ជាតិ
នយោបាយជាតិ
បក្សមួយទៀត ប្រកាសមិនចូលរួមបោះឆ្នោត ព្រោះស្ថានភាពនយោបាយមិនសូវល្អ លោក ញ៉ែម វណ្ណថន ប្រធានគណបក្សមហាសាមគ្គីជាតិខ្មែរ
× គណបក្សមហាសាមគ្គីជាតិខ្មែរ ដែលមានលោក ញ៉ែម វណ្ណថន បណ្ឌិតច្បាប់ ជាប្រធាន នឹងមិនចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ នោះទេ។ ការប្រកាសជំហរមិនចូលរួមរបស់គណបក្សនេះ គឺធ្វើឡើងតាមរយៈសេចក្តីប្រកាសព័ត៌មាន នៅថ្ងៃទី៧ ខែឧសភា ឆ្នាំ២០១៨។
បើតាមសេចក្តីប្រកាសព័ត៌មាន មូលហេតុចម្បង ដែលធ្វើឲ្យគណបក្សមហាសាមគ្គីជាតិខ្មែរ បោះបង់ការបោះឆ្នោត គឺដោយសារតែស្ថានការណ៍នយោបាយ មិនអំណោយផលសមស្រប។ សេចក្តីប្រកាសព័ត៌មាន ក៏បានបញ្ជាក់ផងដែរថា គណបក្សមហាសាមគ្គីជាតិខ្មែរ មិនមានថវិកាគ្រប់គ្រាន់ ទើបសម្រេចមិនចូលរួមក្នុងការបោះឆ្នោត។
មកដល់ពេលនេះ មានគណបក្សបីហើយ ដែលប្រកាសមិនចូលរួមក្នុងការបោះឆ្នោត។ គណបក្សពីរទៀត គឺគណបក្សភ្លើងទៀន និងគណបក្សអំណាចខ្មែរ។
យ៉ាងណាក៏ដោយ គណបក្សកាន់អំណាច និងគណបក្សមួយចំនួនទៀត បានយកពាក្យទៅដាក់នៅគណៈកម្មាធិការជាតិរៀបចំការបោះឆ្នោត (គ.ជ.ប.) រួចហើយ ដើម្បីត្រៀមចូលរួមប្រកួតប្រជែងក្នុងការបោះឆ្នោត ដោយមិនបារម្ភពីស្ថានការណ៍នយោបាយនោះទេ។ ឯគណបក្សផ្សេងទៀត កំពុងបំពេញបែបបទ៕
© រក្សាសិទ្ធិដោយ thmeythmey.com