អន្តរជាតិ
អ្នកសារព័ត៌មានក្នុងស្រុក និងបរទេសជិតបីពាន់នាក់តាមយកព័ត៌មានជំនួបមេដឹកនាំកូរ៉េ
× ជំនួបមេដឹកនាំកូរ៉េ ឬកិច្ចប្រជុំអន្តរកូរ៉េលើកទីបី ចាប់ផ្តើមនៅព្រឹកថ្ងៃសុក្រទី ២៧ ខែមេសា ដោយលោក គីម ជុងអ៊ុន នឹងដើរឆ្លងខ្សែព្រំដែនចូលទឹកដីកូរ៉េខាងត្បូង។ គ្រប់គ្នាកំពុងទន្ទឹងរង់ចាំតាមដានកិច្ចប្រជុំនេះ ខណៈអ្នកសារព័ត៌មានជាតិ និងអន្តរជាតិជិតបីពាន់នាក់ត្រៀមចូលយកព័ត៌មានផងដែរ។
ជំនួបមេដឹកនាំកូរ៉េលើកទីបី ដែលគេឯងទន្ទឹងរង់ចាំនឹងប្រព្រឹត្តទៅនៅម៉ោង៩ និង៣០នាទី [ម៉ោង៧ និង៣០នាទីនៅកម្ពុជា] នៅព្រំដែនបែងចែកកូរ៉េទាំងពីរ។ ប្រធានាធិបតីកូរ៉េខាងត្បូង មូន ចេអ៊ីន នឹងស្វាគមន៍មេដឹកនាំកំពូលកូរ៉េខាងជើង គីម ជុងអ៊ុន នៅត្រង់បេតុងដែលខណ្ឌចែកឧបទ្វីបកូរ៉េនាតំបន់គ្មានយោធា (DMZ)។
ព្រឹត្តិការណ៍សំខាន់នេះត្រូវបានគេតាមដានយ៉ាងយកចិត្តទុកដាក់ខ្លាំង ហើយអ្នកសារព័ត៌មានក្នុងស្រុក និងបរទេសច្រើនរាប់ពាន់នាក់បានសម្រុកចូលមកយកព័ត៌មានពាក់ព័ន្ធនឹងកិច្ចប្រជុំនេះផងដែរ។ បើតាមទូរទស្សន៍សិង្ហបុរី Channel News Asia ដែលស្រង់សម្តីមន្ត្រីកូរ៉េខាងត្បូង អ្នកសារព័ត៌មានក្នុងស្រុក និងអន្តរជាតិមានចំនួនរហូតដល់ ២៨៣៣នាក់ចុះឈ្មោះចូលយកព័ត៌មាននេះ។
ក្នុងជំនួបលើកនេះ គេរំពឹងផងដែរថា លោក មូន ចេអ៊ី នឹងលើកសំណើពីការបញ្ចប់សង្គ្រាមកូរ៉េជាផ្លូវការ តាមរយៈការបង្កើតកិច្ចព្រមព្រៀង ឬសន្ធិសញ្ញាសន្តិភាពផង។ សង្គ្រាមកូរ៉េចប់ឆ្នាំ ១៩៥៣ មែន ប៉ុន្តែបើតាមបច្ចេកទេស ភាគីទាំងពីរ ស្ថិតនៅក្នុងស្ថានភាពធ្វើសង្គ្រាមនៅឡើយ ព្រោះមិនមានសន្ធិសញ្ញាជាផ្លូវការត្រូវបានភាគីទាំងពីរបង្កើតឡើងនោះឡើយ។
គេដឹងច្បាស់ថា លទ្ធផលនៃកិច្ចប្រជុំថ្ងៃស្អែកនេះ នឹងមានឥទ្ធិពល ក៏ដូចជាជួយត្រួសត្រាយផ្លូវសម្រាប់ជំនួបប្រវត្តិសាស្ត្ររវាងលោក គីម ជុងអ៊ុន និងលោក ដូណាល់ ត្រាំ ដែលអាចនឹងធ្វើឡើងនៅចុងខែឧសភា ឬដើមខែមិថុនាខាងមុខដែរ។ ក្រោយជំនួប លោក គីម ជុងអ៊ុន លោក មូន ចេអ៊ីន នឹងផ្តល់ព័ត៌មាននានាទៅលោក ដូណាល់ ត្រាំ ភ្លាមៗពាក់ព័ន្ធនឹងលទ្ធផលនៃជំនួបមេដឹកនាំកូរ៉េនេះផងដែរ៕
Tag:
កូរ៉េខាងត្បូង
កូរ៉េខាងជើង
កិច្ចប្រជុំអន្តរកូរ៉េ
គីម ជុងអ៊ុន
មូន ចេអ៊ីន
© រក្សាសិទ្ធិដោយ thmeythmey.com