អង្គការយុវជនរបស់លោក ហ៊ុន ម៉ានី រៀបចំវគ្គបណ្តុះបណ្តាលដល់អ្នកសង្កេតការបោះឆ្នោត

ជាតិ

អង្គការយុវជនរបស់លោក ហ៊ុន ម៉ានី រៀបចំវគ្គបណ្តុះបណ្តាលដល់អ្នកសង្កេតការបោះឆ្នោត

29, Apr 2018 , 6:39 pm

រូបភាព

លោក ហ៊ុន ម៉ានី ប្រធានស.ស.យ.ក. ឡើងថ្លែងក្នុងវគ្គបណ្តុះបណ្តាលដល់អ្នកសង្កេតការណ៍សម្រាប់ការបោះឆ្នោត។ រូបពីស.ស.យ.ក.

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក.) ដែលមានលោក ហ៊ុន ម៉ានី ជាប្រធាន បានសហការជាមួយគណៈកម្មាធិការជាតិរៀបចំការបោះឆ្នោត (គ.ជ.ប.) រៀបចំវគ្គបណ្តុះបណ្តាលដល់អ្នកសង្កេតការណ៍ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨។

សមាជិក២១១នាក់របស់ស.ស.យ.ក. បានចូលរួមក្នុងវគ្គបណ្តុះបណ្តាលនេះ ដែលប្រព្រឹត្តទៅពីថ្ងៃទី២៨ ដល់ថ្ងៃទី២៩ ខែមេសា ឆ្នាំ២០១៨ ដោយមានតំណាងពីស្ថាប័នគ.ជ.ប. ធ្វើជាគ្រូឧទ្ទេស។ ស.ស.យ.ក. បានបញ្ជាក់ក្នុងសេចក្តីប្រកាសព័ត៌មានយ៉ាងដូច្នេះថា៖«ការរៀបចំវគ្គបណ្តុះបណ្តាលនេះ គឺដើម្បីពង្រឹងសមត្ថភាពដល់អ្នកសង្កេតការណ៍ ស្តីពីច្បាប់ បទបញ្ជា និងនីតិវិធីសម្រាប់ការបោះឆ្នោត»។

លោក ហ៊ុន ម៉ានី ដែលជាតំណាងរាស្ត្រ និងជាកូនប្រុសពៅរបស់សម្តេចនាយករដ្ឋមន្ត្រីកម្ពុជា បានប្រាប់ក្រុមអ្នកសារព័ត៌មានថា យ៉ាងហោចណាស់ មានសមាជិក២នាក់របស់ស.ស.យ.ក. ដែលនឹងត្រូវដាក់ឲ្យធ្វើជាអ្នកសង្កេតការណ៍ តាមការិយាល័យបោះឆ្នោតនីមួយៗ នៅទូទាំងប្រទេស។ ប្រធានស.ស.យ.ក. រូបនេះ បានបញ្ជាក់យ៉ាងដូច្នេះថា៖«ក្នុងតំណាក់កាលនេះ យើងកំពុងតែបណ្តុះបណ្តាលសមាជិករបស់ស.ស.យ.ក. ឲ្យក្លាយជាអ្នកសង្កេតការណ៍ ដែលមានសមត្ថភាព ដើម្បីធ្វើយ៉ាងណាធានាការបោះឆ្នោតខាងមុខ ឲ្យប្រព្រឹត្តទៅដោយរលូន សេរី និងយុត្តិធម៌»។

បើតាមសេចក្តីប្រកាសព័ត៌មានខាងលើ ស.ស.យ.ក. នឹងរៀបចំវគ្គបណ្តាលនេះម្តងទៀត ដល់អ្នកសង្កេតការណ៍២៣៨នាក់ ពីថ្ងៃទី៥ ដល់ថ្ងៃទី៦ ខែឧសភា ឆ្នាំ២០១៨៕