ក្នុងជំនួបអាជ្ញាកណ្តាលចាយកាតលឿង៤ ក្រហម១ បឹងកេតផ្តល់មេរៀនយ៉ាងជូរចត់ដល់ Shan United
26, Apr 2018 , 4:23 pm
រូបភាព
កីឡាករ ហុង ផេង រួមជាមួយមិត្តរួមក្រុមព្យាយាមរារាំងខ្សែប្រយុទ្ធនីហ្សេរីយ៉ារបស់ Shan United
×
ដោយ:
ក្រុមជើងឯកលីគកំពូលកម្ពុជាឆ្នាំ២០១៧បឹងកេត បានបញ្ចប់បេសកកម្មប្រកួតវគ្គជម្រុះប្រចាំពូល F ពានរង្វាន់ AFC Cup 2018 របស់ខ្លួនកាលពីថ្ងៃទី២៥ ខែមេសា ឆ្នាំ២០១៨។ បឹងកេតបានផ្តល់មេរៀនយ៉ាងជូរចត់ដល់ម្ចាស់ផ្ទះ Shan United តាមរយៈការយកឈ្នះ ៤-១ នាការប្រកួតចុងក្រោយនៅលើទឹកដីមីយ៉ាន់ម៉ា ដែលអាជ្ញាកណ្តាលចាយកាតលឿង៤ និងក្រហម១។ ចំណែកក្រុម Home United របស់សិង្ហបុរីឈរកំពូលតារាងក្រោយយកឈ្នះ Ceres Negros ក្នុងលទ្ធផល ២-០។
នាការប្រកួតនៅ Thuwunna Stadium កាលពីថ្ងៃទី២៥ ខែមេសា ឆ្នាំ២០១៨ ក្រុមបឹងកេតបានយកឈ្នះក្រុមម្ចាស់ផ្ទះ Shan United ក្នុងលទ្ធផល ៤-១ ដើម្បីជាការសងសឹកដែលខ្លួនបានចាញ់ ២-១ ក្នុងជំនួបជើងទី១នៅពហុកីឡដ្ឋានជាតិ។ ជ័យជម្នះនេះមិនអាចជួយឲ្យបឹងកេតឡើងទៅវគ្គបន្តបានឡើយ ពោលគឺបានត្រឹមឈរចំណាត់ថ្នាក់លេខ៣ប្រចាំពូល F។ ទាំងបឹងកេត និង Shan United សុទ្ធតែបានធ្លាក់ពីការប្រកួតពានរង្វាន់ AFC Cup ប្រចាំឆ្នាំ២០១៨។
សម្រាប់ជំនួបបង្គ្រប់កិច្ចនៅលើទឹកដីមីយ៉ាន់ម៉ា ខ្សែប្រយុទ្ធប្រេស៊ីល Maycon Silva Calijuri បានរកគ្រាប់បាល់នាំមុខ ១-០ សម្រាប់បឹងកេតត្រឹម១១នាទីដំបូងនៃវគ្គទី១ ក្រោមការបញ្ជូនរបស់ខ្សែប្រយុទ្ធនីហ្សេរីយ៉ា Samuel Ajayi។ ក្រោយការទាត់បាល់ពិន័យរបស់ Julius Oiboh ចេញពីស្លាបខាងឆ្វេង ខ្សែការពាររបស់ Shan United កីឡាករ Win Min Htut ត្រូវបានអាជ្ញាកណ្តាលពិន័យកាតលឿងនៅនាទីទី១៣។
ការប្រកួតដំណើរការបានជាង១០នាទីខ្សែប្រយុទ្ធនីហ្សេរីយ៉ា Julius Oiboh បានសម្រេចគ្រាប់ទី២សម្រាប់បឹងកេត ក្រោយការបញ្ជូនចេញពីប្រអប់គ្រោះថ្នាក់ខាងស្តាំរបស់កីឡាករ Maycon។ ការនាំមុខ ២-០ របស់បឹងកេតបានធ្វើឲ្យ Shan United ក្រោមការដឹកនាំរបស់គ្រូបង្វឹកថ្មីក្តៅស្លឹកត្រចៀកយ៉ាងខ្លាំង រហូតខ្សែការពារ Yan Naing Oo ត្រូវបានអាជ្ញាកណ្តាលពិន័យកាតលឿងនៅនាទីទី៣៦។
ក្រោយ Shan United ផ្លាស់ប្តូរខ្សែប្រយុទ្ធនីហ្សេរីយ៉ា Christopher Chizoba ចូលជំនួសខ្សែបម្រើ Aung Shoe Thar Maung នៅនាទីទី៤៥។ ខ្សែប្រយុទ្ធ Julius Oiboh បានបញ្ជូនបាល់លឿនៗឲ្យកីឡាករ Samuel Ajayi ដើម្បីសម្រេចគ្រាប់បាល់នាំមុខ ៣-០ សម្រាប់បឹងកេតនៅនាទីទី៤៧ មុនខ្សែការពារ Phyo Paing Soe របស់ Shan United រងការពិន័យកាតក្រហមនៅនាទីទី៤៩។
នៅនាទីទី៥៨ Shan United បានផ្លាស់ប្តូរខ្សែប្រយុទ្ធ Dway Ko Ko Chit ចេញជំនួសដោយខ្សែការពារ Nan Min Aung មុនខ្សែការពារ លី វ៉ាហេទ របស់បឹងកេតត្រូវបានអាជ្ញាកណ្តាលពិន័យកាតលឿងនៅនាទី៦០។ ក្រោយមករូបគេត្រូវដូរចេញជំនួសដោយខ្សែការពារ ទូច បញ្ចរ៉ុង នៅនាទីទី៦២។ មួយនាទីក្រោយមកខ្សែប្រយុទ្ធប្រេស៊ីល Maycon បានសម្រេចគ្រាប់ទី២របស់ខ្លួន ដើម្បីបង្កើនការនាំមុខ ៤-០ សម្រាប់បឹងកេត។
បឹងកេតបានផ្លាស់ប្តូរកីឡាករជាបន្តបន្ទាប់ក្នុងនោះ ឈុន សុធារ័ត្ន ចូលជំនួស លី មីហ្សាន និង ឃួន ឡាបូរ៉ាវី ជំនួសកីឡាករ Julius Oiboh រីឯ Shan United ដាក់កីឡាករ Nay Lin Tun ជំនួសកីឡាករ Tin Win Aung។
ក្រោយការផ្លាស់ប្តូរកីឡាកររៀងៗខ្លួន ខ្សែប្រយុទ្ធ Zin Min Tun បានរកគ្រាប់បាល់តាមពីក្រោយ ៤-១ សម្រាប់ Shan United នៅនាទីទី៧៨ មុនកីឡាករ Nan Min Aung ដែលដូរចូលជំនួសកីឡាករ Dway Ko Ko Chit ត្រូវអាជ្ញាកណ្តាលពិន័យកាតលឿងនៅនាទីទី៨៤។ ក្រុមទាំងពីរបានរក្សាលទ្ធផល ៤-១ នេះរហូតចប់ការប្រកួត។
នាការប្រកួតនៅកីឡដ្ឋាន Panaad Stadium ក្រុម Home United បានយកឈ្នះក្រុមម្ចាស់ផ្ទះហ្វីលីពីន Ceres Negros ក្នុងលទ្ធផល ២-០ ដើម្បីឡើងឈរកំពូលតារាងប្រចាំពូល F ដោយមាន១៣ពិន្ទុ ខណៈ Ceres Negros ឈរលេខរៀងទី២ដោយមាន១៣ពិន្ទុដូចគ្នា។ Home United និង Ceres Negros ទទួលបានកៅអីឡើងទៅវគ្គបន្តនៃពានរង្វាន់ AFC Cup 2018 ប្រចាំវគ្គជម្រុះតំបន់អាស៊ីអាគ្នេយ៍តំណាងឲ្យពូល F៕