ជាតិ
រថយន្ត
សេដ្ឋកិច្ច
ផ្លូវដែកពីប៉ោយប៉ែត ដល់បាត់ដឹងខេត្តកំពង់ស្ពឺ ចំណាយ ៧៦លានដុល្លារ នឹងដំណើរការនៅខែកក្កដា
× រដ្ឋាភិបាលកំពុងស្ដារផ្លូវដែកភាគខាងលិចប៉ោយប៉ែត-ភ្នំពេញ ប្រវែង ៣៨៦គីឡូម៉ែត្រ ដែលនឹងដាក់ឲ្យដំណើរការជាស្ថាពរមុនដំណាច់ឆ្នាំ២០១៨នេះ។
តែមុនបញ្ចប់ការស្ដារផ្លូវដែកជាស្ថាពរ រដ្ឋាភិបាលបានដាក់ឲ្យដំណើរការខ្សែរថភ្លើងបណ្ដោះអាសន្នជាដំណាក់កាល ជាបន្តបន្ទាប់។ សព្វថ្ងៃខ្សែរថភ្លើង ត្រូវបានដាក់ឲ្យប្រើប្រាស់ពីប៉ោយប៉ែត មកបាត់ដំបង ហើយនឹងបន្តដល់ខេត្តពោធិ៍សាត់នៅខែក្រោយ និងដល់ស្ថានីយបាត់ដឹង ខេត្តកំពង់ស្ពឺ ក្នុងខែកក្កដា ខាងមុខនេះ។
ការស្ដារផ្លូវដែកពីប៉ោយប៉ែត មកដល់បាត់ដឹង ត្រូវចំណាយថវិកា ៧៦,៦ លានដុល្លារអាមេរិក។ ក្នុងនោះ ១៣លានដុល្លារជាជំនួយរបស់ធនាគារអភិវឌ្ឍន៍ជនបទ (ADB) និង ៦៣,៦ ជាទឹកប្រាក់របស់រដ្ឋាភិបាល ហើយក៏មានជំនួយជាដែកពីប្រទេសម៉ាឡេស៊ីមួយចំនួនផងដែរ។ នេះបើតាមលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ដែលបានថ្លែងក្នុងឱកាសលោកអញ្ជើញសម្ពោធខ្សែរថភ្លើងសិរីសោភ័ណ-បាត់ដំបង នៅថ្ងៃទី២៩ខែមេសា។
រីឯផ្លូវដែកពីបាត់ដឹង ដល់ភ្នំពេញប្រវែងប្រមាណជាង ៣០គីឡូម៉ែត្រទៀត ក្រសួងសាធារណការ កំពុងកៀងគរទុនដើម្បីស្ដារកំណាត់ផ្លូវដែកនេះ។
លោក ស៊ុន ចាន់ថុល អះអាងថា ផ្លូវដែកភាគខាងលិចនេះ នឹងត្រូវបញ្ចប់ការស្ដារឡើងវិញជាស្ថាពរក្នុងឆ្នាំនេះ។ ជាមួយគ្នានេះរដ្ឋាភិបាលក៏នឹងបញ្ចប់ការចរចាដើម្បីភ្ជាប់ផ្លូវដែកជាមួយថៃ ក្នុងពេលខាងមុខឆាប់ៗផងដែរ៕
© រក្សាសិទ្ធិដោយ thmeythmey.com