ក្នុងរាជធានីភ្នំពេញ និងនៅខេត្តសៀមរាប។ ប៉ុន្តែ សម្តេច ហ៊ុន សែន ប្រកាសនៅពេលនោះថា ផែនការរបស់លោក សម សេរី ត្រូវបានរដ្ឋាភិបាល ដឹងមុន ហើយក៏បញ្ជាឲ្យអាជ្ញាធរ និងកងកម្លាំងប្រដាប់អាវុធ ទប់ស្កាត់៕
Tag:
ថៃ
សម សេរី
ខៀវ សុភ័គ
© រក្សាសិទ្ធិដោយ thmeythmey.com