ជាតិ
Wifi សាធារណៈ២កន្លែងនៅភ្នំពេញ នឹងដាក់ឲ្យប្រើនៅខែក្រោយ
× ភ្នំពេញ៖ អ៊ិនធឺណិតសាធារណៈ (Public Wifi) ២កន្លែងនៅភ្នំពេញ នឹងដាក់ឲ្យប្រើប្រាស់នៅថ្ងៃទី៩ ខែឧសភា ឆ្នាំ២០១៨។ ក្រសួងទូរគមនាគមន៍ និងប្រៃសណីយ៍ តាមរយៈសេចក្តីប្រកាសព័ត៌មានបានបញ្ជាក់ថា ខ្លួនបានរៀបចំឧបករណ៍បច្ចេកទេសប្រព័ន្ធ Public Wifi ២កន្លែង ដែលមានល្បឿន 1Gps (១ហ្សីហ្គាប៊ីតក្នុង១វិនាទី) នៅសួនច្បារសម្តេច ហ៊ុន សែន និងសួនច្បារមុខព្រះបរមរាជវាំង។
ក្រសួងប្រៃសណីយ៍ និងទូរគមនាគមន៍ ក៏បញ្ជាក់ដែរថា នឹងដំឡើងឧបករណ៍បច្ចេកទេសប្រព័ន្ធ Public Wifi ៣ទីតាំងផ្សេងគ្នាទៀត ក្នុងនោះ២កន្លែង នៅខេត្តកំពង់ឆ្នាំង គឺនៅវិទ្យាល័យហ៊ុន សែន ស្រុកកំពង់លែង និងវិទ្យាល័យហ៊ុន សែន ទួលខ្ពស់ ស្រុកទឹកផុស និង១កន្លែងទៀត នៅវិទ្យាល័យអ៊ីវ៉ាស្រង់ ស្រុកគងពិសី ខេត្តកំពង់ស្ពឺ។
ឧបករណ៍បច្ចេកទេសប្រព័ន្ធ Wifiសាធារណៈទាំង៥ទីតាំងនេះ គឺជាជំនួយឥតសំណងរបស់កូរ៉េខាងត្បូង ក្រោមកិច្ចសហប្រតិបត្តិការ រវាងសាជីវកម្មទូរគមនាគមន៍កូរ៉េ(KT) ជាមួយក្រសួងទូរគមនាគមន៍ និងប្រៃសណីយ៍កម្ពុជា លើគម្រោង Public Wifi និង Digital Connective for School៕
Tag:
Public Wifi
ភ្នំពេញ
© រក្សាសិទ្ធិដោយ thmeythmey.com