អាស៊ាន ទុករឿងសមាជិកថ្មីមួយឡែក ហើយប្រឹងពង្រឹងនិងអភិវឌ្ឍកិច្ចសហប្រតិបត្តិការសមាជិកដប់ឲ្យកាន់តែខ្លាំង

អន្តរជាតិ

អាស៊ាន ទុករឿងសមាជិកថ្មីមួយឡែក ហើយប្រឹងពង្រឹងនិងអភិវឌ្ឍកិច្ចសហប្រតិបត្តិការសមាជិកដប់ឲ្យកាន់តែខ្លាំង

29, Apr 2018 , 11:59 am

រូបភាព

ដោយ:

កិច្ចប្រជុំកំពូលអាស៊ានលើកទី៣២ បានបិទបញ្ចប់ជាមួយនឹងសេចក្តីថ្លែងការណ៍រួមមួយប្រកបដោយភាពផ្លែផ្កាថ្មីសម្រាប់ការអភិវឌ្ឍស្ថាប័ននិងតំបន់ឲ្យកាន់មានភាពល្អប្រសើរ ។ ក៏ប៉ុន្តែតាមរយៈកិច្ចប្រជុំកំពូលលើកនេះ ដែលមានសិង្ហបុរីជាប្រធានវិលជុំ មិនផ្តោតសំខាន់លើរឿងបញ្ចូលសមាជិកភាពថ្មីនៅក្នុងសមាគមឡើយ ។

តាមរយៈសេចក្តីថ្លែងការណ៍រួមចុះថ្ងៃទី២៨ មេសា របស់មេដឹកនាំអាស៊ានទាំងដប់ស្តីពីកិច្ចប្រជុំកំពូល អាស៊ានលើកទី៣២ មេដឹកនាំអាស៊ានបានព្រមព្រៀងគ្នាដើម្បីបង្កើត និងអនុវត្តគម្រោងផែនការយុទ្ធសាស្ត្រសម្រាប់ការអភិវឌ្ឍតំបន់អាស៊ានជាច្រើន ។ គម្រោងនោះ ក៏រាប់បញ្ចូលទាំងការបង្កើត «បណ្តាញទីក្រុងឆ្លាតអាស៊ាន ឬ ASEAN Smart Cities Network » ផងដែរ ។

ជាមួយនឹងការព្រមព្រៀងលើគំនិតផ្តួចផ្តើមថ្មីនេះ តាមរយៈសេចក្តីថ្លែងការណ៍ ដែលមានកម្រាស់១១ទំព័រដដែលនោះ អាស៊ាន ក៏បានលើកឡើងពីបញ្ហានៅក្នុងតំបន់ ដែលជាក្តីបារម្ភរួម ដូចជាបញ្ហាជម្លោះអធិបតេយ្យសមុទ្រចិនខាងត្បូង វិបត្តិជនភៀសខ្លួនពីរដ្ឋ Rakhine របស់មីយ៉ាន់ម៉ា និង ជំនួបរវាងមេដឹកនាំកំពូលកូរ៉េទាំងពីរជាដើម ។

ក៏ប៉ុន្តែ បញ្ហាពាក់ព័ន្ធនឹងសមាជិកភាពថ្មី ពោលគឺការសុំចូលជាសមាជិករបស់ទីម័រខាងកើតមិនមានបញ្ជាក់នៅក្នុងសេចក្តីថ្លែងការណ៍រួមរបស់កិច្ចប្រជុំកំពូលអាស៊ានលើកទី ៣២ ឡើយ ។ នេះហាក់ដូចជាខុសពីកិច្ចប្រជុំ ដែលហ្វីលីពីន ធ្វើជាប្រធាននៅឆ្នាំមុន ដែលពេលនោះ តាមរយៈកិច្ចប្រជុំកំពូលទាំងពីរលើក អាស៊ាន យ៉ាងហោចណាស់ ក៏បានលើកឡើងពីវិវត្តរបស់ទីម័រខាងកើតដែរ ។

គួរជម្រាបផងដែរថា ទីម័រខាងកើត គឺជារដ្ឋវ័យក្មេងជាងប្រចាំតំបន់អាស៊ីអាគ្នេយ៍ ។ រដ្ឋដែលទើបតែទទួលបានការទទួលស្គាល់ជាប្រទេសពេញលេញនៅក្នុងឆ្នាំ ២០០២ មួយនេះ បានស្នើសុំជាសមាជិកអាស៊ាននៅក្នុងឆ្នាំ២០១១ ដោយបានរំពឹងថា នឹងទទួលបានផលប្រយោជន៍ច្រើនតាមរយៈកិច្ចសហប្រតិបត្តិការជាមួយនឹងប្រទេសសមាជិកទាំងដប់ ក៏ដូចជាដៃគូរបស់អាស៊ានកាន់តែច្រើនផងដែរ ។

ក៏ប៉ុន្តែរយៈពេលជាងកន្លះទសវត្សរ៍មកនេះ ទីម័រខាងកើត មានឋានៈត្រឹមតែជាប្រទេសអង្កេតការប៉ុណ្ណោះ ពោលគឺ ទីម័រខាងកើត នៅតែស្ថិតក្រោមការតាមដាន និងវិនិច្ឆ័យតាមដំណាក់កាលពីអាស៊ាននៅឡើយនោះទេ ។

តាមពិតទៅរឿងដែលបញ្ហាសមាជិកភាពទីម័រខាងកើតអវត្តមាននៅក្នុងសេចក្តីថ្លែងការណ៍កិច្ចប្រជុំកំពូលអាស៊ានលើកទី៣២ ដែលមានសិង្ហបុរីជាប្រធាន មិនមែនជារឿងចម្លែកអ្វីឡើយ ។ នោះ ក៏ព្រោះតែ មូលបទ របស់ប្រធានវិលជុំអាស៊ានលើកនេះ ផ្តោតតែលើ រឿងសន្តិសុខ បច្ចេកវិទ្យា និងនវានុវត្តន៍នោះទេ ។

អ្វីដែលគួរឲ្យចាប់អារម្មណ៍ផងដែរនោះគឺ ក៏ដោយសារតែការជំទាស់ពីសិង្ហបុរីកន្លងមក ក្រោមហេតុផលថាទីម័រខាងកើតនៅមានចំណុចខ្វះខាតច្រើនដើម្បីបំពេញក្នុងតម្រូវការនៃសសរស្តម្ភទាំងបីរបស់អាស៊ាននោះដែរ ទើបបានជាទីម័រខាងកើត ត្រូវបន្តរង់ចាំ និងមានឋានៈត្រឹមជារដ្ឋអង្កេតការរបស់អាស៊ានមកទល់សព្វថ្ងៃ ៕