ជាតិ
រដ្ឋាភិបាលធ្វើអនុបយោគដីជាង ១៧ហិកតានៅអាងស្តុកទឹកបឹងត្របែក ឲ្យពលរដ្ឋនិងកសាងរចនាសម្ព័ន្ធ
× ភ្នំពេញ៖ រដ្ឋាភិបាល កាត់ដីទំហំ ១៧,៥ម៉ឺនម៉ែត្រក្រឡានៃតំបន់អាងស្តុកទឹកបឹងត្របែកខាងជើង និង អាងស្តុកទឹកបឹងត្របែកខាងត្បូង ជូនប្រជាពលរដ្ឋ ២៧១គ្រួសារ និងមួយផ្នែកសម្រាប់អភិវឌ្ឍហេដ្ឋារចនាសម្ព័ន្តនៅតំបន់នោះ។ នេះបើតាមអនុក្រឹត្យដែលចុះហត្ថលេខាដោយប្រមុខរដ្ឋាភិបាលសម្ដេច ហ៊ុន សែន កាលពីថ្ងៃទី៧ខែកុម្ភៈ។
មាត្រា១នៃអនុក្រឹត្យខាងលើចែងថា«ត្រូវធ្វើអនុបយោគផ្ទៃដីសាធារណៈរបស់រដ្ឋទំហំ ១៧៥ ៨៤៩ ម៉ែត្រក្រឡា នៅសង្កាត់ទួលទំពូងទី១ សង្កាត់បឹងត្របែក និងសង្កាត់ផ្សារដើមថ្កូវ ជាដីឯកជនរបស់រដ្ឋ និងធ្វើប្រទានកម្ម ជាកម្មសិទ្ធិជូនប្រជាពលរដ្ឋដែលរស់នៅ និងកាន់កាប់ជាក់ស្តែងចំនួន ២៧១គ្រួសារ ក្នុងនោះ ៩៦គ្រួសារនូវដីទំហំ ៨០០០០ ម៉ែត្រក្រឡា ស្ថិតនៅតំបន់អាងស្តុកទឹកបឹងត្របែកខាងជើង (បឹងតូច) និង ១៧៥ គ្រួសារនូវដីទំហំ ៩៥ ៨៤៩ ម៉ែត្រក្រឡា ស្ថិតនៅតំបន់អាងស្តុកទឹកបឹងត្របែកខាងត្បូង (បឹងធំ) និងអភិវឌ្ឍហេដ្ឋារចនាសម្ព័ន្ធក្នុងតំបន់អាងស្តុកទឹកបឹងត្របែក»។
បើតាមផែនទីឧបសម្ព័ន្ធដែលភ្ជាប់នឹងអនុក្រឹត្យនេះ ផ្ទៃអាងស្តុកទឹកបឹងត្របែកខាងត្បូង ទំហំ ១៣១ ៥៦៤ ម៉ែត្រក្រឡា ត្រូវរក្សាទុក។ ឯដីទំហំជាង៩ ហិកតា ដែលត្រូវបានធ្វើអនុបយោគខាងលើនេះ គឺជាដីជាប់អាងស្តុកទឹកនេះ។
ដោយឡែកដីទំហំ ៨ហិកតា នៅអាងស្តុកទឹកបឹងត្របែកខាងជើង ដែលត្រូវធ្វើអនុបយោគ គឺសព្វថ្ងៃជាសំណង់ លំនៅឋាន មិនមែនជាផ្ទៃបឹងនោះទេ៕
Tag:
បឹងត្របែក
កាត់ដី
អនុបយោគ
© រក្សាសិទ្ធិដោយ thmeythmey.com