ជំនួបមេដឹកនាំកូរ៉េ៖ គីម ជុងអ៊ុន ក្លាយជាមេដឹកនាំកូរ៉េខាងជើងទីមួយ ជាន់ទឹកដីកូរ៉េខាងត្បូង

អន្តរជាតិ

នយោបាយអន្តរជាតិ

ជំនួបមេដឹកនាំកូរ៉េ៖ គីម ជុងអ៊ុន ក្លាយជាមេដឹកនាំកូរ៉េខាងជើងទីមួយ ជាន់ទឹកដីកូរ៉េខាងត្បូង

27, Apr 2018 , 7:26 am

រូបភាព

ដោយ: តន ចាន់រិទ្ធារ៉ា

នៅថ្ងៃទី២៧ ខែមេសា មេដឹកនាំកំពូលកូរ៉េខាងជើង គីម ជុងអ៊ុន បានដើរឆ្លងកាត់បន្ទាត់ព្រំដែនបែងចែកឧបទ្វីបកូរ៉េដើម្បីចាប់ដៃជាមួយប្រធានាធិបតីកូរ៉េខាងត្បូង មូន ចេអ៊ីន នៅឯតំបន់គ្មានកងទ័ព។ លោក គីម ក្លាយជាមេដឹនាំកូរ៉េខាងជើងទីមួយ ដែលបានធ្វើដំណើរចូលទឹកដីកូរ៉េខាងត្បូង ចាប់តាំងពីសង្គ្រាមកូរ៉េត្រូវបានបញ្ចប់នៅឆ្នាំ១៩៥៣ ។ ជំនួបមេដឹកនាំកូរ៉េលើកនេះនឹងផ្ដោតលើការលុបបំបាត់នុយក្លេអ៊ែរ និងការបង្កើតសន្តិភាពនៅឧបទ្វីបកូរ៉េ។

ជំនួបមេដឹនាំកូរ៉េលើកទីបី បានចាប់ផ្ដើមហើយនៅព្រឹកថ្ងៃទី២៧ ខែមេសានេះ។ ប្រធានាធិបតីកូរ៉េខាងត្បូង មូន ចេអ៊ីន បានស្វាគមន៍មេដឹកនាំកូរ៉េខាងជើង គីម ជុងអ៊ុន នៅខ្សែសីមាព្រំដែនដែនក្នុងភូមិប៉ាន់មុនជុមនៃតំបន់គ្មានកងទ័ព ហើយបានចាប់ដៃគ្នាបង្ហាញពីភាពស្និទ្ធស្នាលផង។ នេះជាលើកទីដំបូង ដែលមេដឹកនាំកូរ៉េខាងជើងជាន់ទឹកដីកូរ៉េខាងត្បូងក្នុងពេលជាង៦៥ឆ្នាំ ខណៈកាលពីខែកុម្ភៈ លោកស្រី គីម យ៉ូចុង ប្អូនស្រីបង្កើតលោក គីម ជុងអ៊ុន ក្លាយជាសមាជិកគ្រួសារត្រកូល គីម ទីមួយធ្វើដំណើរទៅកូរ៉េខាងត្បូង។

ក្នុងកម្មវិធីបដិសណ្ឋារកិច្ច លោក គីម ជុងអ៊ុន ដែលអមដំណើរដោយលោក មូន ចេអ៊ីន ត្រូវបានទទួលដោយកងកិត្តិយសកូរ៉េខាងត្បូង មុននឹងបន្តដំណើរទៅកាន់អាគារសន្តិភាពជាទីតាំងចរចាសម្រាប់ជំនួបមេដឹកនាំកូរ៉េលើកទីបី។ នេះក៏ជាលើកដំបូងដែរ ដែលមេដឹនាំកូរ៉េខាងជើងត្រួតពលកងទ័ពកូរ៉េខាងត្បូងបែបនេះ។ កូរ៉េខាងត្បូងបានរៀបចំពិធីទទួលប្រមុខដឹកនាំកូរ៉េខាងជើង ក្នុងនាមជាភ្ញៀវរដ្ឋតែម្ដង។

ប្រតិភូរបស់កូរ៉េទាំងសងខាងសុទ្ធតែជាមន្ត្រីជាន់ខ្ពស់ទាំងស៊ីវិល និងយោធា។ ប្រមុខកងទ័ព រដ្ឋមន្ត្រីការពារជាតិ រដ្ឋមន្ត្រីបរទេស និងមន្ត្រីជាន់ខ្ពស់ដទៃទៀតរបស់កូរ៉េទាំងពីរបានចូលរួមក្នុងជំនួបទល់មុខលើកនេះ។ លោក គីម ជុងអ៊ុន ក៏បាននាំប្អូនស្រី គីម យ៉ូចុង និងប្រធានសភា គីម យ៉ុងណាម ទៅកូរ៉េខាងត្បូងដែរ។

មួយថ្ងៃមុនជំនួបនេះ មន្ត្រីជាន់ខ្ពស់កូរ៉េខាងត្បូងនិយាយថា មេដឹកនាំកូរ៉េទាំងពីរនឹងជជែកពីកម្មវិធីនុយក្លេអ៊ែរកូរ៉េខាងជើង ការបង្កើតសន្តិភាពអចិន្ត្រៃយ៍នៅឧបទ្វីបកូរ៉េ និងបញ្ហាផ្សេងទៀតរាប់ទាំងការបង្រួបបង្រួមផង។ សន្តិភាពអចិន្ត្រៃយ៍ គឺជារឿងសំខាន់ ដ្បិតសង្គ្រាមកូរ៉េឆ្នាំ១៩៥០-១៩៥៣ បញ្ចប់ដោយយុទ្ធសន្តិភាព មិនមែនកិច្ចព្រមព្រៀងអ្វីឡើយ។ ជាបច្ចេកទេស កូរ៉េទាំងពីរស្ថិតក្នុងស្ថានភាពធ្វើសង្គ្រាមនៅឡើយ។

ជំនួបដែលត្រូវធ្វើពេញមួយថ្ងៃនេះ ជាជំនួបមេដឹកនាំកូរ៉េលើកទីមួយធ្វើនៅទឹកដីកូរ៉េខាងត្បូង ឯជំនួបពីរដងមុនធ្វើនៅកូរ៉េខាងជើងទាំងអស់។ ក្នុងឆ្នាំ២០០០ អតីតប្រធានាធិបតីកូរ៉េខាងត្បូង គីម ដេជុង បានទៅជួបអតីតមេដឹកនាំកូរ៉េខាងជើង គីម ជុងអ៊ីល ដល់រដ្ឋធានីព្យុងយ៉ាង។ ដល់ឆ្នាំ២០០៧ អតីតប្រធានាធិបតី រ៉ូ មូយុន ក៏ធ្វើដំណើរតាមរថយន្តទៅជួបលោក គីម ជុងអ៊ីល នៅកូរ៉េខាងជើងជាថ្មីទៀត។