អន្តរជាតិ
Oxfam៖ជំនួយសម្រាប់ប្រទេសក្រីក្រដោះស្រាយការប្រែប្រួលអាកាសធាតុ នៅតិចជាងការរំពឹងទុកឆ្ងាយ
× អង្គការ Oxfam បានអះអាងថា ប្រទេសអ្នកមានប្រហែលជាមិនអាចគោរពការសន្យាផ្តល់ហិរញ្ញវត្ថុ ១០០ ពាន់លានដុល្លារក្នុងមួយឆ្នាំត្រឹមឆ្នាំ ២០២០ សម្រាប់ជួយប្រទេសកំពុងអភិវឌ្ឍដោះស្រាយបញ្ហាប្រែប្រួលអាកាសធាតុឡើយ។ តាមស្ថានភាពបច្ចុប្បន្ន គោលដៅសម្រេចឲ្យបាន១០០ពាន់លានដុល្លារនេះហាក់នៅឆ្ងាយពីការរំពឹងទុកខ្លាំង។
អនុលោមតាមកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ បណ្តាប្រទេសអភិវឌ្ឍបានសន្យាប្រមែរប្រមូលហិរញ្ញវត្ថុឲ្យបាន ១០០ ពាន់លានដុល្លារត្រឹមឆ្នាំ ២០២០ ដើម្បីជួយប្រទេសក្រីក្រដោះស្រាយបញ្ហាប្រែប្រួលអាកាសធាតុ។
ប៉ុន្តែរបាយការណ៍អង្គការ Oxfam ដែលមានកម្រាស់ ២៨ ទំព័រស្តីពី ការវាយតម្លៃហិរញ្ញវត្ថុអាកាសធាតុឆ្នាំ ២០១៨ និងទើបចេញផ្សាយថ្ងៃព្រហស្បតិ៍ទី ៣ ខែឧសភានេះបានបង្ហាញថា ការប្តេជ្ញាចិត្តនេះហាក់នៅឆ្ងាយពីការពិតណាស់ បើតាមស្ថានភាពបច្ចុប្បន្ននេះ។ ជំនួយផ្តល់ពីប្រទេសអ្នកមានទៅប្រទេសកំពុងអភិវឌ្ឍដើម្បីដោះស្រាយការប្រែប្រួលអាកាសធាតុនៅតែទាប និងយឺតយ៉ាវខ្លាំង។
របាយការណ៍នេះកត់សម្គាល់ថា ឆ្នាំ ២០១៥-២០១៦ ប្រទេសអ្នកមានផ្តល់ហិរញ្ញវត្ថុក្នុងទំហំត្រឹម ៤៨ ពាន់លានដុល្លារប៉ុណ្ណោះ ដែលជិតស្មើនឹង ៥០ភាគរយនៃទំហំហិរញ្ញវត្ថុដែលប្រទេសអ្នកមានទាំងនេះសន្យាជួយចាប់ពីឆ្នាំ ២០២០ ប៉ុណ្ណោះ។ បន្ថែមពីនេះ អង្គការនេះក៏រកឃើញថា ប្រទេសម្ចាស់ជំនួយផ្តល់ហិរញ្ញវត្ថលើគម្រោង និងផ្តល់ជំនួយច្រើនដែលមិនពាក់ព័ន្ធនឹងការប្រែប្រួលអាកាសធាតុដោយផ្ទាល់ឡើយ។
តាមពិតទៅ ហិរញ្ញវត្ថុនេះនឹងត្រូវផ្តល់ឲ្យបណ្តាប្រទេសក្រីក្រដើម្បីជំរុញការកាត់បន្ថយការបញ្ចេញឧស្ម័នកាបូនិច និងធានាបាននូវការអនុវត្តគោលនយោបាយដោះស្រាយបញ្ហាដែលបង្កឡើងដោយការប្រែប្រួលអាកាសធាតុនេះផង។ គោលដៅសំខាន់គឺ កម្រិតសីតុណ្ហភាពពិភពលោកកុំឲ្យកើនឡើងហួស ១,៥ អង្សាសេ (ច្រើនបំផុត ២ អង្សាសេ) ត្រឹមឆ្នាំ ២១០០។
ខណៈដែលអង្គការ Oxfam បញ្ចេញរបាយការណ៍នេះ តំណាងរដ្ឋាភិបាលលើពិភពលោក កំពុងជួបប្រជុំពិភាក្សាគ្នាស្តីពីការអនុវត្តកិច្ចព្រមព្រៀងក្រុងប៉ារីសឆ្នាំ ២០១៥ នៅក្នុងទីក្រុង Bonn ប្រទេសអាល្លឺម៉ង់ ចាប់ពីសប្តាហ៍នេះដល់សប្តាហ៍ក្រោយ ក្រោមអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ (UNFCCC)។ ហិរញ្ញវត្ថុអាកាសធាតុនេះនៅតែជារឿងស្នូល តែស្មុគស្មាញជាងគេក្នុងកិច្ចពិភាក្សាដែរ៕
Tag:
Oxfam
ប្រែប្រួលអាកាសធាតុ
កិច្ចព្រមព្រៀងអាកាសធាតុក្រុងប៉ារីស
© រក្សាសិទ្ធិដោយ thmeythmey.com